അന്താരാഷ്ട്ര മീലാദ് സമ്മേളനം:നിറം പകരാന്‍ ദഫ് ഘോഷയാത്രയും
കോഴിക്കോട്: വരുന്ന ബുധനാഴ്ച കോഴിക്കോട് നടക്കുന്ന അന്താരാഷ്ട്ര മീലാദ് സമ്മേളനത്തിന് നിറം പകരാന്‍ നഗരത്തില്‍ ദഫ് ഘോഷയാത്രയും. സമ്മേളനം ആരംഭിക്കുന്നതിന് മുമ്പ് റാലിയായി ദഫ് സംഘങ്ങള്‍ നഗരം ചുറ്റി നഗരിയില്‍ സമാപിക്കുന്ന രീതിയിലാണ് ഘോഷയാത്ര നടക്കുക. സുന്നി ജംഇയ്യത്തുല്‍ മുഅല്ലിമീന്‍ കോഴിക്കോട് ജില്ലാ കമ്മിറ്റിയുടെ പങ്കാളിത്തത്തോടെ നടത്തുന്ന ദഫ് ഘോഷയാത്രയില്‍ വിവിധ മേഖലകളിലെ മദ്റസകളില്‍ നിന്നായി തിരഞ്ഞെടുക്കപ്പെട്ട 100 ലധികം സംഘങ്ങള്‍ ചുവടുവെക്കും. അറബ് ദഫ് ട്രൂപ്പുകളുടെ നേതൃത്വത്തില്‍ സമ്മേളന വേദിയിലും അവതരണമുണ്ടാകും.
പരമ്പരാഗത ബൈത്തുകളുടെയും മദ്ഹ് ഗാനങ്ങളുടെയും അകമ്പടിയോടെ താളപ്പെരുക്കങ്ങള്‍ തീര്‍ത്ത് ഉയര്‍ന്നും താഴ്ന്നും ചെരിഞ്ഞും ചുവടുകള്‍ വെച്ചു ദഫ്മുട്ടി നീങ്ങുന്ന സംഘങ്ങള്‍ നഗരത്തില്‍ സമ്മേളനത്തിന്റെ ഓളം സൃഷ്ടിക്കും. വ്യത്യസ്ത വസ്ത്രാലങ്കാരങ്ങളും വൈവിധ്യമാര്‍ന്ന പ്രകടനങ്ങളും ഘോഷയാത്രക്ക് മിഴിവേകും. ആദ്യം രജിസ്റ്റര്‍ ചെയ്ത് തിരഞ്ഞെടുക്കപ്പെടുന്ന 100 സംഘങ്ങള്‍ക്കാണ് ഘോഷയാത്രയില്‍ പങ്കെടുക്കുന്നതിനും വിദേശ പ്രകീര്‍ത്തന സംഘങ്ങളും ദഫ് വിദഗ്ധരും ഒന്നിക്കുന്ന അന്താരാഷ്ട്ര മീലാദ് സമ്മേളനത്തിന്റെ ഭാഗമാകുന്നതിനും അവസരമുണ്ടാവുക. രജിസ്ട്രേഷനും കൂടുതല്‍ വിവരങ്ങള്‍ക്കും 9995 590 178 എന്ന നമ്പറില്‍ ബന്ധപ്പെടാവുന്നതാണ്