'ബ്രാൻഡ് ന്യൂ ബാച്ച്, സ്ക്രിപ്റ്റും, മ്യൂസിക്കും, ക്യാമറയും എഡിറ്റും, എല്ലാം തകർത്തു'; മുഹമ്മദ് മുസ്തഫ ചിത്രം 'മുറ'യെ പ്രശംസിച്ച് ലിജോ ജോസും, സുരഭി ലക്ഷ്മിയും

യുവതാരങ്ങളുമായെത്തി തീയേറ്ററുകളിൽ വലിയ ശ്രദ്ധ പിടിച്ചു പറ്റി മുന്നേറുകയാണ് 'മുറ'. 'കപ്പേള' എന്ന ചിത്രത്തിന് ശേഷം മുഹമ്മദ് മുസ്തഫ സംവിധാനം ചെയ്യുന്ന ആക്ഷൻ ഡ്രാമയിൽ യുവ താരം ഹൃദു ഹറൂണും സുരാജ് വെഞ്ഞാറമൂടും, ഒപ്പം നിരവധി പുതുമുഖ താരങ്ങളും അണിനിരന്നിരുന്നു. സിനിമാ പ്രവർത്തകരും രണ്ടാം വാരത്തിലേക്ക് കടക്കുന്ന സിനിമയെ പ്രശംസിച്ച് രം​ഗത്തെത്തുന്നുണ്ട്. "ബ്രാൻഡ് ന്യൂ ബാച്ച്" എന്നാണ് സംവിധായകൻ ലിജോ ജോസ് മുറയെ വിശേഷിപ്പിച്ചത്.

ദേശീയ ചലച്ചിത്ര പുരസ്‌കാര ജേതാവ് കൂടിയായ സുരഭി ലക്ഷ്മിയും മുറയെ പ്രശംസിച്ച് എത്തിയിട്ടുണ്ട്. "മുസ്തു, ഇന്നലെ മുറ മൂവി കണ്ടു. നിങ്ങളുടെ അഭിനയക്കളരിയിൽ പുതുമുഖ അഭിനേതാക്കൾ ഹൃദു ഹാറൂൺ, അനുജിത്, യെദു,ജോബിൻ എല്ലാവരും അതിഗംഭീരം, ഒപ്പം പാർവതി ചേച്ചിയും സുരാജേട്ടനും തകർത്തു. മാർഗമല്ല ലക്ഷ്യമാണ് പ്രധാനം എന്ന് 'കരുതു'ന്ന തലമുറയോട്, അത് മുറ പോലെ തല പോകാനുള്ള പണിയാണെന്ന ഒരു ഓർമ്മിപ്പിക്കലാണ് ഈ 'മുറ'. വിജയത്തിന് കുറുക്കുവഴികളില്ല, ഹാർഡ് വർക്ക് ചെയ്യു, എന്ന് പറഞ്ഞു പഠിപ്പിച്ച, പ്രോത്സാഹിപ്പിക്കുന്ന പ്രിയ മുസ്തു. നിങ്ങൾക്കും എല്ലാം "മുറ"പോലെ വന്നു ചേരട്ടെ. സ്ക്രിപ്റ്റും, മ്യൂസിക്കും, ക്യാമറയും എഡിറ്റും, എല്ലാം തകർത്തു. മുറയുടെ എല്ലാ അണിയറ പ്രവർത്തകർക്കും ആശംസകൾ", എന്നാണ് സുരഭി സോഷ്യൽ മീഡിയയിൽ കുറിച്ചത്.

കനി കുസൃതി, കണ്ണൻ നായർ, ജോബിൻ ദാസ്, അനുജിത് കണ്ണൻ, യെദു കൃഷ്ണ, വിഘ്‌നേശ്വർ സുരേഷ്, കൃഷ് ഹസ്സൻ, സിബി ജോസഫ് എന്നിവരാണ് മുറയിലെ മറ്റു പ്രധാന വേഷങ്ങളിലെത്തുന്നത്. ഉപ്പും മുളകും ഫെയിം സുരേഷ് ബാബുവാണ് ചിത്രത്തിന്റെ രചന നിർവഹിക്കുന്നത്. ഫാസിൽ നാസർ ഛായാഗ്രഹണം നിർവഹിക്കുന്ന ചിത്രത്തിന്റെ എഡിറ്റിംഗ് ചമൻ ചാക്കോയാണ്. ചിത്രത്തിനായി സംഗീതം ഒരുക്കിയിരിക്കുന്നത് ക്രിസ്റ്റി ജോബിയാണ്.

കലാസംവിധാനം ശ്രീനു കല്ലേലിൽ, മേക്കപ്പ് റോണെക്സ് സേവ്യർ, വസ്ത്രാലങ്കാരം നിസാർ റഹ്‍മത്ത്, ആക്ഷൻ പി സി സ്റ്റണ്ട്സ്, പ്രൊഡക്ഷൻ കൺട്രോളർ ജിത്ത് പിരപ്പൻകോട്, പി ആർ ഒ ആൻഡ് മാർക്കറ്റിംഗ് കൺസൾട്ടന്റ് പ്രതീഷ് ശേഖർ. എക്സിക്യൂട്ടീവ് പ്രൊഡ്യൂസർ റോണി സക്കറിയ എന്നിവരാണ്.