ഡബ്ലിൻ: വേൾഡ് മലയാളീ കൗൺസിൽ കോർക്ക് , കോർക്ക്  പ്രവാസി മലയാളീയും ചേർന്ന്  ശനിയാഴ്ച കോർക്കിൽ മലയാളികളും മറ്റു ഭാഷസംസാരിക്കുന്ന ഇന്ത്യക്കാരും, ഐറിഷ്‌കാരും ഒത്തൊരുമിച്ചു തിരുവോണം ആഘോഷിച്ചു.

കൊട്ടുംകുരവയും, പുലികളിയും, ചെണ്ടവാദ്യങ്ങളോടെ മലയാളികൾ ആഹ്‌ളാദപൂർവ്വമാണ് തിരുവോണം ആഘോഷമാക്കി മാറ്റിയത്. അത്തപ്പൂക്കളമിട്ട് ഓണപ്പാട്ടിന്റെ ഈണങ്ങൾക്കൊപ്പം ഓണത്തിന്റെ വേഷഭൂഷാദികളോടെ ചുവടുവച്ച മലയാളി മങ്കമാർ മാവേലി തമ്പുരാനെ വരവേറ്റു. തൂശനിലയിൽ വിളമ്പിയ വിഭവസമൃദ്ധമായ ഓണസദ്യ ഇവിടെ ജനിച്ചുവളർന്ന പുതുതലമുറയ്ക്കും, നാട്ടിൽ നിന്നു പഠനത്തിനു എത്തിയ വിദ്യാർത്ഥിയകൾക്കും  ഗൃഹാതുരുത്വമേകി മറക്കാനാവാത്ത പുതിയൊരനുഭവമായി മാറി.

വിവിധയിനം കായിക മത്സരങ്ങളോടെ രാവിലെ ഒമ്പതുമണിയോടെ പരിപാടികൾക്കു തുടക്കമായി. വാശിയേറിയ വടംവലി മത്സരം എല്ലാവരെയും ഉദ്വേഗത്തിന്റെ മുൾ മുനയിൽ നിർത്തി. പരശുരാമൻ മഴു എറിഞ്ഞു കേരളം ഉത്ഭവിച്ചതും, മഹാവിഷ്ണു വാമനനായി മഹാബലിയെ പാതാളത്തിൽ താഴ്തുന്നതടക്കമുള്ള അവതരണം, വ്യത്യസ്തമായ കലാവിരുന്ന് ഏവരുടെയും പ്രശംസയും കയ്യടിയും നേടി.

മനസിൽ സ്‌നേഹത്തിന്റെ കുളിർമയും, സാഹോദര്യത്തിന്റെ നറുമണവും നിറയ്ക്കുന്ന തിരുവോണം ആടിപ്പാടിയും, പൂക്കളം തീർത്തു, ഒന്നിച്ചിരുന്നു സദ്യയുണ്ടും അടുത്ത ഓണനാളുകൾ വരുന്നതുവരെ മനസിൽ സൂക്ഷിക്കാനുള്ള നനുത്ത ഓർമ്മകളുമായാണ് പങ്കെടുത്തവർ പിരിഞ്ഞത്.