കൊല്ലം: എംസി റോഡിൽ കൊട്ടാരക്കര പൊലിക്കോട്ട് യുവാക്കളുടെ ബൈക്ക് അഭ്യാസ പ്രകടനത്തിനിടെ അപകടം. അമിത വേഗത്തിൽ ഓടിച്ച ബൈക്കിൽ നിന്ന് സെൽഫി എടുക്കാൻ ശ്രമിക്കുന്നതിനിടെയാണ് അപകടമുണ്ടായത്. രാവിലെ 11.30യോടെയായിരുന്നു സംഭവം.
നൂറ് കിലോമീറ്ററിലേറെ വേഗത്തിൽ പാഞ്ഞ ബൈക്കിലിരുന്ന് സെൽഫിയെടുക്കാനുള്ള യുവാവിന്റെ ശ്രമമാണ് അപകടത്തിൽ കലാശിച്ചത്. ന്യൂജൻ ബൈക്കുകാരന്റെ വാഹനം നിയന്ത്രണം വിട്ട് എതിർദിശയിൽ വന്ന എംബിഎ വിദ്യാർത്ഥി അശ്വന്ത് കൃഷ്ണന്റെ ബുള്ളറ്റിൽ ഇടിക്കുകയായിരുന്നു.

ഗുരുതരമായി പരുക്കേറ്റ അശ്വന്തിനെ തിരുവനന്തപുരത്തെ സ്വകാര്യ ആശുപത്രിയിലേക്ക് മാറ്റി. നമ്പർ പ്ലേറ്റ് പോലുമില്ലാതെയാണ് നാല് യുവാക്കൾ ന്യൂജൻ ബൈക്കുകളിൽ തിരുവനന്തപുരം ഭാഗത്തു നിന്ന് പത്തനംതിട്ട ഭാഗത്തേക്ക് യാത്ര ചെയ്തത്. ഒരു ബൈക്ക് അപകടത്തിൽ പെട്ടതോടെ മറ്റ് മൂന്നു പേരും ബൈക്കുമായി മുങ്ങി. സമീപത്ത് ഒളിപ്പിച്ച നിലയിൽ ഒരു ബൈക്ക് കണ്ടെത്തി. മറ്റ് ബൈക്കുകൾക്കായി അന്വേഷണം തുടരുകയാണ്.

അമിത വേഗതയിൽ സഞ്ചരിച്ചിരുന്ന യുവാക്കൾ ആയൂരിൽ വച്ച് പൊലീസിനെ വെട്ടിച്ച് കടന്നതിന് പിന്നാലെയാണ് അപകടം ഉണ്ടായത്. പത്തനംതിട്ട സ്വദേശികളാണ് ബൈക്ക് അഭ്യാസത്തിനെത്തിയതെന്നാണ് നിഗമനം. ഇവരെ കണ്ടെത്താൻ അന്വേഷണം തുടരുകയാണ്.

മറുനാടന്‍ മലയാളി

    മറുനാടന്‍ മലയാളി ബ്യൂറോ