പത്തനംതിട്ട: സാധാരണക്കാരൻ ഒരു ലക്ഷം രൂപ വായ്പ ചോദിച്ചാൽ അത്രയും തന്നെ രേഖകൾ ചോദിച്ച് രണ്ടുലക്ഷം തവണ നടത്തി ഒടുവിൽ വായ്പയില്ലെന്ന് പറഞ്ഞു വിടുന്നതാണ് നമ്മുടെ നാട്ടിലെ ബാങ്കുകാരുടെ രീതി. അത് ദേശസാൽകൃതമായാലും സഹകരണബാങ്കായാലും അങ്ങനെ തന്നെ. എന്നാൽ വെറുമൊരു വ്യാജരേഖ കാട്ടി ബിജു മാത്യുവെന്ന അമേരിക്കൻ മലയാളി ഇതേ ബാങ്കുകളിൽനിന്ന് തട്ടിയെടുത്തത് 18.50 കോടി. ഇതിന്റെ പലിശ കൂടി കണക്കാക്കിയാൽ മൊത്തം തട്ടിപ്പ് 23 കോടിയെന്ന് വായിക്കാം. ബിജു ബാങ്ക് മാനേജർമാരെ മണ്ടനാക്കിയെന്ന് പൊലീസ് തീർത്തും വിശ്വസിക്കുന്നില്ല. തട്ടിപ്പിന് കുടപിടിച്ച ബാങ്ക് മാനേജർമാരും കുടുങ്ങും. അല്ലെങ്കിൽ പിന്നെ ചുമ്മാതൊരുത്തൻ ചെന്നുചോദിക്കുമ്പോൾ കോടികൾ എടുത്തു വീശാൻ കഴിയില്ലല്ലോ?

സംസ്ഥാനത്തിന് അകത്തും പുറത്തുമായി വ്യാജ ആധാരങ്ങൾ ചമച്ച് അഞ്ചു ബാങ്കുകളെ കബളിപ്പിച്ചാണ് കോഴഞ്ചേരി നാനാവീട്ടിൽ പുത്തൻപറമ്പിൽ ബിജു മാത്യു ഏബ്രഹാം (43) 18.50 കോടി തട്ടിയെടുത്തത്. റാന്നി സ്വദേശി എം.കെ. ജോയി നൽകിയ പരാതിയുടെ അടിസ്ഥാനത്തിലാണ് അറസ്റ്റ്. ഞെട്ടിപ്പിക്കുന്ന തട്ടിപ്പിന്റെ ചുരുളഴിച്ചുവന്നപ്പോൾ പൊലീസിന് മുന്നിൽ പരാതിക്കാരൻ ജോയിയും വായ്പ നൽകിയ ബാങ്കുകളുടെ മാനേജർമാരും സംശയിക്കപ്പെടുന്നവരാണ്. പൊലീസ് പറയുന്ന തട്ടിപ്പ് കഥകളിൽ ഒരു പാട് ലൂപ്‌ഹോളുകളുണ്ട്. ഇണങ്ങാത്ത കണ്ണികളാണ് ഏറെയും. 18.50 കോടി തട്ടിച്ച കണക്ക് പൊലീസ് പറയുമ്പോൾ തന്നെ അതൊക്കെ എങ്ങനെ, ഇത്രയും കാലം ഇതെങ്ങനെ രഹസ്യമായി ഇരുന്നു, ബാങ്കുകളുടെ ലീഗൽ സെൽ പരിശോധിക്കാതെ വൻ തുക വായ്പ കിട്ടിയത് എങ്ങനെ എന്നീ ചോദ്യങ്ങൾക്കും ഉത്തരമില്ല.

കർണാടക കൂർഗ് മടുക്കേരി എസ്.ബി.ഐ ബ്രാഞ്ചിൽ നിന്ന് 14 കോടി, പത്തനംതിട്ട ജില്ലാ സഹകരണ ബാങ്കിൽ നിന്ന് ഒരു കോടി, കോഴഞ്ചേരി എസ്.ബി.ടി ശാഖയിൽ നിന്ന് 53 ലക്ഷം, പത്തനംതിട്ട കോർപ്പറേഷൻ ബാങ്കിൽ നിന്ന് 3.50 കോടി, കോട്ടയം എച്ച്.ഡി.എഫ്.സി ബാങ്കിൽ നിന്ന് 50 ലക്ഷം എന്നിങ്ങനെയായിരുന്നു ബിജു തട്ടിച്ചെടുത്തത്.

