ധനുഷ്-നിത്യ മേനോൻ കോമ്പോ വീണ്ടും; 'ഇഡ്ലി കടൈ'യിലെ ആദ്യ ഗാനമെത്തി
ചെന്നൈ: മലയാളികൾക്ക് ഏറെ പ്രിയപ്പെട്ട തമിഴ് താരമാണ് ധനുഷ്. താരത്തിന്റെ ചിത്രങ്ങൾക്ക് കേരളത്തിലും വലിയ സ്വീകാര്യതയാണ് ലഭിക്കാറുള്ളത്. പവർ പാണ്ടി എന്ന ഹിറ്റ് ചിത്രത്തിന് ശേഷം ധനുഷ് സംവിധാനം നിർവഹിച്ച 'രായൻ' എന്ന ചിത്രം വലിയ പ്രേക്ഷക നിരൂപക ശ്രദ്ധ പിടിച്ച് പറ്റിയിരുന്നു. ധനുഷ് സംവിധാനം ചെയ്യുന്ന ഇഡ്ലി കടൈ' എന്ന ചിത്രത്തിന്റെ പ്രഖ്യാപനം എത്തിയത് മുതൽ വലിയ ആകാംക്ഷയിലാണ് ആരാധകർ.
തിരുച്ചിദ്രമ്പലം എന്ന സൂപ്പർ ഹിറ്റ് ചിത്രത്തിന് ശേഷം ധനുഷ്-നിത്യ മേനോൻ കോമ്പോ വീണ്ടും ഒന്നിക്കുന്നുവെന്നതാണ് 'ഇഡ്ലി കടൈ'യിലെ പ്രത്യേകത. ഇപ്പോഴിതാ ചിത്രത്തിലെ ഗാനം പുറത്ത് വിട്ടിരിക്കുകയാണ് അണിയറ പ്രവർത്തകർ. സ്വഗം എന്ന ഗാനമാണ് റിലേറ്റീസായത്. സംഗീതം നൽകിയിരിക്കുന്നത് ജിവി പ്രകാശ് കുമാറാണ്. ശ്വേത മോഹനും ധനുഷും ചേർന്നാണ് ഗാനം ആലപിച്ചിരിക്കുന്നത്. ധനുഷ് തന്നെയാണ് ഗാനം എഴുതിയിരിക്കുന്നതും.
പാ പാണ്ടി, രായൻ, വരാനിരിക്കുന്ന നിലാവ് എൻമേൽ എന്നടി കോബം എന്നീ ചിത്രങ്ങൾക്ക് ശേഷം ധനുഷ് സംവിധാനം ചെയ്യുന്ന നാലാമത്തെ ചിത്രമാണ് 'ഇഡ്ലി കടൈ'. നിത്യ മേനന്‍ നായികയാകുന്ന ചിത്രത്തിൽ ശാലിനി പാണ്ഡേ ആണ് മറ്റൊരു പ്രധാന കഥാപാത്രത്തെ അവതരിപ്പിക്കുന്നത്. വണ്ടര്‍ബാര്‍ ഫിലിംസ്, ഡ‍ോണ്‍ പിക്ചേഴ്സ് എന്നീ ബാനറുകളില്‍ ആകാശ് ഭാസ്കരനും ധനുഷും ചേര്‍ന്നാണ് ചിത്രത്തിന്റെ നിര്‍മ്മാണം. ചിത്രം ഒക്ടോബറിൽ റിലീസ് ചെയ്യുമെന്നാണ് വിവരം.
ജി വി പ്രകാശ് സംഗീത സംവിധാനം നിര്‍വ്വഹിക്കുന്ന ചിത്രത്തിന്റെ ഛായാഗ്രഹണം കിരണ്‍ കൗശിക് ആണ്. എഡിറ്റിംഗ് പ്രസന്ന ജി കെ, പ്രൊഡക്ഷന്‍ ഡിസൈന്‍ ജാക്കി, ആക്ഷന്‍ പി സി സ്റ്റണ്ട്സ്, കൊറിയോഗ്രഫി ബാബ ഭാസ്കര്‍, വസ്ത്രാലങ്കാരം കാവ്യ ശ്രീറാം, വിഎഫ്എക്സ് സൂപ്പര്‍വൈസര്‍ പ്രവീണ്‍ ഡി, മേക്കപ്പ് ബി രാജ, സ്റ്റില്‍സ് തേനി മുരുകന്‍, പബ്ലിസിറ്റി ഡിസൈന്‍ കപിലന്‍, പിആര്‍ഒ റിയാസ് കെ അഹമ്മദ്.