ഇരിട്ടി: ഇരിട്ടി പുഴയിൽ വീണ് യുവാവ് മരിച്ചു. പേരാവൂർ തെറ്റുവഴി വേക്കളത്ത കോട്ടായി ഗണേശനാ(41) ണ് ഇരിട്ടി പുഴയിൽ വീണ് മരിച്ചത്. ബുധനാഴ്ച വൈകിട്ടാണ് സംഭവം. പുഴയിലൂടെ ഒരാൾ ഒഴുകിവരുന്നത് കണ്ട ഫാസിര എന്നയാൾ വിവരം അറിയിച്ചതിനെതുടർന്ന് ഇരിട്ടി പൊലീസും ഫയർഫോഴ്‌സും പാലത്തിനു സമീപത്തും തന്നോടും തിരച്ചിൽ നടത്തുന്നതിന് ഇടയിലാണ് തന്തോട് ജംഗ്ഷനു സമീപത്തുള്ള പുഴയിലൂടെ ഗണേശൻ ഒഴുകി വരുന്നത് കണ്ടത്.

ഇയാളെ ഏറെ നേരത്തെ ശ്രമഫലമായി കരക്കെത്തിച്ചെങ്കിലും ജീവൻ രക്ഷിക്കാനായില്ല.വർഷങ്ങളായി കടത്തു കടവിൽ താമസിച്ച് റബ്ബർ ടാപ്പിങ് നടത്തിവരികയായിരുന്നു. മൃതദേഹം പരിയാരം മെഡിക്കൽ കോളേജാസ്പത്രി മോർച്ചറിയിലേക്ക് മാറ്റി. വേക്കളത്തെ പരേതരായ പുലപ്പാടി കൃഷ്ണന്റെയും കുഞ്ഞിമാതയുടെയും മകനാണ് അവിവാഹിതനായ ഗണേശൻ. സഹോദരങ്ങൾ: കാർത്ത്യായനി, ജനാർദ്ദനൻ.