അമേരിക്കയിലായിരുന്നു ബിജു തട്ടിപ്പിന്റെ ബാലപാഠംപഠിച്ചത്. എട്ടുവർഷമാണ് ഇയാൾ അമേരിക്കയിൽ ഉണ്ടായിരുന്നത്. അവിടെയും ഭൂപണയ തട്ടിപ്പ് നടത്തിയാണ് ഇയാൾ അകത്തു പോയത്. പിന്നീട് ജാമ്യത്തിൽ ഇറങ്ങി മുങ്ങിയ ബിജു ഇന്ത്യയിൽ എത്താനും വളഞ്ഞ വഴിയാണ് സ്വീകരിച്ചത്. കാഠ്മണ്ഡുവിൽ വിമാനമിറങ്ങിയ ബിജു അവിടെ നിന്ന് റോഡ് മാർഗം ഇന്ത്യയിലേക്ക് കടന്നു. തട്ടിപ്പിനുള്ള താവളം കോട്ടയമാക്കി മാറ്റുകയായിരുന്നു പിന്നീട്. ഒരു പഞ്ചാബി വനിതയെ വിവാഹം കഴിച്ച് ഇവിടെ തന്നെ കൂടിയ ബിജുവിന്റെ പുതിയ തട്ടിപ്പ് വസ്തു ബ്രോക്കറുടെ റോളിലായിരുന്നു.

ബാങ്കുകൾ ജപ്തിക്ക് വയ്ക്കുന്നതോ കേസിൽപ്പെട്ടതോ ആയിട്ടുള്ള കണ്ണായ സ്ഥലങ്ങൾ വിലയ്ക്കു വാങ്ങാമെന്നോ സംയുക്തമായി കൃഷി ഇറക്കാമെന്നോ പറഞ്ഞ് ഇരകളെ വീഴ്‌ത്തും. ഇതിനായി കരാറും തയാറാക്കും. ഇങ്ങനെ തയാറാക്കുന്ന കരാറിൽ കാണുന്ന രണ്ടാം കക്ഷിയുടെ ഒപ്പ് സ്‌കാൻ ചെയ്ത് കമ്പ്യൂട്ടറിലാക്കും. പിന്നെ മുദ്രപത്രത്തിലേക്ക് വിൽപനക്കരാർ തയാറാക്കി കമ്പ്യൂട്ടറിൽ സൂക്ഷിച്ചിരിക്കുന്ന ഒപ്പ് അതിലേക്ക് പ്രിന്റും ചെയ്യും. ഇങ്ങനെ വ്യാജമായി തയാറാക്കിയ കരാറുമായി ബാങ്കിനെ വായ്പയ്ക്കായി സമീപിക്കും. ബിജുവിന്റെ നടപ്പും എടുപ്പും കണ്ട് വിശ്വസിക്കുന്ന മാനേജർമാർ ഇയാളുടെ വാക്ചാതുരിയിൽ മയങ്ങി വൻതുക തന്നെ വായ്പ നൽകിയെന്നാണ് പൊലീസ് പറയുന്നത്. വായ്പ കൈയിൽ കിട്ടിയാൽ പിന്നെ ബിജുവിന്റെ പൊടിപോലുമുണ്ടാകില്ല കണ്ടുപിടിക്കാൻ.

ഇപ്പോൾ അറസ്റ്റിന് കാരണമായ പരാതിക്കാരനായ ജോയിയുടെ കുമളിയിലുള്ള 48 ഏക്കറിന്റെയും ഇദ്ദേഹം പാട്ടത്തിനെടുത്ത 75 ഏക്കറിന്റെയും വ്യാജ ആധാരം ഉണ്ടാക്കിയാണ് എസ്.ബി.ഐ മടുക്കേരി ബ്രാഞ്ചിൽ നിന്നും 18.50 കോടി രൂപ വായ്പയ്ക്ക് അപേക്ഷിച്ചത്. 14 കോടി ബാങ്ക് അനുവദിച്ചു. ഇതിനായി ബിജു വ്യാജരേഖയാണ് സമർപ്പിച്ചതെന്ന് തനിക്ക് അറിയില്ലായിരുന്നുവെന്ന് ജോയി പറയുന്നു. ജോയിയുടെ ഈ മൊഴിയാണ് പൊലീസിന് സംശയത്തിന് വഴി നൽകുന്നത്. ഒരു ഈടുമില്ലാതെ ബിജുവിന് 14 കോടി വായ്പ കിട്ടിയെന്ന് വിശ്വസിക്കാനും മാത്രം മണ്ടനായിരുന്നില്ല വ്യവസായിയായ ജോയി. മാത്രവുമല്ല, ജോയിക്ക് പത്തനംതിട്ട യുക്കോ ബാങ്ക് ശാഖയിൽ ഏഴു കോടി രൂപയുടെ ബാധ്യതയുമുണ്ടായിരുന്നു.

