ധനുഷ് വീണ്ടും സംവിധായക വേഷത്തിൽ; 'ഇഡ്‌ലി കടൈ' പോസ്റ്റർ പുറത്ത്; റിലീസ് തീയതിയും പ്രഖ്യാപിച്ചു
മലയാളികൾക്ക് ഏറെ പ്രിയപ്പെട്ട തമിഴ് താരമാണ് ധനുഷ്. താരത്തിന്റെ ചിത്രങ്ങൾക്ക് വലിയ ജനപ്രീതിയാണുള്ളത്. പവർ പാണ്ടി എന്ന ഹിറ്റ് ചിത്രത്തിന് ശേഷം ധനുഷ് സംവിധാനം നിർവഹിച്ച 'രായൻ' എന്ന ചിത്രവും വലിയ പ്രേക്ഷക നിരൂപക ശ്രദ്ധ പിടിച്ച് പറ്റിയിരുന്നു. ഇപ്പോളിതാ ധനുഷിന്റെ അടുത്ത ചിത്രത്തിന്റെ അപ്ഡേറ്റ് വലിയ പ്രതീക്ഷയോടെ ഏറ്റെടുത്തിരിക്കുകയാണ്. തന്റെ വരാനിരിക്കുന്ന ചിത്രത്തിന്റെ റിലീസ് തീയതിയാണ് പോസ്റ്റാറിനൊപ്പം പുറത്ത് വിട്ടിരിക്കുന്നത്.
ധനുഷ് സംവിധാനം ചെയ്യുന്ന 'ഇഡ്‌ലി കടൈ' എന്ന ചിത്രം ഏപ്രിൽ 10, 2025 ന് തീയറ്ററുകളിലെത്തും. നിത്യാ മേനോൻ ആണ് ചിത്രത്തിലെ നായിക. 'തിരുച്ചിത്രമ്പലം' എന്ന ഹിറ്റ് ചിത്രത്തിലൂടെ ആരധകരുടെ മനസ്സ് കീഴടക്കിയ നിത്യാ-ധനുഷ് കോമ്പോ വീണ്ടുമെത്തുന്നു എന്നൊരു പ്രത്യേകത കൂടെ 'ഇഡ്‌ലി കടൈ' യ്ക്കുണ്ട്.
പാ പാണ്ടി, രായൻ, വരാനിരിക്കുന്ന നിലാവ് എൻമേൽ എന്നടി കോബം എന്നീ ചിത്രങ്ങൾക്ക് ശേഷം ധനുഷ് സംവിധാനം ചെയ്യുന്ന നാലാമത്തെ ചിത്രമാണ് 'ഇഡ്‌ലി കടൈ'. ജിവി പ്രകാശ് കുമാർ ആണ് ചിത്രത്തിന് സംഗീതം നൽകുന്നത്. പ്രകാശ് രാജ്, ശാലിനി പാണ്ഡേയും ചിത്രത്തിൽ മറ്റ് പ്രധാന കഥാപാത്രങ്ങളെ അവതരിപ്പിക്കുന്നു എന്നാണ് വിവരം. ചിത്രത്തിലെ മറ്റ് അഭിനേതാക്കളെ കുറിച്ചുള്ള വിവരം ഇതുവരെ പുറത്ത് വന്നിട്ടില്ല.