''സഖാവ് മാധവൻ, സഖാവ് ശങ്കുണ്ണി.. ഹൊ കടുപ്പമായിരുന്നെ...''; വിനായകനും സുരാജ് വെഞ്ഞാറമൂടും പ്രധാന വേഷങ്ങളിലെത്തിയ 'തെക്ക് വടക്ക്' ഒടിടിയിലേക്ക്; സ്ട്രീമിംഗ് ആരംഭിക്കുക മനോരമ മാക്സിലൂടെ

വ്യത്യസ്തമായ പ്രമേയം കൊണ്ട് ചർച്ചയായ ചിത്രമായിരുന്നു തെക്ക് വടക്ക്. ജെല്ലിക്കെട്ടിന്റെയും നൻപകല്‍ നേരത്ത് മയക്കത്തിന്റെയും തിരക്കഥാകൃത്തായ എസ് ഹരീഷിന്റെ രചനയിലൊരുങ്ങിയ ചിത്രം പ്രേംശങ്കര്‍ ആണ് സംവിധാനം ചെയ്തത്. വിനായകനും സുരാജ് വെഞ്ഞാറമൂടും കഥാപാത്രങ്ങളായി എത്തി ചിത്രത്തിന്റെ ഒടിടി റിലീസിന്റെ അപ്ഡേറ്റുകളാണ് ഇപ്പോൾ പുറത്ത് വരുന്നത്. മനോരമ മാക്സിലൂടെ ചിത്രം നവംബര്‍ 19നാണ് ഒടിടിയില്‍ എത്തുക.

കെഎസ്ഇബി എഞ്ചിനീയറായി റിട്ടയേർഡായ എഞ്ചിനീയർ മാധവനെന്ന കഥാപാത്രമായി വിനായകനും അരിമിൽ ഉടമ ശങ്കുണ്ണിയായി സുരാജും ചിത്രത്തിലെത്തുന്നത്. എസ്. ഹരീഷിന്റെ "രാത്രി കാവൽ" എന്ന കഥയെ ആസ്പദമാക്കിയാണ് ചിത്രം ഒരുക്കിയിരിക്കുന്നത്. മെൽവിൻ ജി ബാബു, ഷമീർ ഖാൻ, കോട്ടയം രമേഷ്, മെറിൻ ജോസ്, വിനീത് വിശ്വം, ബാലൻ പാലക്കൽ, ജെയിംസ് പാറക്കൽ തുടങ്ങി നൂറോളം അഭിനേതാക്കളാണ് തെക്ക് വടക്കിൽ അണിനിരക്കുന്നത്.

സംവിധായകൻ അൻവർ റഷീദിന്റെ ബ്രിഡ്‍ജ് സിനിമയുടെ ഛായാഗ്രാഹകനായി ആരംഭിച്ച് കിസ്‍മത്ത്, വലിയപെരുന്നാൾ എന്നിവയിലൂടെ ശ്രദ്ധേയനായ സുരേഷ് രാജനാണ് ഡിഒപി. ആർഡിഎക്സിലെ ഹിറ്റ് ഗാനങ്ങളൊരുക്കിയ സാം സി എസ് ഗാനങ്ങൾ ചിട്ടപ്പെടുത്തി പശ്ചാത്തല സംഗീതം ഒരുക്കിയപ്പോള്‍ പ്രൊഡക്ഷൻ ഡിസൈൻ രാഖിൽ വരികൾ ലക്ഷ്‍മി ശ്രീകുമാറുമാണ്.