വുമൺ വിത്ത് എ മൂവി ക്യാമറയ്ക്ക് ശേഷം അടൽ കൃഷ്ണയുടെ 'മർത്ത്യലോക ഇതിഹാസം'; ദിവ്യപ്രഭ കേന്ദ്ര കഥാപാത്രമാവുന്ന ചിത്രത്തിന്റെ ഫസ്റ്റ്‌ലുക്ക് പുറത്ത്
മികച്ച നിരൂപക പ്രശംസ പിടിച്ചു പറ്റിയ സിനിമയായിരുന്നു 2021ൽ പുറത്തിറങ്ങിയ 'വുമൺ വിത്ത് എ മൂവി ക്യാമറ'. ആ വർഷത്തെ കേരള രാജ്യാന്തര ചലച്ചിത്ര മേളയിലും കയ്യടി നേടിയ ചിത്രത്തിലൂടെ ശ്രദ്ധനേടിയ സംവിധായകൻ അടൽ കൃഷ്ണയുടെ ഏറ്റവും പുതിയ ചിത്രമാണ് 'മർത്ത്യലോക ഇതിഹാസം'. 'ഓൾ വി ഇമാജിൻ ഇസ് ലൈറ്റിന്' ശേഷം ദിവ്യപ്രഭ കേന്ദ്ര കഥാപാത്രമാവുന്ന ചിത്രത്തിന്റെ ഫസ്റ്റ്‌ലുക്ക് പുറത്തുവിട്ടു. 55-ആം അന്താരാഷ്ട്ര ചലച്ചിത്രോത്സവത്തിന്റെ ഭാഗമായുള്ള (എൻ.എഫ്.ഡി.സി) ഫിലിം ബസാറിന്റെ വ്യൂവിങ് റൂമിലേക്ക് 'മർത്ത്യലോക ഇതിഹാസം' തിരഞ്ഞെടുക്കപ്പെട്ടിട്ടുണ്ട്.
വിൻ പ്രൊഡക്ഷൻസിന്റെ ബാനറിൽ ഇന്ദുലേഖ.കെ യും വിനീത വാര്യരുമാണ് ചിത്രത്തിന്റെ നിർമ്മാതാക്കൾ. സുർജിത്ത് ഗോപിനാഥ്, കുമാർ സേതു, സൈഫുദ്ധീൻ ഇ, പ്രശാന്ത് മാധവൻ ,ജീവൻ ജോസ് ,ജോവിൻ എബ്രഹാം എന്നിവരാണ് മറ്റ് പ്രധാന വേഷങ്ങളിൽ എത്തുന്നത്. ആനന്ദ് പി മോഹൻദാസ് ഛായാഗ്രഹണം നിർവഹിക്കുന്ന ചിത്രത്തിനായി ത്രിലോക് ദി ബാൻഡ്, സെലിജോ ജോൺ, അമൃത് കിരൺ, ജിഫിൻ സേവ്യർ എന്നിവർ ചേർന്നാണ് സംഗീതവും പശ്ചാത്തല സംഗീതവും ഒരുക്കുന്നത്.
കല, വസ്ത്രാലങ്കാരം സുഭിക്ഷ ജഗന്നാഥൻ, സൗണ്ട് ഡിസൈൻ വിഘ്‌നേശ് പി ശശിധരൻ, വി എഫ് എക്സ് അഹ്‌സൻ ബിൻ നാസർ, ഗാനരചന യമ ഗില്ഗമേഷ് രംഗത്ത്, ലൈൻ പ്രൊഡ്യൂസർ അഭിജിത്ത് കമലാകാരൻ പണിക്കർ, ചീഫ് അസ്സോസിയേറ്റ് ഡയറക്ടർ അരുൺ എൻ എസ് ,അസ്സോസിയേറ്റ് സിനിമാട്ടോഗ്രാഫർ മനു പോൾ ,പ്രൊഡക്ഷൻ കൺട്രോളർ ഭാരത് നാരായണൻ, അസിസ്റ്റന്റ് ഡയറക്ടർ യദു കൃഷ്ണൻ എം.ഡി, അസിസ്റ്റന്റ് സിനിമാട്ടോഗ്രാഫർ അഖിൽ ഫൈസൽ, ലിനു, പബ്ലിസിറ്റി ഡിസൈൻ എൽബിൻ ജേക്കബ് എന്നിവരാണ് മറ്റ് അണിയറ പ്രവർത്തകർ.