ആ സമയം വീട്ടിൽ മാമന്റെ മകൻ ഉണ്ടായിരുന്നു; അവർ ഒരിക്കലും വിചാരിക്കാത്ത ഒരു ചിത്രം; അങ്ങനെ ഞാൻ അമ്മയുടെ ആഗ്രഹം നടത്തി; തുറന്നുപറഞ്ഞ് നടി മഞ്ജു വിജീഷ്

ജനപ്രിയ പരമ്പരയിലൂടെ പ്രശസ്തയായ നടിയാണ് മഞ്ജു വിജീഷ്. ചെറുപ്പത്തിൽ തന്നെ വിധവയാകേണ്ടി വന്ന തന്റെ അമ്മയുടെ ഏറെക്കാലമായുള്ള ആഗ്രഹമാണ് ഇപ്പോൾ സഫലമായിരിക്കുന്നത്. അച്ഛനും അമ്മയും മാത്രം ഒരുമിച്ചുള്ള ഒരു ചിത്രം തങ്ങളുടെ ഓർമ്മയിലെ ആൽബങ്ങളിൽ പോലും ഇല്ലായിരുന്നുവെന്ന് മഞ്ജു പറയുന്നു.

മഞ്ജുവിന്റെ വാക്കുകൾ ഇങ്ങനെ..

വളരെ അവിചാരിതമായി അലമാര വൃത്തിയാക്കുന്നതിനിടെ അമ്മയുടെ പഴയ ഒരു ഒറ്റ ഫോട്ടോ ലഭിച്ചു. അത് നിറം മങ്ങിയതും അമ്മയ്ക്ക് വണ്ണം ഉണ്ടായിരുന്ന സമയത്തെ ഫോട്ടോയുമായിരുന്നു. ഈ സമയം വീട്ടിലുണ്ടായിരുന്ന, ഫിലിം എഡിറ്റർ കൂടിയായ സഹോദരപുത്രൻ ഉണ്ണി (അമൽ സുരേഷ്) നോട് അമ്മ തന്റെ ആഗ്രഹം പറഞ്ഞു: "അച്ഛന്റെയും അമ്മയുടെയും ഫോട്ടോ ഒറ്റ ഫ്രെയിമിൽ ആക്കി തരാമോ?"

"എഐയും ജെമിനിയും ഒക്കെ ഉള്ള ഇക്കാലത്തു അതൊക്കെ വളരെ സിമ്പിൾ അല്ലേ," എന്ന് മഞ്ജു കുറിച്ചു. അങ്ങനെ ഉണ്ണി, തങ്ങൾ മക്കളോ മരുമക്കളോ കൊച്ചുമക്കളോ ഒരിക്കലും പ്രതീക്ഷിക്കാത്ത അച്ഛന്റെയും അമ്മയുടെയും ഒരുമിച്ചുള്ള മനോഹരമായ ചിത്രം ഒരുക്കിക്കൊടുത്തു.

ഈ ചിത്രം അമ്മയ്ക്ക് ഒരുപാട് സന്തോഷം നൽകിയെന്ന് മഞ്ജു പറയുന്നു. ഇനി ഇത് എല്ലാവരും കൂടിയുള്ള ഒരു ഫാമിലി ഫോട്ടോയായി ഫ്രെയിം ചെയ്ത് സൂക്ഷിക്കാനാണ് കുടുംബത്തിൻ്റെ തീരുമാനം.

മഞ്ജുവിന്റെ വാക്കുകളിൽ, "ചിലർക്കിത് വലിയ അതിശയമൊന്നും തോന്നില്ല. പക്ഷെ എന്റെ അമ്മയെപ്പോലെ വളരെ ചെറുപ്പത്തിൽ തന്നെ വിധവ ആകേണ്ടിവന്ന, ഒരുപാട് കഷ്ടപ്പാടുകൾ അനുഭവിക്കേണ്ടിവന്ന സാധാരണ അമ്മമാർക്ക് ഇതൊക്കെ ഒരുപാട് സന്തോഷം നൽകുന്ന വലിയ കാര്യങ്ങളാണ്. ഒരുപാട് നൂതന സാങ്കേതിക വിദ്യകൾ ഉള്ള ഇക്കാലത്തു, ഇതൊക്കെ ഇങ്ങനെയുള്ള വലിയ വലിയ സന്തോഷങ്ങൾക്ക് കൂടി കാരണമാകുന്നത് വലിയ സഹായകമാണ്."

അമ്മയുടെ ആഗ്രഹം നിറവേറ്റിയ ഉണ്ണിയോട് മഞ്ജു ഹൃദയം നിറഞ്ഞ നന്ദി അറിയിച്ചു.