'ദിന ദിനമും..' വിടുതലൈ രണ്ടാം ഭാഗത്തിന്റെ ആദ്യ ഗാനം പുറത്ത്; വിജയ് സേതുപതി-മഞ്ജു വാര്യർ ജോഡികൾക്കായി പ്രണയ ഗാനം ആലപിച്ച് ഇളയരാജ

തെന്നിന്ത്യൻ സിനിമയിലെ തന്നെ ഏറ്റവും മികച്ച സംവിധായകരിൽ മുൻ നിരയിലാണ് വെട്രിമാരൻ. സംവിധാനം ചെയ്ത എല്ലാ ചിത്രങ്ങളും മികച്ച പ്രേക്ഷക നിരൂപക ശ്രദ്ധ നേടിയവയായിരുന്നു. കോമഡി കഥാപാത്രങ്ങളിലൂടെ പ്രേക്ഷകരുടെ പ്രിയ താരമായ നടൻ സൂരിക്ക് കരിയറിലെ തന്നെ ഏറ്റവും മികച്ച ഒരു ബ്രേക്ക് ത്രൂ ലഭിച്ചതും വെട്രിമാരൻ ചിത്രമായ 'വിടുതലൈ' യിലൂടെ ആയിരുന്നു.

സൂരിയോടൊപ്പം വിജയ് സേതുപതിയും എത്തിയ ചിത്രത്തിന് വലിയ വിജയമാണ് നേടാനായത്. ഇതിന്റെ രണ്ടാം ഭാഗത്തിനായും വലിയ പ്രതീക്ഷയോടെയാണ് ആരാധകർ കാത്തിരിക്കുന്നത്. ഇപ്പൊഴിതാ ചിത്രത്തിന്റെ പുതിയൊരു അപ്ഡേറ്റ് പുറത്ത് വന്നിരിക്കുകയാണ്. ചിത്രത്തിന്റെ ആദ്യ ഗാനം പുറത്ത് വിട്ടിരിക്കുകയാണ് അണിയറ പ്രവർത്തകർ. 'ദിന ദിനമും' എന്ന് തുടങ്ങുന്ന ഗാനം ആലപിച്ചിരിക്കുന്നത് സംഗീതം ഒരുക്കിയ ഇളയരാജയ്‌ക്കൊപ്പം അനന്യ ചേർന്നാണ്.

ചിത്രത്തിൻ്റെ രണ്ടാം ഭാഗത്തിൽ വിജയ് സേതുപതിയുടെ ജോഡിയായി മഞ്ജു വാര്യർ എത്തും. ചിത്രത്തിൻ്റെ ഡബ്ബിംഗ് നടപടികൾ ആരംഭിച്ചതായി അടുത്തിടെ അണിയറപ്രവർത്തകർ അറിയിച്ചിരുന്നു. രണ്ടാം ഭാഗത്തിൽ വിജയ് സേതുപതി അവതരിപ്പിച്ച പെരുമാൾ വാത്തിയാർ എന്ന കഥാപാത്രത്തിന്റെ ഫ്ലാഷ് ബാക്ക് ആവും എന്നാണ് മനസ്സിലാക്കേണ്ടത്.

ചിത്രത്തിന്റെ രണ്ടാം ഭാഗം ഉണ്ടാകുമെന്ന സൂചനകളോടെ തന്നെയായിരുന്നു ആദ്യ ഭാഗം അവസാനിച്ചിരുന്നത്. അപ്പോൾ മുതൽ വലിയ പ്രതീക്ഷയിലായിരുന്നു ആരാധകർ. അനുരാഗ് കശ്യപ്, കിഷോർ, ഗൗതം വാസുദേവ് മേനോൻ, രാജീവ് മേനോൻ, ചേതൻ എന്നിവരും മറ്റുപ്രധാന വേഷങ്ങളിൽ എത്തുന്നുണ്ട്.

ആർ.എസ് ഇൻഫോടൈൻമെന്റിന്റെ ബാനറിൽ എൽറെഡ് കുമാറാണ് വിടുതലൈ രണ്ടാം ഭാഗത്തിന്റെ നിർമ്മാണം നിർവഹിക്കുന്നത്. ചിത്രത്തിന്റെ കേരളാ വിതരണാവകാശം വൈഗ എന്റർപ്രൈസസ് മെറിലാൻഡ് റിലീസസ് ആണ് കരസ്ഥമാക്കിയത്.