ഉത്തർപ്രദേശിൽ അംബേദ്​കർ പ്രതിമക്ക് നേരേ ആക്രമണം; അക്രമത്തിന്​ പിന്നിൽ സാമൂഹിക വിരുദ്ധരെന്ന് അധികൃതർ

ബലിയ: ഉത്തർപ്രദേശിലെ ബലിയയിൽ അംബേദ്​കറുടെ പ്രതിമക്ക് നേരേ ആക്രമണം. അംബേദ്​കറുടെ പ്രതിമ കേടുപാടുകൾ വരുത്തിയ നിലയിൽ കണ്ടെത്തിയതിന് പിന്നാലെ പ്രദേശത്തെ ദളിത്​ സമുദായം പ്രതിഷേധവുമായെത്തി. എത്രയും വേഗം പുതിയ പ്രതിമ സ്​ഥാപിക്കുമെന്ന്​ മജിസ്​ട്രേറ്റും പൊലീസ്​ ഉദ്യോഗസ്​ഥരും ഉറപ്പുനൽകിയതിനെ തുടർന്നാണ്​ പ്രതിഷേധം അവസാനിപ്പിച്ചത്​.

സാമൂഹിക വിരുദ്ധരാണ്​ അക്രമത്തിന്​ പിന്നിലെന്ന്​ സബ്​ ഡിവിഷനൽ മജിസ്​ട്രേറ്റ്​ സർവേശ്​ യാദവ്​ പറഞ്ഞു. അം​ബേദ്​കർ കമ്മിറ്റി പ്രസിഡൻറ്​ സുനിൽ കുമാറി​ന്റെ പരാതിയിൽ അജ്ഞാതരായ ആക്രമികൾക്കെതിരെ ഭീം പുര പൊലീസ്​ കേസ്​ എടുത്തതായി സൂപ്രണ്ട്​ സഞ്​ജയ്​ യാദവ്​ അറിയിച്ചു. കഴിഞ്ഞ വർഷം ഡിസംബറിൽ ജില്ലയിലെ സിക്കന്ദർപുർ മേഖലയിലും അംബേദ്​കർ പ്രതിമ കേടുപാടുകൾ വരുത്തിയനിലയിൽ കണ്ടെത്തിയിരുന്നു.