മോഹൻലാൽ- സത്യൻ അന്തിക്കാട് യൂണിവേഴ്സില്‍ 'അമല്‍ ഡേവിസും'; 'ഹൃദയപൂർവം'ത്തിൽ സംഗീത് പ്രതാപും; ചിത്രത്തിന്റെ അപ്ഡേറ്റ് ഏറ്റെടുത്ത് ആരാധകർ
മലയാളത്തിൽ ഈ വർഷത്തെ ഏറ്റവും വലിയ ഹിറ്റ് ചിത്രങ്ങൾ ഒന്നാണ് 'പ്രേമലു'. യുവ താരങ്ങൾ അണിനിരന്ന ചിത്രം വലിയ പ്രേക്ഷക ശ്രദ്ധയാണ് നേടിയത്. ചിത്രത്തിലെ അമൽ ഡേവിസ് എന്ന കഥാപാത്രത്തിലൂടെ വൻ ജനപ്രീതി നേടിയ നടനാണ് സംഗീത് പ്രതാപ്. എഡിറ്റർ കൂടിയായ സംഗീത് സംസ്ഥാന ചലച്ചിത്ര അവാർഡ് വിജേതാവ് കൂടിയാണ്. ആരാധകർ വലിയ പ്രതീക്ഷയോടെ കാത്തിരിക്കുന്ന സത്യൻ അന്തിക്കാട്- മോഹൻലാൽ കൂട്ടുകെട്ടിലെ ചിത്രമാണ് 'ഹൃദയപൂർവം'.
ഇരുവരും ഒരുമിക്കുന്ന പതിനെട്ടാമത്തെ ചിത്രത്തിൽ ഒരു പ്രധാന കഥാപാത്രത്തെ അവതരിപ്പിക്കാൻ ഒരുങ്ങുകയാണ് സംഗീത്. ഈക്കാര്യം അഖിൽ സത്യനാണ് അറിയിച്ചത്. ഫേസ്‌ബുക്ക് സ്റ്റോറിയിലൂടെയാണ് സത്യൻ അന്തിക്കാടിനൊപ്പം നിൽക്കുന്ന സംഗീതിന്റെ ഫോട്ടോയും അദ്ദേഹം പങ്കുവെച്ചത്. മോഹൻലാൽ- സത്യൻ അന്തിക്കാട് യൂണിവേഴ്സില്‍ 'അമല്‍ ഡേവിസും' എന്നും കുറിച്ചു.
ഒൻപത് വർഷങ്ങൾക്ക് ശേഷം മോഹൻലാലും സത്യൻ അന്തിക്കാടും വീണ്ടും ഒന്നിക്കുന്നത്. 'എന്നും എപ്പോഴും' ആയിരുന്നു ഈ കോമ്പോയിൽ എത്തിയ അവസാന ചിത്രം. മഞ്ജു വാര്യർ ആയിരുന്നു നായികയായി എത്തിയത്. 1984ൽ പുറത്തിറങ്ങിയ ‘അപ്പുണ്ണി’ എന്ന ചിത്രത്തിലൂടെയാണ് മോഹൻലാലും സത്യൻ കൂട്ടുകെട്ടിലെ ആദ്യ ചിത്രം. പിന്നീട് 'ടിപി ബാലഗോപാലൻ എംഎ', 'ഗാന്ധിനഗർ സെക്കൻഡ് സ്ട്രീറ്റ്', 'സന്മനസ്സുള്ളവർക്ക് സമാധാനം', 'നാടോടിക്കാറ്റ്', 'പട്ടണപ്രവേശം', 'വരവേൽപ്പ്', 'പിൻഗാമി' തുടങ്ങി നിരവധി ഹിറ്റ് ചിത്രങ്ങൾ ഈ കൂട്ടുകെട്ടിൽ പിറന്നു.
ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമിക്കുന്ന ചിത്രത്തിന്റെ തിരക്കഥയും സംഭാഷണവും ഒരുക്കുന്നത് സോനു ടി പിയാണ്. അനു മൂത്തേടത്താണ് ഛായാഗ്രഹണണവും ജസ്റ്റിൻ പ്രഭാകരൻ സംഗീത സംവിധാനം നിർവഹിക്കുന്നത്. പ്രശാന്ത് മാധവനാണ് കലാസംവിധാനം.