'ടീമേ.. ഞങ്ങളുടെ മനസമ്മതം കഴിഞ്ഞിട്ടാ.. എല്ലാവരുടെയും അനുഗ്രഹവും പ്രാർത്ഥനയും വേണം'; വൈറലായി ബിനീഷ് ബാസ്റ്റിന്റെ വിവാഹനിശ്ചയ ചിത്രങ്ങൾ
കൊച്ചി: മലയാളത്തിലെ ശ്രദ്ധേയനായ യുവനടൻ ബിനീഷ് ബാസ്റ്റിന്റെ വിവാഹനിശ്ചയം കഴിഞ്ഞു. അഞ്ചു വർഷമായി പ്രണയത്തിലായിരുന്ന അടൂർ സ്വദേശിനി താരയാണ് വധു. ലളിതമായ ചടങ്ങുകളോടെ പള്ളിയിൽ വെച്ചായിരുന്നു മനസമ്മതം നടന്നത്. തന്റെ ഇൻസ്റ്റാഗ്രാം പേജിലൂടെയാണ് ബിനീഷ് സന്തോഷവാർത്ത ആരാധകരെ അറിയിച്ചത്. "ടീമേ.. ഞങ്ങളുടെ മനസമ്മതം കഴിഞ്ഞിട്ടാ.. എല്ലാവരുടെയും അനുഗ്രഹവും പ്രാർത്ഥനയും വേണം" എന്ന തനതായ ശൈലിയിലുള്ള കുറിപ്പോടെ താരം ചിത്രങ്ങളും പങ്കുവെച്ചു.
ഇരുവരുടെയും വിവാഹം 2026 ഫെബ്രുവരിയിലായിരിക്കും നടക്കുക. ചെറിയ വേഷങ്ങളിലൂടെ പ്രേക്ഷകരുടെ പ്രിയങ്കരനായി മാറിയ നടനാണ് ബിനീഷ് ബാസ്റ്റിൻ. ബോഡി ബിൽഡിംഗിലൂടെ സിനിമയിലെത്തിയ അദ്ദേഹം പോക്കിരി രാജ, പാസഞ്ചർ, അണ്ണൻ തമ്പി, ആക്ഷൻ ഹീറോ ബിജു, ഡബിൾ ബാരൽ, വിജയ് ചിത്രം തെരി, പൊറിഞ്ചു മറിയം ജോസ്, കാട്ടുമാക്കാൻ തുടങ്ങി നിരവധി സിനിമകളിൽ ശ്രദ്ധേയമായ വേഷങ്ങൾ ചെയ്തിട്ടുണ്ട്. സ്റ്റാർ മാജിക് എന്ന ടെലിവിഷൻ പരിപാടിയിലൂടെയാണ് ബിനീഷ് കൂടുതൽ ജനശ്രദ്ധ നേടിയത്. വിവാഹനിശ്ചയ ചിത്രങ്ങൾ പുറത്തുവന്നതോടെ സിനിമാരംഗത്തെ സഹപ്രവർത്തകരും ആരാധകരും ഉൾപ്പെടെ നിരവധി പേരാണ് താരത്തിന് ആശംസകൾ നേർന്നത്.