'ഒരു കാലത്ത് മോഹൻലാലിന്റെ നായിക, ഇന്ന് ചാൻസ് തേടി നടക്കുന്നുണ്ടാകും'; ഫെയ്സ്ബുക്ക് കുറിപ്പുമായി ഗാനരചയിതാവ് അജീഷ് ദാസൻ; ആ നായിക ഉണ്ണിമേരിയല്ലേയെന്ന് കമന്റ്

കൊച്ചി: ഒരു കാലത്ത് മലയാള സിനിമാ ലോകത്ത് തിളങ്ങി നിന്നിരുന്ന ഒരു പ്രമുഖ നടി ഇന്ന് സാമ്പത്തികമായി കടുത്ത ബുദ്ധിമുട്ടിലാണെന്നും, ഒരു നേരത്തെ ഭക്ഷണത്തിനു പോലും വകയില്ലാതെ സിനിമകളിൽ അവസരം തേടി നടക്കുകയാണെന്നും ഗാനരചയിതാവ് അജീഷ് ദാസൻ. ഫെയ്സ്ബുക്ക് പോസ്റ്റിലൂടെയാണ് അദ്ദേഹം ഈ ഞെട്ടിപ്പിക്കുന്ന വെളിപ്പെടുത്തൽ നടത്തിയത്. അതേസമയം അജീഷ് ദാസൻ ഉദ്ദേശിച്ച് നായിക ഉണ്ണിമേരി അല്ലേയെന്നും കമന്റുകളിൽ ചോദ്യം ഉയരുന്നുണ്ട്.

ഫെയ്സ്ബുക്ക് കുറിപ്പിന്റെ പൂർണരൂപം

കുറച്ചു നാൾ മുൻപ് ഒരു സിനിമയ്ക്ക് വേണ്ടി പാട്ടെഴുതാൻ എറണാകുളത്തെ വൈറ്റ് ഫോർട്ട്‌ ഹോട്ടലിൽ ഞാൻ പോയി.. രണ്ടു ദിവസമായി അവിടെ തന്നെയാണ് ഊണും ഉറക്കവും.. പാട്ട് മാത്രം എഴുതുന്നില്ല.. എനിക്ക് നല്ല ടെൻഷനും ഉണ്ട്.. എഴുതിയില്ലെങ്കിൽ എന്റെ കുത്തിനു പിടിച്ചു പൈസ മേടിക്കുമോ എന്ന് പേടിയും ഉണ്ട്.. അങ്ങനെ ഇരിക്കുമ്പോൾ ഡയറക്ടറുടെ മുറിയിലേക്ക് ഒരു മധ്യവയസ്കയായ സ്ത്രീ വരുന്നത് കണ്ടു..

അവർ തമ്മിൽ എന്തോ സംസാരിക്കുന്നുണ്ട്.. എനിക്ക് എന്തു കാര്യം എന്ന് കരുതി ഞാൻ തല കുമ്പിട്ടിരുന്ന് എഴുത്ത് തുടർന്നു.. ആ സ്ത്രീ പോയതിനു ശേഷം ഡയറക്ടർ എന്റെ അടുത്ത് വന്നിട്ട് പറഞ്ഞു.."നമ്മുടെ ഈ സിനിമയിൽ ഒരു ചാൻസ് കിട്ടുമോ എന്ന് ചോദിച്ചു വന്നതാണ്.. അവർക്കു വേണ്ടിയല്ല.. അവർ ഒരു ആയ ആണ്.. താഴെ കാറിൽ ഒരു വലിയ നടി ഇരിപ്പുണ്ട്.. " ആരാണ് ചേട്ടാ ആ നടി? എനിക്ക് അത് അറിയാൻ ഒരു ആഗ്രഹം.. ഡയറക്ടർ ആ നടിയുടെ പേര് പറഞ്ഞു..

ഞാൻ ഞെട്ടിപ്പോയി.. ഒരു കാലത്ത്, മലയാള സിനിമയുടെ ഏറ്റവും വലിയ സൗഭാഗ്യമെന്നോ, സൗന്ദര്യമെന്നോ ഒക്കെ ലോകം വാഴ്ത്തിയ നടി.. നിഷ്കളങ്കമായ ആ ചിരിയിൽ വീണുപോവാത്തവരായി ആരുമുണ്ടാവില്ല... ഇന്ന് അവർ ഒരു നേരം നല്ല ഭക്ഷണത്തിനു പോലും വക ഇല്ലാതെ ചാൻസ് ചോദിച്ചു നടക്കുന്നു....എന്തൊരു ലോകമാണ് ഇത്... ദൈവമേ...ഞാൻ പേന മടക്കി.. എന്ത് എഴുതാൻ...

കഴിഞ്ഞ ദിവസം ലാലേട്ടൻ, ഇന്ത്യയിലെ പരമോന്നത സിനിമാ ബഹുമതി സ്വീകരിച്ചു കൊണ്ട് നടത്തിയ പ്രസംഗത്തിന്റെ അവസാനം രണ്ടു വരികൾ TV യിൽ കണ്ടപ്പോൾ, കേട്ടപ്പോൾ എനിക്ക് ആ നടിയെ ഓർമ്മ വന്നു..

"ചിതയിലാഴ്ന്നുപോയതുമല്ലോ

ചിര മനോഹരമായപൂവിത്..."

ഒരു കാലത്ത് മോഹൻലാലിന്റെ ഉൾപ്പെടെ നായികയായിരുന്ന ആ വലിയ താരം ഒരുപക്ഷേ, ഞാൻ ഈ കുറിപ്പ് എഴുതുന്ന നിമിഷവും ഒരു പുതിയ സിനിമയിൽ ചാൻസ് ചോദിച്ചു ഏതെങ്കിലും ഒരിടത്ത് കാത്തു നിൽക്കുന്നുണ്ടാവാം.. ഇന്ന് ഞാൻ അവർക്ക് വേണ്ടി പ്രാർത്ഥിക്കുന്നു..

Full View

നടൻ മോഹൻലാലിൻ്റെ നായികയായിരുന്ന താരം പോലും ഇന്ന് അവസരങ്ങൾക്കായി കാത്തുനിൽക്കേണ്ടി വരുന്നു എന്നുള്ളത് ഏറെ സങ്കടകരമായ കാര്യമാണ്. സംഭവം പുറത്തുവന്നതോടെ, അജീഷ് ദാസൻ പറഞ്ഞ ആ നടി ആരാണെന്ന് കണ്ടെത്താനുള്ള ആകാംക്ഷയിലാണ് പ്രേക്ഷകർ. സിനിമയിൽ സജീവമായിരുന്ന ഉണ്ണി മേരിയുടെ പേരും ചിലർ കമന്റുകളായി പങ്കുവെക്കുന്നുണ്ട്.