ആദ്യം അന്നയെ കാണുന്നത് മാട്രിമോണി വഴി; പിന്നെ ഞങ്ങൾ സംസാരിച്ചു തുടങ്ങി; അങ്ങനെ ഓരോന്ന് മിണ്ടിയും പറഞ്ഞു വിവാഹം വരെയെത്തി; തുറന്നുപറഞ്ഞ് ജോസഫ് അന്നംകുട്ടി

കൊച്ചി: പ്രമുഖ റേഡിയോ ജോക്കിയും നടനും എഴുത്തുകാരനുമായ ജോസഫ് അന്നംകുട്ടി ജോസ് തൻ്റെ ലളിതമായ വിവാഹത്തെക്കുറിച്ചും പങ്കാളിയായ അന്നയെ കണ്ടുമുട്ടിയതിനെക്കുറിച്ചും തുറന്നുപറഞ്ഞത് ഏറെ ശ്രദ്ധേയമായി. ഇൻസ്റ്റഗ്രാമിലൂടെ പങ്കുവെച്ച വീഡിയോയിൽ, മാട്രിമോണി വഴി പങ്കാളിയെ കണ്ടെത്തുകയില്ലെന്ന തൻ്റെ പ്രതിജ്ഞ തെറ്റിക്കേണ്ടി വന്നതിൻ്റെ കാരണമാണ് ജോസഫ് വിശദീകരിച്ചത്.

നിരവധി വേദികളിൽ മോട്ടിവേഷണൽ സ്പീക്കറായും തിളങ്ങിയ ജോസഫ്, അന്നയുമായുള്ള വിവാഹം വളരെ ലളിതമായിട്ടാണ് നടത്തിയത്. ജീവിതത്തിലെ ഏറ്റവും ലളിതമായ ചടങ്ങായിരുന്നു ഇതെന്നും അന്നയുടെ അമ്മയാണ് തനിക്ക് മാട്രിമോണിയിൽ റിക്വസ്റ്റ് അയച്ചതെന്നും അദ്ദേഹം വെളിപ്പെടുത്തി. തൻ്റെ പ്രതിജ്ഞ തെറ്റിക്കേണ്ടി വന്നുവെങ്കിലും, അന്നയുമായുള്ള സംസാരങ്ങൾ സമയത്തെ അതിജീവിക്കുന്നതായിരുന്നെന്നും ഒരു മണിക്കൂറോളം നീണ്ട സംഭാഷണങ്ങൾ പിന്നീട് വിവാഹത്തിലേക്ക് നയിക്കുകയായിരുന്നെന്നും ജോസഫ് കൂട്ടിച്ചേർത്തു.

വിവാഹദിവസത്തെ ഓർമ്മകൾ പങ്കുവെച്ചുകൊണ്ട്, ആഘോഷങ്ങൾക്ക് പകരം ഹൃദ്യമായ സംഭാഷണങ്ങൾ, അലങ്കാരങ്ങൾക്ക് പകരം നിശബ്ദമായ പ്രാർത്ഥനകൾ, അടുത്തുള്ള ആൾക്കൂട്ടത്തിന് പകരം അകലെ നിന്ന് ആശംസകളുമായി എത്തിയ പ്രിയപ്പെട്ടവരുടെ സ്നേഹം എന്നിവയാണ് തങ്ങളുടേത് എന്ന് ജോസഫ് കുറിച്ചു. വേണ്ടെന്ന് വെച്ച ആഘോഷങ്ങൾക്ക് പകരം മറ്റാർക്കെങ്കിലും അവരുടെ സന്തോഷത്തിൻ്റെ തറക്കല്ല് വീണിട്ടുണ്ടാവുമെന്നും അദ്ദേഹം കൂട്ടിച്ചേർത്തു.