കെ ആര്‍ നാരായണന്‍ ചരിത്രപുരുഷന്‍: രാഷ്ട്രപതി
പാലാ/തിരുവനന്തപുരം: മുന്‍ രാഷ്ട്രപതി കെ ആര്‍ നാരായണന്‍ ചരിത്രപുരുഷനാണെന്ന് രാഷ്ട്രപതി ദ്രൗപതി മുര്‍മു പറഞ്ഞു. രാജ്ഭവനില്‍ കൂടിക്കാഴ്ച നടത്തിയ കെ ആര്‍ നാരായണന്‍ ഫൗണ്ടേഷന്‍ ഭാരവാഹികളോട് സംസാരിക്കുകയായിരുന്നു രാഷ്ട്രപതി. അംബാസിഡര്‍, വൈസ് ചാന്‍സിലര്‍, എം പി, കേന്ദ്രമന്ത്രി, ഉപരാഷ്ട്രപതി, രാഷ്ട്രപതി തുടങ്ങിയ വിവിധ മേഖലകളില്‍ പ്രവര്‍ത്തിച്ച കെ ആര്‍ നാരായണന്‍ മികച്ച ഭരണാധികാരിയായിരുന്നു.
കെ ആര്‍ നാരായണന്‍ പ്രചോദനമാണ്. കേരളത്തിന്റെ പുത്രനാണ് അദ്ദേഹമെന്നും ദ്രൗപതി മുര്‍മു പറഞ്ഞു. രാജ്ഭവനില്‍ നാളെ കെ ആര്‍ നാരായണന്റെ പ്രതിമ താന്‍ അനാവരണം ചെയ്യുമെന്നും രാഷ്ട്രപതി പറഞ്ഞു. കെ ആര്‍ നാരായണന്റെ സ്മരണ നിലനിര്‍ത്താന്‍ തപാല്‍ സ്റ്റാമ്പും നാണയവും പുറത്തിറക്കണമെന്ന് ഫൗണ്ടേഷന്‍ നല്‍കിയ നിവേദനത്തില്‍ അഭ്യര്‍ത്ഥിച്ചു. നിവേദനം ബന്ധപ്പെട്ട വകുപ്പുകള്‍ക്കു കൈമാറുമെന്ന് രാഷ്ട്രപതി ഭാരവാഹികളെ അറിയിച്ചു.
കെ ആര്‍ നാരായണന്‍ ഫൗണ്ടേഷന്‍ ചെയര്‍മാന്‍ എബി ജെ ജോസ് തയ്യാറാക്കിയ കെ ആര്‍ നാരായണന്‍ ഭാരതത്തിന്റെ സൂര്യതേജസ് എന്ന ജീവചരിത്ര ഗ്രന്ഥവും കെ ആര്‍ നാരായണനെക്കുറിച്ച് ഫൗണ്ടേഷന്‍ പുറത്തിറക്കിയ ഉഴവൂരിന്റെ പുത്രന്‍ എന്ന ഡോക്കുമെന്ററിയും ഫൗണ്ടേഷന്‍ ചെയര്‍മാന്‍ എബി ജെ ജോസ് രാഷ്ട്രപതിയ്ക്ക് സമ്മാനിച്ചു.
ഫൗണ്ടേഷന്‍ ചെയര്‍മാന്‍ എബി ജെ ജോസ്, വൈസ് ചെയര്‍മാന്‍ ഡോ സിന്ധുമോള്‍ ജേക്കബ്, സെക്രട്ടറി ആര്‍ അജിരാജ കുമാര്‍, ലീഗല്‍ സെല്‍ അധ്യക്ഷന്‍ അഡ്വ ജെ ആര്‍ പത്മകുമാര്‍ എന്നിവരാണ് രാഷ്ട്രപതിയുമായി കൂടിക്കാഴ്ച നടത്തിയത്.