കണ്ണൂർ: ഇരിട്ടിയിലെ തില്ലങ്കേരിയിൽ വാഹന പരിശോധനക്കിടെ തില്ലങ്കേരിയിൽ തിമിംഗല ഛർദ്ദിലു (ആംബർ ഗ്രീസ്)മായി യുവാവിനെ പൊലീസ് പിടികൂടി. തില്ലങ്കേരി അരിച്ചാൽ സ്വദേശി ദിൻരാജിനെയാണ് മുഴക്കുന്ന് പൊലീസ് പിടികൂടിയത്. ഇയാൾക്കൊപ്പമുണ്ടായിരുന്ന രണ്ടുപേർ കാറുമായി രക്ഷപ്പെട്ടു. സ്ഥിരം നടത്തിവെരുന്ന വാഹന പരിശോധനയ്ക്കിടെയാണ് തിമിംഗലത്തിന്റെ ഛർദ്ദിൽ പൊലീസിന് പിടികൂടാനായത്.
മുഴക്കുന്ന് പ്രിൻസിപ്പൽ എസ് ഐ എൻ.സി. രാഘവന്റെ നേതൃത്വത്തിൽ പൊലീസ് നടത്തിയ വാഹനപരിശോധനക്കിടെയാണ് ദിൻരാജ് രണ്ട് കിലോവിലധികം വരുന്ന തിമിംഗല ഛർദ്ദിൽ എന്നറിയപ്പെടുന്ന ആംബർ ഗ്രീസുമായി പിടിയിലാകുന്നത്. ഇയാൾ സഞ്ചരിച്ച ആൾട്ടോ കാറിൽ ബാഗിനുള്ളിൽ പ്ലാസ്റ്റിക് കവറിൽ സൂക്ഷിച്ച നിലയിലായിരുന്നു ഇത് ഉണ്ടായിരുന്നത്. കാറിൽ നിന്നും ഇറങ്ങി ഓടാൻ ശ്രമിച്ച പ്രതിയെ പൊലീസ് ഓടിച്ചിട്ട് പിടിക്കുകയായിരുന്നു.
ഇതിനിടയിൽ ദിൻരാജിനൊപ്പമുണ്ടായിരുന്ന മറ്റ് 2 പേർ കാറുമായി രക്ഷപ്പെട്ടു. ഇവർ ഉളിയിൽ സ്വദേശി അഷ്‌റഫും സുഹൃത്തുമാണെന്ന് തിരുവിച്ചറിഞ്ഞിട്ടുണ്ട്. തില്ലങ്കേരിയിലെ സരീഷിനായി കൊണ്ടുപോവുകയായിരുന്നു. പിടികൂടിയ വസ്തുവിന് വിപണിയിൽ ഇതിന് 2 കോടിയിലധികം രൂപ വിലവരുമെന്നാണ് പൊലീസ് പറയുന്നത്.
ഇന്ത്യയിൽ നിലവിലുള്ള 1972 ലെ വന്യജീവി നിയമപ്രകാരം ഇതിന്റെ വിൽപ്പന നിരോധിച്ചിട്ടുണ്ട്. വന്യജീവി സംരക്ഷണ നിയമത്തിലെ സെക്ഷൻ 44 പ്രകാരം ഇത് രാജ്യത്തെവിടെ വില്പനനടത്തുന്നതും കൈവശം വെക്കുന്നതും കുറ്റകരമാണ്. തിമിംഗലങ്ങളുടെ കുടലിൽ ദഹന പ്രക്രിയകളിലൂടെ രൂപപ്പെടുന്ന പ്രകൃതിദത്ത ഉത്പന്നമാണ് തിമിംഗല ഛർദ്ദിഎന്നറിയപ്പെടുന്ന ആംബർ ഗ്രീസ്. സുഗന്ധ വസ്തുക്കൾ നിർമ്മിക്കുന്നതിനായി ഉപയോഗിക്കുന്ന ഇതിന് വിപണിയിൽ ലക്ഷങ്ങളാണ് വില.
മുഴക്കുന്ന് സെക്ഷൻപ്രിൻസിപ്പൽ എസ് ഐ എൻ. സ രാഘവനെ കൂടാതെ എസ് ഐ എം. ജെ. സെബാസ്റ്റ്യൻ, എ എസ് ഐ ജയരാജൻ, സിവിൽ പൊലീസ് ഓഫീസർ സന്തോഷ് എന്നിവരുടെ നേതൃത്വത്തിലാണ് വാഹന പരിശോധന നടത്തിയത്. പ്രതി ദിൻരാജിനെ മട്ടന്നൂർ കോടതി 17 വരെ റിമാൻഡ് ചെയ്തു. വനം വകുപ്പാണ് ഇതിന്റെ തുടരന്വേഷണം നടത്തേണ്ടത്. പൊലീസ് നടപടികൾക്ക് ശേഷം പിടികൂടിയ അംബർഗ്രീസും മറ്റും വനംവകുപ്പിന് കൈമാറി.
