മലപ്പുറം: സ്വന്തം പേരിലെ യൂട്യൂബ് ചാനലിലെ സബ്‌സ്‌ക്രൈബേഴ്‌സ് 25 ലക്ഷത്തിന് മുകളിൽ. രാജ്യത്തെ തന്നെ ജനഹൃദയം കീഴടക്കിയ മലപ്പുറത്തെ കൊച്ചുഗായിക യുംന അജിന് എസ്.എസ്.എൽ.സി. പരീക്ഷയിൽ ഫുൾ എ പ്ലസ്. ഇന്ത്യയിലെ ഏറ്റവും പ്രമുഖ ടി.വി മ്യൂസിക്കൽ റിയാലിറ്റിഷോയായ സീ.ടി.വിയിലെ സരിഗമപ ലിറ്റിൽ ചാമ്പ്യൻഷിപ്പിലൂടെ 2017ൽ രാജ്യത്തെ തന്നെ ജനഹൃദയം കീഴടക്കിയ കൊച്ചുമിടുക്കിയാണ് യുംന.

മലപ്പുറം വേങ്ങരക്കാരിയായ 16കാരിയായ യുംന അജിന്റെ ആരാധകരിൽ ഭൂരിഭാഗവും കേരളത്തിന് പുറത്തുള്ളവരാണെന്നതാണ് മറ്റൊരു കൗതുകം. ഇതിനിടെ ബോളിവുഡ് സിനിമയിൽ ഗാനം ആലപിക്കുകയും ചെയ്തുകഴിഞ്ഞു. ഹിന്ദിയിലും, അറബിയിലും യുംന പാടിയ ഗാനങ്ങൾ യഥാർഥ ഗായകരെ പോലും അത്ഭുതപ്പെടുത്തിയപ്പോൾ മലയാളികളിൽ ഇപ്പോഴും വേണ്ടത്ര പരിഗണന യുംനക്ക് ലഭിച്ചിട്ടില്ലെന്നതാണ് വാസ്തവം.

മൂന്നാംവയസ്സു മുതൽ തന്നെ സംഗീത ഷോകളിലൂടെ വിസ്മയം കാണിച്ചു തുടങ്ങിയ ഈ ഒമ്പതാംക്ലാസുകാരി കൈരളി ടിവിയിലെ കുട്ടിപ്പട്ടുറുമാലിലൂടെയാണ് സംഗീത രംഗത്തേക്ക് ചുവട് വച്ചത്. അന്ന് വയസ്സ് മൂന്നു വയസ്സുമാത്രമായിരുന്നു. പിന്നീട് 2015 ൽ പത്തുവയസ്സുള്ളപ്പോൾ സോണി ടി.വിയിലെ ഇന്ത്യൻ ഐഡോൾ ജൂനിയറിലും പങ്കെടുത്തു.

ഇന്ന് യുംന സംഗീതവേദികളിലും ആൽബങ്ങളിലും യൂട്യൂബിലും ഒരുപോലെ മികവുറ്റ പ്രകടനം കാഴ്‌ച്ചവെച്ച് മുന്നേറുകയാണ. 25ലക്ഷം കവിഞ്ഞ യൂട്യൂബ് ചാനലിന്റെ ഉടമകൂടിയാണ് ഈ കൊച്ചുമിടുക്കി. ഇന്ന് യൂട്യൂബ് ചാനലിൽ നിന്നും വരുമാനം ലഭിക്കുന്നുണ്ട്. യൂട്യൂബ് ചാനലിലേക്ക് മാത്രമാണ് ആഴ്ചയിൽ പുതിയ പാട്ടുകൾ അപ്ലോഡ് ചെയ്യാനും ശ്രദ്ധിക്കാറുണ്ട്. യൂട്യൂബ് ചാനലിലൂടെയാണ് ഇപ്പോൾ യുംന തിളങ്ങുന്നത്. ഇതിലെ ഫോളോവേഴ്‌സിൽ ഭൂരിഭാഗവും കേരളത്തിന് പുറത്തുനിന്നുള്ളവരാണ്.

