വേദി സജ്ജം; മര്‍കസ് ഖുര്‍ആന്‍ ഫെസ്റ്റ് ഇന്ന് ആരംഭിക്കും;29 ക്യാമ്പസിലെ 800 വിദ്യാര്‍ഥികള്‍ മാറ്റുരക്കും
കോഴിക്കോട്: വിശുദ്ധ ഖുര്‍ആന്‍ പ്രമേയമായി നടക്കുന്ന കേരളത്തിലെ ഏറ്റവും വലിയ വൈജ്ഞാനിക മത്സരമായ മര്‍കസ് ഖുര്‍ആന്‍ ഫെസ്റ്റ്(എം.ക്വു.എഫ്) ഇന്ന് (വെള്ളി) ആരംഭിക്കും. വിശുദ്ധ ഖുര്‍ആന്റെ അവതീര്‍ണ പശ്ചാത്തലവും സന്ദേശവും വിളംബരം ചെയ്യുന്ന ചിത്രീകരണത്തോടെ കാരന്തൂരിലെ മര്‍കസ് കണ്‍വെന്‍ഷന്‍ സെന്ററില്‍ ഒരുക്കിയ വേദിയിലാണ് മൂന്നു ദിവസം നീണ്ടുനില്‍ക്കുന്ന മത്സരങ്ങള്‍ നടക്കുക.
മര്‍കസ് അക്കാദമി ഓഫ് ഖുര്‍ആന്‍ സ്റ്റഡീസിന്റെ ആഭിമുഖ്യത്തില്‍ സംഘടിപ്പിക്കുന്ന ഫെസ്റ്റിന്റെ രണ്ടാം എഡിഷനില്‍ കേരളത്തിലെ വിവിധ ജില്ലകളിലെ 29 ക്യാമ്പസുകളിലെ 800 വിദ്യാര്‍ഥികള്‍ മാറ്റുരക്കും. ഖുര്‍ആന്‍ പ്രമേയമായ 28 വ്യത്യസ്ത മത്സരങ്ങളാണ് ഫെസ്റ്റിന്റെ മുഖ്യ ആകര്‍ഷകം. ഖുര്‍ആന്‍ പാരായണത്തിലും മനഃപാഠത്തിലും പരിശീലിപ്പിക്കുകയും അന്താരാഷ്ട്ര ഹോളി ഖുര്‍ആന്‍ അവാര്‍ഡ് മത്സരങ്ങളിലേക്ക് വിദ്യാര്‍ഥികളെ പ്രാപ്തരാക്കുകയും ചെയ്യുകയെന്നതാണ് ഫെസ്റ്റിന്റെ ലക്ഷ്യം. വിശുദ്ധ ഖുര്‍ആന്റെ മാനവിക സന്ദേശം, ബഹുസ്വരത, ശാസ്ത്രീയ വീക്ഷണം എന്നിവ വിളംബരം ചെയ്യുന്ന വിവിധ സെഷനുകളും ഫെസ്റ്റില്‍ നടക്കും.
നാല് സെക്ടറുകളിലായി ഒരുമാസത്തോളം നീണ്ടുനിന്ന സെക്ടര്‍ തല മത്സരങ്ങളില്‍ മികവ് പുലര്‍ത്തിയ വിദ്യാര്‍ഥികളാണ് സെന്‍ട്രല്‍ ഫെസ്റ്റില്‍ മത്സരിക്കുക. ഖുര്‍ആന്റെ പാരായണ സൗന്ദര്യം, ആശയ ഗാംഭീര്യം, മനഃപാഠ മികവ് എന്നിവ വിലയിരുത്തിയ സെക്ടര്‍തല മത്സരങ്ങള്‍ ബുഖാരിയ്യ മപ്രം, ഉമ്മുല്‍ ഖുറ വളപട്ടണം, മമ്പഉല്‍ ഹുദ കേച്ചേരി, മര്‍കസ് കാരന്തൂര്‍ എന്നീ നാല് ക്യാമ്പസുകളിലാണ് നടന്നത്.
വെള്ളിയാഴ്ച വൈകുന്നേരം നാലിന് മര്‍കസ് കണ്‍വെന്‍ഷന്‍ സെന്ററില്‍ നടക്കുന്ന ചടങ്ങില്‍ ഇന്ത്യന്‍ ഗ്രാന്‍ഡ് മുഫ്തി കാന്തപുരം എ പി അബൂബക്കര്‍ മുസ്ലിയാര്‍ ഫെസ്റ്റ് ഉദ്ഘാടനം ചെയ്യും. ജാമിഅ മര്‍കസ് ചാന്‍സിലര്‍ സി. മുഹമ്മദ് ഫൈസി, റെക്ടര്‍ മുഹമ്മദ് അബ്ദുല്‍ ഹകീം അസ്ഹരി, മര്‍കസ് ഡയറക്ടര്‍ സി. പി ഉബൈദുല്ല സഖാഫി, എം.എം.ഐ സി.എ.ഒ വി എം റശീദ് സഖാഫി, മര്‍കസ് ഖുര്‍ആന്‍ അക്കാദമി പ്രിന്‍സിപ്പല്‍ ഹാഫിള് അബൂബക്കര്‍ സഖാഫി, ഹനീഫ് സഖാഫി ആനമങ്ങാട്, ഹാഫിള് അബ്ദു സമദ് സഖാഫി മൂര്‍ക്കനാട് തുടങ്ങി ഖുര്‍ആന്‍ വിജ്ഞാനശാഖയില്‍ പാണ്ഡിത്യമുള്ള പ്രഗത്ഭര്‍ ഫെസ്റ്റിന്റെ വിവിധ സെഷനുകളില്‍ സംസാരിക്കും. വിദേശ ഖുര്‍ആന്‍ പണ്ഡിതരായ ഖാരിഅ് ശൈഖ് ഫൗസി സഈദ് ഹൈകല്‍ ഈജിപ്ത്, ഖാരിഅ് ശൈഖ് ത്വാരിഖ് അബ്ദുല്‍ ഹാദി ഒമാന്‍, ഹബീബ് മഹ്ദി അബൂബക്കര്‍ അല്‍ ഹാമിദ് മലേഷ്യ തുടങ്ങിയവര്‍ പങ്കെടുക്കും. മുസാബഖതു മആരിഫില്‍ ഖുര്‍ആന്‍, മുസാബഖതു മആജിമില്‍ ഖുര്‍ആന്‍, മുസാബഖതു കലിമാതില്‍ ഖുര്‍ആന്‍ തുടങ്ങി കേരളത്തില്‍ വ്യാപകമല്ലാത്ത വിവിധ മത്സരങ്ങള്‍ അരങ്ങേറും. ഫെസ്റ്റിന്റെ ഭാഗമായി പൊതുജനങ്ങള്‍ക്കും കുടുംബങ്ങള്‍ക്കും വേണ്ടി മെഗാ ക്വിസ് അടക്കമുള്ള വിവിധ പരിപാടികള്‍ സംഘടിപ്പിച്ചിട്ടുണ്ട്. നവംബര്‍ 10 ഞായറാഴ്ച്ച വൈകുന്നേരം ഫെസ്റ്റ് സമാപിക്കും.