അതിർത്തി വിട്ട് കഴിഞ്ഞാൽ പിന്നെ ഇവർക്ക് പ്രശ്നമില്ലലോ..; അന്ന് 'സേ ഇറ്റ്' എന്ന് പറഞ്ഞവർ തന്നെ ഇന്ന് സ്ത്രീകളെ മോശമായി കാണിക്കുന്നു..!! കെജിഎഫ് സ്റ്റാറിന്റെ 'ടോക്സിക്' ടീസർ പുറത്തുവന്നതോടെ തിരികൊളുത്തിയ വിവാദം; ഗീതു മോഹൻദാസിന്റെ ആ ഫ്രെയിമിൽ തെളിഞ്ഞത് മുഴുവൻ അശ്ലീലം; രാജൻ സക്കറിയ ഒരു വരവ് കൂടി വരുമെന്ന് ജോബി ജോർജ്

കൊച്ചി: നിർമാതാവ് ജോബി ജോർജ് മമ്മൂട്ടിയുടെ സൂപ്പർഹിറ്റ് ചിത്രം 'കസബ'യിലെ രാജൻ സക്കറിയ എന്ന കഥാപാത്രത്തിന്റെ തിരിച്ചുവരവ് പ്രഖ്യാപിച്ചു. സംവിധായിക ഗീതു മോഹൻദാസിന്റെ പുതിയ ചിത്രമായ 'ടോക്സിക്' ടീസറിനെ ചൊല്ലിയുള്ള വിവാദങ്ങൾ കൊടുമ്പിരിക്കൊണ്ടിരിക്കെയാണ് ജോബി ജോർജിന്റെ ഈ പ്രഖ്യാപനം എന്നത് ശ്രദ്ധേയമാണ്. തന്റെ ഔദ്യോഗിക ഫെയ്‌സ്ബുക്ക് പേജിലൂടെയായിരുന്നു അദ്ദേഹം ഈ വിവരം പങ്കുവെച്ചത്.

'കസബ'യിലെ സ്ത്രീവിരുദ്ധ രംഗങ്ങൾക്കെതിരെ രൂക്ഷമായ വിമർശനങ്ങൾ ഉന്നയിച്ച ഗീതു മോഹൻദാസിന്റെ 'ടോക്സിക്' ടീസറിലും സമാനമായ സ്ത്രീവിരുദ്ധതയുണ്ടെന്ന് ആരോപിച്ചാണ് നിലവിൽ സമൂഹ മാധ്യമങ്ങളിൽ ചർച്ചകൾ സജീവമാകുന്നത്. 'അന്ന് കസബയ്‌ക്കെതിരെ പറഞ്ഞവർ തന്നെയാണ് ഇപ്പോൾ സ്ത്രീകളെ മോശമായി ചിത്രീകരിക്കുന്നത്. അതിർത്തി കടന്നാൽ പ്രശ്നമില്ലെന്നാണോ?' എന്ന ചോദ്യങ്ങളും സാമൂഹിക മാധ്യമങ്ങളിൽ വ്യാപകമായി ഉയരുന്നുണ്ട്.

മുമ്പ് 'കസബ'യിലെ സ്ത്രീവിരുദ്ധ സംഭാഷണങ്ങളെയും രംഗങ്ങളെയും നടി പാർവതി തിരുവോത്ത്, ഗീതു മോഹൻദാസ് തുടങ്ങിയ ചലച്ചിത്ര പ്രവർത്തകർ ഉൾപ്പെടെയുള്ളവർ ശക്തമായി വിമർശിച്ചിരുന്നു. ഇത് വലിയ വിവാദങ്ങൾക്ക് വഴിവെക്കുകയും മലയാള ചലച്ചിത്ര ലോകത്ത് ചൂടേറിയ ചർച്ചകൾക്ക് തുടക്കമിടുകയും ചെയ്തിരുന്നു.

നിഥിൻ രൺജി പണിക്കർ സംവിധാനം ചെയ്ത 'കസബ'യിൽ മമ്മൂട്ടി ഒരു പോലീസ് ഉദ്യോഗസ്ഥന്റെ വേഷത്തിലാണ് എത്തിയത്. തീയേറ്ററുകളിൽ മികച്ച പ്രേക്ഷക പ്രതികരണം നേടിയ ഈ ചിത്രത്തിൽ തമിഴ് നടൻ ശരത് കുമാറിന്റെ മകൾ വരലക്ഷ്മി ശരത്കുമാർ ആയിരുന്നു നായിക. സമ്പത്ത്, നേഹ സക്സേന, ജഗദീഷ് എന്നിവരും പ്രധാന കഥാപാത്രങ്ങളെ അവതരിപ്പിച്ചു.

രാജൻ സക്കറിയയുടെ രണ്ടാം വരവ് ഒരു പുതിയ ചിത്രത്തിലൂടെയാണോ അതോ 'കസബ'യുടെ റീ-റിലീസിലൂടെയാണോ എന്ന് ജോബി ജോർജ് വ്യക്തമാക്കാത്തത് സിനിമാ പ്രേമികളിൽ ആകാംഷ വർദ്ധിപ്പിച്ചിരിക്കുകയാണ്. ഈ പ്രഖ്യാപനം മലയാള സിനിമയിൽ വീണ്ടും സജീവ ചർച്ചകൾക്ക് വഴിതുറന്നിട്ടുണ്ട്.