'മോഹൻലാൽ ഇഷ്ട നടൻ, ആ വേഷം അഭിനയിക്കാൻ മമ്മൂട്ടി കാണിച്ച ധൈര്യം അഭിനന്ദനാർഹം'; മലയാളത്തിൽ സിനിമകൾ ചെയ്യാൻ ആഗ്രഹമുണ്ടെന്ന് ബോളിവുഡ് താരം ജോൺ അബ്രഹാം

മുംബൈ: മലയാള സിനിമയെ പ്രശംസിച്ച് ബോളിവുഡ് നടനും നിർമ്മാതാവുമായ ജോൺ എബ്രഹാം. മമ്മൂട്ടി നായകനായ 'കാതൽ - ദി കോർ' എന്ന ചിത്രത്തിലെ പ്രകടനത്തെ പ്രശാസിച്ച താരം മലയാളത്തിലെ ഇഷ്ട നടൻ മോഹൻലാൽ ആണെന്നും വ്യക്തമാക്കി. കേരളത്തിൽ ഒരു 'റൈറ്റേഴ്സ് റൂം' സ്ഥാപിച്ചിട്ടുണ്ടെന്നും മലയാളത്തിൽ കൂടുതൽ സിനിമകൾ നിർമ്മിക്കാനുള്ള പദ്ധതിയുണ്ടെന്നും ജോൺ എബ്രഹാം പറയുന്നു.

ഒരു ദേശീയ മാധ്യമത്തിന് നൽകിയ അഭിമുഖത്തിലാണ് ജോൺ എബ്രഹാം മലയാള സിനിമയോടുള്ള ഇഷ്ടം വ്യക്തമാക്കിയത്. മലയാള ചലച്ചിത്ര മേഖല വളരെ ധീരമായി പ്രവർത്തിക്കുന്നു. ഇന്ത്യയിലെ ഏറ്റവും മികച്ച ചില സിനിമകൾ സമ്മാനിക്കുന്നത് മലയാളമാണെന്നും അദ്ദേഹം അഭിപ്രായപ്പെട്ടു. സൂപ്പർസ്റ്റാർ മോഹൻലാലിനെ തൻ്റെ ഏറ്റവും പ്രിയപ്പെട്ട നടൻ എന്ന് വിശേഷിപ്പിച്ച ജോൺ, ഹോളിവുഡ് നടി മെറിൽ സ്ട്രീപിനോടുള്ള ആരാധനയും പങ്കുവെച്ചു.

'കാതൽ - ദി കോർ' എന്ന ചിത്രത്തിൽ സ്വവർഗാനുരാഗിയായ ഒരു രാഷ്ട്രീയക്കാരൻ്റെ വേഷം അവതരിപ്പിക്കാൻ മമ്മൂട്ടി കാണിച്ച ധൈര്യത്തെ ജോൺ എബ്രഹാം പ്രത്യേകം അഭിനന്ദിച്ചു. 'ഒരു രാഷ്ട്രീയക്കാരനായി മമ്മൂട്ടി അഭിനയിക്കുന്നു, ആ സിനിമയിൽ അദ്ദേഹം ഒരു സ്വവർഗാനുരാഗിയാണ്, അത്തരമൊരു സിനിമ ചെയ്യാൻ ആ മനുഷ്യൻ കാണിച്ച ധൈര്യം വലുതാണ്'

ദേശീയ തലത്തിലും പ്രാദേശിക തലത്തിലും പ്രേക്ഷകരെ ആകർഷിക്കുന്ന ആശയങ്ങൾ വികസിപ്പിക്കുക എന്ന ലക്ഷ്യത്തോടെയാണ് കേരളത്തിൽ റൈറ്റേഴ്സ് റൂം ആരംഭിക്കുന്നതെന്ന് അദ്ദേഹം വ്യക്തമാക്കി. അതേസമയം, ജോൺ എബ്രഹാം നായകനാകുന്ന 'ടെഹ്‌റാൻ' എന്ന ചിത്രം ഓഗസ്റ്റ് 14-ന് സീ5-ലൂടെ റിലീസിനൊരുങ്ങുകയാണ്.