കാസർകോട് പാണത്തൂരിൽ തടി ലോറി മറിഞ്ഞു; നാല് പേർക്ക് ദാരുണാന്ത്യം; അഞ്ച് പേർക്ക് പരിക്ക്

 കാസർകോട്: കാസർകോട് പാണത്തൂരിൽ തടി കയറ്റി വരികയായിരുന്ന ലോറി മറിഞ്ഞ് നാല് പേർ മരിച്ചു. ഒൻപത് പേരാണ് ലോറിയിൽ ഉണ്ടായിരുന്നത്.

ലോറിയിലുണ്ടായിരുന്നവരെല്ലാം കുണ്ടൂപ്പള്ളി സ്വദേശികളാണെന്നാണ് പ്രാഥമിക വിവരം. വലിയ വളവിൽ മുന്നോട്ട് പോകാൻ കഴിയാതെ നിന്ന ലോറി പെട്ടെന്ന് തന്നെ നിയന്ത്രണം നഷ്ടമായി മറിയുകയായിരുന്നു. സമീപത്തെ വീടിന്റെ ഷീറ്റുകൾ തകർത്ത ലോറി കനാലിലേക്കാണ് മറിഞ്ഞത്.

രാജപുരം പൊലീസും അഗ്‌നിശമന സേനയും നാട്ടുകാരും ചേർന്നാണ് രക്ഷാപ്രവർത്തനം നടത്തിയത്. അപകടത്തിൽ മരിച്ച നാല് പേരും ലോറിയുടെ അടിയിൽ കുടുങ്ങുകയായിരുന്നു. പരിക്കേറ്റവരെ ഉടൻ തന്നെ ആശുപത്രിയിൽ പ്രവേശിപ്പിച്ചു