റിലീസിന് 21 ദിനങ്ങള്‍ ബാക്കി; യുഎസിൽ വിറ്റ് തീർന്നത് 26,000 ടിക്കറ്റുകൾ; ബോക്സ് ഓഫീസിൽ റെക്കോർഡുകൾ തീർക്കുമെന്ന് ഉറപ്പ് നൽകി 'പുഷ്പ 2'
ഇന്ത്യയൊട്ടാകെ ആരാധകരുള്ള താരമാണ് അല്ലു അർജുൻ. മൂന്നു വർഷത്തെ ഇടവേളയ്ക്കു ശേഷം പുറത്തിറങ്ങുന്ന അല്ലു അർജുൻ ചിത്രത്തിനായി കാത്തിരിക്കുകയാണ് ആരാധകർ. ഏറെ പ്രതീക്ഷയോടെ താരത്തിന്റെ ചിത്രം 'പുഷ്പ ദ റൂൾ' റിലീസിനൊരുങ്ങുന്നത്. 2021ൽ പുറത്തിറങ്ങിയ ആദ്യ ഭാഗത്തിന്റെ വിജയം രണ്ടാം ഭാഗവും ആവർത്തിക്കുന്ന പ്രതീക്ഷയാണ് അണിയറ പ്രവർത്തകർക്കുള്ളത്.
ഒക്ടോബർ 2022 ലായിരുന്നു രണ്ടാം ഭാഗത്തിന്റെ ചിത്രീകരണം ആരംഭിച്ചത്. അല്ലു അർജുന്റെ കരിയറിലെ ഏറ്റവും വലിയ ബോക്സ് ഓഫിസ് വിജയമാകും ചിത്രമെന്നാണ് കണക്ക്കൂട്ടൽ. ഡിസംബർ 5 നാണ് ചിത്രം തീയേറ്ററുകളിൽ എത്തുന്നത്. സിനിമ ഇറങ്ങുന്നതിന് ഒരു മാസം മുമ്പേ കേരളത്തിലെ പുഷ്പ 2 ഫാൻസ് ഷോ ടിക്കറ്റുകൾ വിറ്റ് തീർന്നിരിരുന്നു.
'പുഷ്പ ദ റൂൾ' ഡിസംബർ 5 മുതൽ കേരളക്കരയിലെ തിയേറ്ററുകളിൽ 24 മണിക്കൂറും പ്രദർശനമുണ്ടാകുമെന്ന് ഇ ഫോർ എന്‍റർടെയ്ൻമെന്‍റ്സ് സാരഥി മുകേഷ് ആർ മേത്ത അടുത്തിടെ അറിയിച്ചിരുന്നു. അതിനിടെയാണ് യുഎസില്‍ സംഘടിപ്പിച്ചിരിക്കുന്ന പെയ്ഡ് പ്രീമിയര്‍ ഷോകളില്‍ നിന്ന് നേടിയ അഡ്വാന്‍സ് ബുക്കിംഗ് കളക്ഷന്‍ സംബന്ധിച്ച വിവരങ്ങൾ പുറത്ത് വരുന്നത്.
അമേരിക്കയിൽ ചിത്രത്തിന് പ്രീമിയര്‍ പ്രദര്‍ശനങ്ങള്‍ നടക്കുന്നത് എണ്ണൂറിലധികം ലൊക്കേഷനുകളിലാണ് . റിലീസിന് 21 ദിനങ്ങള്‍ ശേഷിക്കെ 26,000 ടിക്കറ്റുകളാണ് യുഎസ് പ്രീമിയര്‍ ഷോകള്‍ക്കായി ഇതിനകം വിറ്റുപോയിരിക്കുന്നത് എന്നാണ് ഇപ്പോൾ പുറത്ത് വരുന്ന കണക്കുകൾ. ഇതില്‍ നിന്ന് ചിത്രം നേടിയിരിക്കുന്നത് 7.33 ലക്ഷം ഡോളറും.
അതായത് 6.18 കോടി രൂപ. തീയേറ്ററുകളിൽ ഏതാണ് ഇനിയും ദിവസങ്ങൾ ബാക്കി നിൽക്കേയുള്ള ചിത്രത്തിന്റെ പ്രതികരണം റിലീസിന് ശേഷം ബോക്സ് ഓഫീസിൽ തകര്ക്കാന് പോകുന്ന റെക്കോർഡുകളുടെ സൂചന മാത്രമെന്നാണ് കരുതേണ്ടത്.
ആദ്യ ഭാഗം സംവിധാനം ചെയ്ത സുകുമാർ തന്നെ സംവിധാനം ചെയ്യുന്ന പുഷ്പ 2 നിർമ്മിക്കുന്നത് മൈത്രി മൂവി മേക്കേഴ്‌സും സുകുമാർ റൈറ്റിങ്സും ചേർന്നാണ്. രശ്മിക മന്ദാനയാണ് ചിത്രത്തിലെ നായിക. ചിത്രത്തില്‍ അല്ലു അര്‍ജുന് പുറമെ രശ്മിക മന്ദാന, സുനില്‍, ജഗപതി ബാബു, പ്രകാശ് രാജ് തുടങ്ങിയവരാണ് പ്രധാന കഥാപാത്രങ്ങളായുള്ളത്.
ഫഹദ് ഫാസിലും ചിത്രത്തില്‍ പ്രധാന കഥാപാത്രത്തെ അവതരിപ്പിക്കുന്നുണ്ട്. ഭന്‍വര്‍ സിംഗ് ഷെഖാവത്ത് എന്ന പൊലീസ് കഥാപാത്രമായാണ് ഫഹദ് ചിത്രത്തില്‍ വേഷമിടുന്നത്. അല്ലു അര്‍ജുന് മികച്ച നടനുള്ള ദേശീയ പുരസ്‌കാരം നേടി കൊടുത്ത പുഷ്പരാജ് എന്ന കഥപാത്രത്തിന്റെ രണ്ടാംവരവ് സിനിമാലോകം ഏറെ പ്രതീക്ഷയോടെ കാണുന്നത്.