റൊമാന്റിക് കോമഡിയുമായി 'ആവേശം' ടീം; സജിൻ ഗോപുവും അനശ്വര രാജനും പ്രധാന വേഷങ്ങളിൽ; നിർമാണം ഫഹദ് ഫാസിൽ; 'പൈങ്കിളി' യുടെ രസകരമായ ഫസ്റ്റ് ലുക്ക് പോസ്റ്റർ പുറത്ത്

കൊച്ചി: സമീപ കാലങ്ങളിൽ റിലീസായ മലയാള സിനിമകളിൽ ഏറ്റവും ശ്രദ്ധിക്കപ്പെട്ട ചിത്രങ്ങളിൽ ഒന്നാണ് 'ആവേശം'. ഫഹദ് ഫാസിൽ നായകനായ ചിത്രം സംവിധാനം ചെയ്തത് ജിത്തു മാധവൻ ആയിരുന്നു. അന്യഭാഷ പ്രേക്ഷകരിൽ നിന്നും ഒട്ടനവധി സിനിമ താരങ്ങളിൽ നിന്നും പ്രശംസ പിടിച്ചു പറ്റാനും ചിത്രത്തിനായി. ഫഹദിനെ കൂടാതെ ചിത്രത്തിൽ മികച്ച പ്രകടനം കാഴ്ചവെച്ച് കയ്യടി നേടിയ താരമാണ് സജിൻ ഗോപു. ചിത്രത്തിൽ താരം അവതരിപ്പിച്ച അമ്പാൻ എന്ന കഥാപാത്രം മികച്ച ജനപ്രീതി നേടിയിരുന്നു.

ഇപ്പോഴിതാ സജിൻ ഗോപുവിനെ കേന്ദ്ര കഥാപാത്രമാക്കി 'ആവേശം' ടീം വെള്ളിത്തിരയിലെത്തിക്കുന്ന ചിത്രത്തിന്റെ വാർത്തകളാണ് ഇപ്പോൾ പുറത്ത് വരുന്നത്. 'പൈങ്കിളി' എന്ന ചിത്രത്തിന്റെ ഫസ്റ്റ് ലുക്ക് പോസ്റ്ററാണ് അണിയറ പ്രവർത്തകർ പങ്കുവെച്ചിരിക്കുന്നത്. കൗതുകം നിറച്ചുകൊണ്ട് രസകരമായ ഫസ്റ്റ് ലുക്ക് പോസ്റ്ററാണ് പുറത്ത് വിട്ടിരിക്കുന്നത്. സജിൻ ഗോപുവിനോടോപ്പം അനശ്വര രാജനാണ് ചിത്രത്തിൽ പ്രധാന വേഷത്തിൽ എത്തുന്നത്. നടൻ ശ്രീജിത്ത് ബാബു സംവിധാനം ചെയ്യുന്ന ചിത്രത്തിൽ 'ആവേശം' സിനിമയിലൂടെ ശ്രദ്ധേയനായ റോഷൻ ഷാനവാസ് ഉള്‍പ്പെടെ നിരവധി താരങ്ങള്‍ ഒരുമിക്കുന്നുണ്ട്.

ചിത്രം ഫെബ്രുവരി 14നാണ് റിലീസിനായി ഒരുങ്ങുന്നത്. ഫഹദ് ഫാസിൽ ആന്‍റ് ഫ്രണ്ട്സിന്‍റേയും അർബൻ ആനിമലിന്‍റേയും ബാനറിൽ ഫഹദ് ഫാസിൽ, ജിതു മാധവൻ എന്നിവർ ചേർന്നാണ് നിർമാണം. സൂപ്പർ ഹിറ്റ് ചിത്രങ്ങളായ 'രോമാഞ്ചം', 'ആവേശം' എന്നീ ചിത്രങ്ങളുടെ സംവിധായകനായ ജിത്തു മാധവൻ രചന നിർവഹിക്കുന്നതാണ് ചിത്രമെന്ന പ്രത്യേകതയും പൈങ്കിളിക്കുണ്ട്. ചുരുളി, ജാൻ എ. മൻ, രോമാഞ്ചം, നെയ്മർ, ചാവേർ തുടങ്ങിയ ഒട്ടേറെ സിനിമകളിൽ ചെറുതും വലുതുമായ വേഷങ്ങളിൽ സജിൻ ഗോപു എത്തിയിട്ടുണ്ട്. എന്നാൽ ഇതാദ്യമായാണ് താരം നായകനാകുന്നത്.

