ഇന്ത്യൻ ക്രിക്കറ്റ് ടീം അംഗങ്ങൾക്ക് വിവാഹ തിരക്കാണ്. ഹർഭജനു പുറകെ യുവരാജ് സിങ് വിവാഹിതനാവാൻ പോകുന്നതായി വാർത്ത. വിവാഹം അടുത്തവർഷം ഫെബ്രുവരിയിൽ ഉണ്ടാകുമെന്നാണ് സൂചന. ബോളിവുഡ് താരവും മോഡലുമൊക്കെയായ ഹസെൽ കീച്ചാണ് യുവരാജിന്റെ വധു. ഇരുവരും പ്രണയത്തിലാണെന്ന വാർത്തകൾ നേരത്തെ പുറത്തുവന്നിരുന്നു. 

ദിവസങ്ങൾക്ക് മുമ്പ് യുവരാജിന്റെ സഹതാരവും ബൗളറുമായ ഹർഭജന്റെ വിവാഹം നടന്നിരുന്നു. തുടർന്ന് ഇരുവരും ട്വിറ്ററിൽ നടത്തിയ സംഭാഷണത്തിൽ താൻ ഉടൻ വിവാഹിതനാകുമെന്ന സൂചന യുവി നൽകിയിരുന്നു.ഡിസംബർ 13ന് തന്റെ 34ാം പിറന്നാളിന് ശേഷം വിവാഹിതനാകാനാണ് യുവിയും ഹസെലും തീരുമാനിച്ചതായി റിപ്പോർട്ടുകൾ മുമ്പ് പുറത്തുവന്നിരുന്നു.

എന്നാൽ യുവരാജിന്റെ അടുത്ത ബന്ധുവിന്റെ മരണംമൂലം ഉടനെ ആഘോഷങ്ങളൊന്നും വേണ്ടെന്നും വിവാഹം രണ്ട് മാസങ്ങൾക്ക് ശേഷം മതിയെന്നും തീരുമാനിക്കുകയായിരുന്നു. ഇക്കാര്യം യുവരാജ് ഉടൻ വെളിപ്പെടുത്തിയേക്കും. ബ്രിട്ടീഷ് മോഡലായ ഹസെൽ ബോഡീഗാർഡ്, ബില്ല തുടങ്ങിയ ബോളിവുഡ് ചിത്രങ്ങളിൽ മുഖ്യ വേഷത്തിലെത്തിയിരുന്നു