തിരുവനന്തപുരം:കെ.ജെ.യേശുദാസ് ദേശീയ പുരസ്‌കാരദാനചടങ്ങിന് പോകുന്നതിനിടെ തന്റെയൊപ്പം സെൽഫിയെടുക്കാൻ വന്ന ആരാധകന്റെ പക്കൽ നിന്ന് മൊബൈൽ വാങ്ങി സെൽഫി ഡിലീറ്റ് ചെയ്ത വീഡിയോ സോഷ്യൽ മീഡിയയിൽ വൈറലായിരുന്നു.ഗാനഗന്ധർവന്റെ പ്രവൃത്തിയെ അനുകൂലിച്ചും പ്രതികൂലിച്ചും പ്രതികരണങ്ങളുടെ പെരുമഴ തന്നെയുണ്ടായി. ഏതായാലും വിവാദം കത്തിപ്പടരുന്നതിനിടെ യേശുദാസിനൊപ്പം ചിത്രം എടുത്തിട്ടുള്ള അനൂപ് വർഗീസ് തനിക്കുണ്ടായ അനുഭവം വിവരിക്കുകയാണ്.

ഫേസ്‌ബുക്ക് പോസ്റ്റിലേക്ക്:

'സെൽഫി എടുത്ത ആരാധകനിൽ നിന്നും മൊബൈൽ ഫോൺ പിടിച്ചുവാങ്ങി ഫോട്ടോ ഡിലീറ്റ് ചെയ്ത യേശുദാസ് വിവാദത്തിൽ പെട്ടിരിക്കുന്ന സാഹചര്യത്തിൽ യേശുദാസിനോടൊപ്പം ചിത്രം എടുത്തിട്ടുള്ള ഒരാളെന്ന നിലയിൽ ഞാൻ എന്റെ അനുഭവം പങ്കുവെക്കാം.

ഒരു വർഷം മുൻപ് ദുബായ് വിമാനത്താവളത്തിൽ വച്ചാണ് ഞാൻ യേശുദാസിനെ കണ്ടു മുട്ടിയത് . യാത്ര സുഖമായിരുന്നോ എന്ന് ചോദിച്ചതിനു ശേഷം കൂടെ നിന്ന് ഫോട്ടോ എടുക്കാനുള്ള എന്റെ ആഗ്രഹം ഞാൻ പ്രകടിപ്പിച്ചു . എത്ര ചിത്രങ്ങൾ വേണമെങ്കിലും എടുത്തോ പക്ഷേ സെൽഫി വേണ്ട എന്ന് യേശുദാസ് പറഞ്ഞു. അതിന്റെ കാരണം തിരക്കിയ എന്നോട് യേശുദാസ് ഇങ്ങനെയാണ് പറഞ്ഞത് :

'' മനുഷ്യർ സമൂഹ ജീവികളാണ്. നമുക്ക് നമ്മുടെ സഹജീവികളുടെ സഹായവും സഹകരണവും ഇല്ലാതെ ജീവിക്കാൻ സാധിക്കില്ല . ഇന്നത്തെ തലമുറ അതിനൊന്നും ശ്രമിക്കാതെ ഓരോ തുരുത്തുകളായി ജീവിക്കുകയാണ് . ഒരു ഫോട്ടോ എടുക്കാൻ പോലും അവർ ആരുടേയും സഹായം തേടാറില്ല. അതുകൊണ്ട് തന്നെ സെൽഫി എടുക്കുന്നത് എനിക്ക് ഒട്ടും ഇഷ്ടമല്ല .''

വിമാനത്താവളത്തിൽ അധികം തിരക്കുണ്ടായിരുന്നില്ല . അതുകൊണ്ട് കുറച്ചു നേരം കാത്തു നിന്നതിന് ശേഷമാണ് ഫോട്ടോ എടുക്കാൻ ഒരാളെ കിട്ടിയത് . യേശുദാസ് തന്നെയാണ് ആളോട് ഒരു ഫോട്ടോ എടുക്കാൻ സഹായിക്കണമെന്ന് പറഞ്ഞത് .

ഫോട്ടോ എടുത്തതിനു ശേഷം കാൽ നൂറ്റാണ്ട് മുൻപ് ഞാൻ കോളേജിൽ പഠിക്കുമ്പോൾ ദാസേട്ടന്റെ തോളിൽ കൈ ഇട്ടെടുത്ത ചിത്രം കാണിച്ചപ്പോൾ ദാസേട്ടൻ ചിരിച്ചു .പ്രശസ്തരോ അപ്രശസ്തരോ ആരായാലും ശരി , കൂടെ നിന്ന് ഒരു ചിത്രം എടുക്കണമെങ്കിൽ അനുവാദം ചോദിക്കണം എന്നാണ് എന്റെ പക്ഷം.' .