ചന്തു സലിംകുമാർ, അബു സലിം, ജിസ്മ വിമൽ, ലിജോ ജോസ് പെല്ലിശ്ശേരി, റിയാസ് ഖാൻ, അശ്വതി ബി, അമ്പിളി അയ്യപ്പൻ, പ്രമോദ് ഉപ്പു, അല്ലുപ്പൻ, ശാരദാമ്മ, വിജയ് ജേക്കബ്, ദേവനന്ദ, ദീപു പണിക്കർ, സുനിത ജോയ്, ജൂഡ്സൺ, അജയ്, സുലേഖ, പ്രണവ് യേശുദാസ്, ഷിബുകുട്ടൻ, അരവിന്ദ്, പുരുഷോത്തമൻ, നിഖിൽ, സുകുമാരൻ തുടങ്ങി നിരവധി താരങ്ങളാണ് ചിത്രത്തിൽ അഭിനയിക്കുന്നത്.

ആഷിഖ് അബു ,ദിലീഷ് പോത്തൻ, ജോൺപോൾ ജോർജ്ജ്, വിഷ്ണു നാരായണൻ എന്നിവരുടെ അസിസ്റ്റന്റായി പ്രവർത്തിച്ച ശ്രീജിത്ത് ബാബു 'രോമാഞ്ചം', 'ആർ ഡി. എക്സ്' , 'ആവേശം' തുടങ്ങി നിരവധി ചിത്രങ്ങളിൽ അഭിനയിച്ചിട്ടുമുണ്ട്. അർ‍ജുൻ സേതു ഛായാഗ്രഹണം നിർവഹിക്കുന്ന ചിത്രത്തിന്റെ എഡിറ്റിംഗ് കിരൺ ദാസ് ആണ്. സംഗീതം ഒരുക്കുന്നത് ജസ്റ്റിൻ വർഗ്ഗീസാണ്.

ഓഡിയോഗ്രഫി വിഷ്ണു ഗോവിന്ദ്, ആർട്ട് കൃപേഷ് അയ്യപ്പൻകുട്ടി, കോസ്റ്റ്യും മഷർ ഹംസ, മേക്കപ്പ് ആർജി വയനാടൻ, എക്സി.പ്രൊഡ്യൂസർ മൊഹ്സിൻ ഖായീസ്, പ്രൊഡക്ഷൻ കൺട്രോളർ വിമൽ വിജയ്, ഫിനാൻസ് കൺട്രോളർ ശ്രീരാജ് എസ്.വി, ഗാനരചന വിനായക് ശശികുമാർ, വിതരണം ഭാവന സ്റ്റുഡിയോസ്, ചീഫ് അസോ. ഡയറക്ടർ അരുൺ അപ്പുക്കുട്ടൻ, സ്റ്റണ്ട് കലൈ കിങ്സൺ, സ്റ്റിൽസ് രോഹിത് കെ.എസ്, ഡിഐ പോയറ്റിക്, കളറിസ്റ്റ് ശ്രീക്ക് വാര്യർ, ടൈറ്റിൽ ഡിസൈൻ അഭിലാഷ് ചാക്കോ, പോസ്റ്റർ ഡിസൈൻ യെല്ലോ ടൂത്ത്, അസോ.ഡയറക്ടർമാർ അഭി ഈശ്വർ, ഫൈസൽ മുഹമ്മദ്, വിഎഫ്എക്സ് ടീം വിഎഫ്എക്സ് സ്റ്റുഡിയോ, കോറിയോഗ്രാഫർ വേദ, പിആർഒ ആതിര ദിൽജിത്ത്.