ഇന്ത്യയിലും വിദേശത്തുമായി ആയിരത്തിലധികം വേദികളിൽപാടിക്കഴിഞ്ഞു. ഇംഗ്ലീഷ്, ഹിന്ദി, തമിഴ്, മലയാളം, അറബി ഭാഷകളിലെ പോപ്, ക്ലാസിക്കൽ, ബോളിവുഡ്, ഫോക്ക്, ഗസൽ, സൂഫി തുടങ്ങിയ എല്ലാ സംഗീത ശാഖകളിലേയും പാട്ടുകളും യുംന അനായാസം പാടും.
ഇന്ത്യയിലെ സംഗീത റിയാലിറ്റി ഷോ ആയ സീ ടിവി സരിഗമപ ലിറ്റിൽ ചാംമ്പ്യൻഷിപ്പിൽ 2017 -ലെ റണ്ണർ അപ്പ് കരസ്ഥമാക്കിയ ഈ യുവ ഗായിക അന്ന് മൊത്തം 40 സിംഗിൾ പാട്ടുകൾ പാടിയപ്പോൾ 28 എണ്ണത്തിനും 100 മാർക്ക് വാങ്ങി. ഇത് യുംനക്ക് മാത്രം അവകാശപ്പെട്ടതായിരുന്നു. ഇതിന് പ്രത്യേക പുരസ്‌കാരവും യുംനക്ക് ലഭിച്ചിരുന്നു. പ്രേക്ഷകരുടെ വോട്ടുകളുടെ അടിസ്ഥാനത്തിൽ വിജയിയെ കണ്ടെത്തിയപ്പോൾ കേരളക്കാരിയായ ഈ കൊച്ചുമിടുക്കിയെ വേണ്ട രീതിയിൽ നമ്മൾ മലയാളികൾ ശ്രദ്ധിക്കാതെ പോയതും തിരിച്ചടിയായി.

ഹിന്ദി റിയാലിറ്റി ഷോകളിൽ പങ്കെടുത്ത് കരുത്തു തെളിയിച്ച മലയാളികൾ കുറവാണ്. എന്നാൽ, ഉത്തരേന്ത്യക്കാർ കൈയടക്കിയ ഈ വേദികളിൽ വീറോടെ പോരോടി വിജയം വരിച്ചവരുടെ കൂട്ടത്തിൽ എടുത്തുകാണിക്കാവുന്ന പേര് യുംനയുടേത് തന്നെയാണ്. സംഗീത ചക്രവർത്തി സാക്ഷാൽ എ ആർ റഹ്മാന് മുന്നിൽ ഗാനം ആലപിച്ച് അദ്ദേഹത്തിന്റെ കൈയടി നേടാനും സാധിച്ചു യുംനക്ക്. റഹ്മാന് ഓസ്‌കാർ അവാർഡ് നേടിക്കൊടുത്ത ജയ്ഹോ ഗാനം ആലപിച്ചാണ് യുംന പ്രശംസ നേടിയത്. റഹ്മാനും യുംനയുടെ മുന്നോട്ടുള്ള പ്രയാണത്തിന് എല്ലാ വിധ പ്രോത്സാഹനവും നൽകി.

പാട്ടിനു ശേഷം വിശേഷങ്ങൾ തിരക്കി റഹ്മാൻ മിടുക്കി ആയി വരട്ടെയെന്ന് അനുഗ്രഹിക്കുകയും ചെയ്തു അദ്ദേഹം. ഗസൽ, ഹിന്ദി ക്ളാസിക്കൽ, പാശ്ചാത്യ സംഗീതം എന്നീ വിഭാഗങ്ങളിലും വളരെയേറെ മികവാണ് യുംന പുലർത്തുന്നത്. ബോളിവുഡ് താരങ്ങളും മറ്റും അതിഥിയായിവന്നിരുന്ന സംഗീത ഷോയിൽ സൽമാൻ ഖാൻ അടക്കമുള്ള പ്രമുഖർക്ക് മുമ്പിൽ സങ്കോചങ്ങൾ ഏതുമില്ലാതെ യുംന പാട്ടുകൾ പാടുകയും ഇവരുടെ അഭിനന്ദനങ്ങളും ഈ മലപ്പുറത്തുകാരി കൊച്ചു മിടുക്കി സ്വന്തമാക്കി.

മലപ്പുറം വേങ്ങര സ്വദേശിനിയായ യുംന തിരൂർ ഫാത്തിമമാതാ സ്‌കൂൾ വിദ്യാർത്ഥിനിയാണ്. പാട്ടിൽ മിടുക്കിയായ യുംനയ്ക്ക് മാതാപിതാക്കൾ എല്ലാ വിധ പിന്തുണയും നൽകുന്നുണ്ട്. പിതാവ് അജിൻ ബാബുഎവിടേക്കാണെങ്കിലും യുംനയുടെ കൂടെയുണ്ടാകും. സഹോദരിയും ഏഴാംക്ലാസുകാരിയുമായ സെല്ല മെഹകും ഇപ്പോൾ ഒരു ഗായികയായിമാറിയിട്ടുണ്ട്. സഹോദരി റിത്യ അജിനും ബി.എസ്.സി നഴ്‌സിങ് വിദ്യാർത്ഥിയായിരുന്നു.

ജംഷാദ് മലപ്പുറം

    മറുനാടന്‍ മലയാളി ന്യൂസ് കോണ്‍ട്രിബ്യൂട്ടര്‍