വായ്പ കിട്ടിയ 14 കോടിയിൽ 6.75 കോടി രൂപ ജോയിക്ക് ബാധ്യത തീർക്കുന്നതിന് ബിജു നൽകി. യൂക്കോ ബാങ്കിന്റെ പത്തനംതിട്ട ശാഖയിലെ ജോയിയുടെ അക്കൗണ്ടിലാണ് തുക നിക്ഷേപിച്ചത്. പിന്നീട്, ഇദ്ദേഹത്തിന്റെ കടങ്ങൾ ഒറ്റത്തവണ തീർപ്പാക്കലിൽ അവസാനിപ്പിക്കാനാണെന്ന് പറഞ്ഞ് ഒപ്പിട്ടു വാങ്ങിയ രണ്ടുചെക്ക് ലീഫുകൾ ഉപയോഗിച്ച് ഈ പണം ബിജു അന്നു തന്നെ മാറിയെടുത്തുവെന്നും ജോയി പറയുന്നു. ഇതും സംശയത്തിനിട നൽകുന്നു. ഇത്രയും വലിയ തുക ഒരിക്കലും ബാങ്കുകാർ ക്രോസ് ചെക്ക് ചെയ്യാതെ നൽകില്ല. ഒന്നുകിൽ മാനേജരുടെ സഹായം ഇതിനുണ്ടാകണം. രണ്ടാമതായി പണം അക്കൗണ്ടിൽ നിന്ന് പിൻവലിച്ചപ്പോൾ തന്റെ മൊബൈൽ ഫോണിലേക്ക് ബാങ്കിന്റെ സന്ദേശം വന്നിരുന്നില്ലെന്നും ജോയി പറയുന്നു. മൊബൈൽ സന്ദേശം ബാങ്കിന്റെ കേന്ദ്രസെർവറിൽ നിന്നു പുറപ്പെടുന്നതാണ്. ഇതു തടയാൻ ലോക്കൽ ബ്രാഞ്ച് മാനേജർമാർക്ക് കഴിയുമോയെന്നും പൊലീസ് പരിശോധിച്ചു വരികയാണ്.

ബാധ്യത തീർന്നുവെന്ന് വിശ്വസിച്ചിരുന്ന ജോയിക്ക് വായ്പാ കുടിശിക അടയ്ക്കാനുള്ള നോട്ടീസ് വന്നപ്പോഴാണ് തട്ടിപ്പ് മനസിലായത്. പരാതി ലഭിച്ചതിനെ തുടർന്ന് പൊലീസ് മടുക്കേരി ബ്രാഞ്ചിൽ അന്വേഷിച്ചതിനു പിന്നാലെ രേഖകൾ മംഗലാപുരം ബ്രാഞ്ചിലേക്ക് മാറ്റുകയും ബാങ്ക് അന്വേഷണ കമ്മിഷനെ നിയോഗിക്കുകയും ചെയ്തു. 14 കോടി രൂപ ബാങ്ക് അനുവദിച്ചതിൽ ഒരു പൈസ പോലും തിരിച്ചടച്ചിരുന്നില്ല. ഇപ്പോൾ പലിശ സഹിതം 18.50 കോടി തിരിച്ചടയ്‌ക്കേണ്ടതായുണ്ട്. തിങ്കളാഴ്ച രാത്രിയിൽ കുമളിയിലെ എസ്റ്റേറ്റിൽ ബിജു എത്തിയെന്ന വിവരം അറിഞ്ഞ പൊലീസ് അവിടെയെത്തി. പൊലീസിനെ കണ്ട ബിജു ഓടി രക്ഷപ്പെടാൻ ശ്രമിച്ചു. പൊലീസ് ഇയാളെ ഓടിച്ചിട്ട് പിടികൂടുകയായിരുന്നു. ഇയാളുടെ കൈവശമുണ്ടായിരുന്ന ബാഗിൽ നിന്ന് നാല് വ്യാജ കരാറും 50 രൂപയുടെ മുതൽ 25000 രൂപയുടെ വരെയുള്ള 31 മുദ്രപത്രങ്ങളും ചെക്കുബുക്കുകളും ലഭിച്ചു.

കഴിഞ്ഞ ദിവസം കോഴഞ്ചേരിയിലെ വീട് പരിശോധിച്ച പൊലീസ് ബിജുവിന്റെ ഫോട്ടോ പതിച്ച വ്യാജ മേൽവിലാസത്തിലെ തെരഞ്ഞെടുപ്പ് തിരിച്ചറിയൽ കാർഡ്, ഡ്രൈവിങ് ലൈസൻസ് എന്നിവയും കണ്ടെടുത്തു. വ്യാജരേഖ ചമച്ചതിനും ഇയാൾക്കെതിരെ കേസ് രജിസ്റ്റർ ചെയ്തു. ഇയാളുടെ സഹോദരൻ ബൈജുവും സഹായിയും കേസിൽ പ്രതികളാണ്. ബാങ്കുകളിൽ നടന്ന ഇടപാടുകളിൽ ബാങ്ക് ജീവനക്കാരുടെ പങ്കിനെകുറിച്ചും അന്വേഷണം നടത്തുമെന്ന് സിഐ പറഞ്ഞു.

മഹാനവമി പ്രമാണിച്ച് ഓഫീസിന് അവധി ആയതിനാൽ നാളെ (വ്യാഴം) മറുനാടൻ മലയാളി അപ്‌ഡേറ്റ് ചെയ്യുന്നതല്ല- എഡിറ്റർ