സോഷ്യൽ മീഡിയയിലൂടെ സ്‌നേഹം നടിച്ചു 14കാരിയുമായി അടുത്തു; കടത്തിക്കൊണ്ടുപോയി പീഡിപ്പിച്ചു; വഴിയിൽ ഉപേക്ഷിച്ച് കടന്നു; യുവാവ് അറസ്റ്റിൽ

കുളത്തൂപ്പുഴ: സാമൂഹികമാധ്യമം വഴി പരിചയപ്പെട്ട പതിന്നാലുകാരിയെ സ്നേഹംനടിച്ച് കടത്തിക്കൊണ്ടുപോയി പീഡിപ്പിച്ചശേഷം വഴിയിൽ ഉപേക്ഷിച്ചുകടന്ന യുവാവിനെ പൊലീസ് പിടികൂടി. പെൺകുട്ടിയുടെ രക്ഷിതാക്കളുടെ പരാതിയെ തുടർന്ന് ചിതറ കൊച്ചുകലുങ്ക് ഷെമീർ മൻസിലിൽ ഷെമീറിനെ(32)യാണ് അറസ്റ്റ് ചെയ്തത്.

കുളത്തൂപ്പുഴ ഇൻസ്പെക്ടർ എൻ.ഗിരീഷിന്റെ നേതൃത്വത്തിൽ ഷെമീറിനെ വീട്ടിൽനിന്നു പിടികൂടുകയായിരുന്നു. തെളിവെടുപ്പിനുശേഷം കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. ഇയാളുടെ പേരിൽ ചിതറ, കടയ്ക്കൽ പൊലീസ് സ്റ്റേഷനുകളിൽ സമാന കേസുകളുള്ളതായി പൊലീസ് പറഞ്ഞു.