ബസ് ബോർഡിൽ കൊളുത്തിവലിച്ചു; ഷോപ്പിങ് കോംപ്ലക്‌സിന്റെ കോൺക്രീറ്റ് തകർന്നുവീണു; വഴിമാറിയത് വൻദുരന്തം

കോതമംഗലം: നഗരമധ്യത്തിൽ മുനിസിപ്പൽ ഷോപ്പിങ് കോംപ്ലക്‌സിന്റെ കോൺക്രീറ്റ് പാരപ്പറ്റ് (അരഭിത്തി) തകർന്നുവീണു. താഴെയുണ്ടായിരുന്നവർ ശബ്ദം കേട്ട് ഓടിമാറിയതിനാൽ അപകടമുണ്ടായില്ല. മുനിസിപ്പൽ ബസ് സ്റ്റാൻഡിൽ നിന്നു ബസ് ആലുവമൂന്നാർ റോഡിലേക്ക് ഇറങ്ങുന്നിടത്ത് ഇന്നലെ രാവിലെ പത്തോടെയാണു സംഭവം.

ഷോപ്പിങ് കോംപ്ലക്‌സിലെ വ്യാപാര സ്ഥാപനത്തിന്റെ ബോർഡിൽ സ്റ്റാൻഡിൽ നിന്നിറങ്ങിയ ബസിനു മുകളിലെ കാരിയറിന്റെ കമ്പി കൊളുത്തിവലിച്ചതിനാൽ ബോർഡ് ഉറപ്പിച്ചിരുന്ന ഭാഗത്തെ കോൺക്രീറ്റ് അടർന്നുവീഴുകയായിരുന്നു. തൊട്ടടുത്ത ബസ് സ്റ്റാൻഡ് ഷോപ്പിങ് കോംപ്ലക്‌സിലും കാലപ്പഴക്കം മൂലം അടുത്തിടെ കോൺക്രീറ്റ് പൊളിഞ്ഞുവീണിരുന്നു.