മാത്യു തോമസിന് നായികയായി ഈച്ച; ശ്രദ്ധ നേടി ഫാന്‍റസി കോമഡി ഡ്രാമ 'ലൗലി' യുടെ പുതിയ പോസ്റ്റർ
മികച്ച കഥാപാത്രങ്ങളിലൂടെ പ്രേക്ഷരുടെ പ്രിയ താരമായി മാറിയ യുവനടനാണ് മാത്യു തോമസ്. ചെറിയ കാലയളവിൽ തന്നെ വ്യത്യസ്തമായ വേഷങ്ങളിൽ മികച്ച പ്രകടനം കാഴ്ചവെക്കാൻ താരത്തിനായി. ഇപ്പോളിതാ താരം ഫാന്‍റസി കോമഡി ഡ്രാമയുമായി പ്രേക്ഷകർക്ക് മുന്നിലെത്താൻ തയ്യാറെടുക്കുകയാണ്. ദിലീഷ് കരുണാകരൻ തിരക്കഥയെഴുതി സംവിധാനം ചെയ്യുന്ന ലൗലി എന്ന സിനിമയുടെ പുതിയ പോസ്റ്റർ ശ്രദ്ധനേടുകയാണ്. ഏറ്റവും കൗതുകമുണർത്തുന്നത് ചിത്രത്തിൽ നായികയായി എത്തുന്നത് ഒരു ഈച്ചയാണെന്നതാണ്.
അടുത്ത വർഷം ജനുവരിയിലായാണ് ചിത്രത്തിന്റെ റിലീസിന് തീരുമാനിച്ചിരിക്കുന്നത്. ഹോളിവുഡ് സ്റ്റൈലിലാണ് ചിത്രത്തിൽ നായികയായെത്തുന്ന ഈച്ചയ്ക്ക് ശബ്ദം കൊടുത്തിരിക്കുന്നതെന്ന് സംവിധായകൻ ദിലീഷ് കരുണാകരൻ പറഞ്ഞിരുന്നു. ഹോളിവുഡിലൊക്കെ ആനിമേറ്റഡ് ക്യാരക്ടറുകള്‍ പ്രധാന കഥാപാത്രങ്ങളായെത്തുന്ന ചിത്രങ്ങളിൽ സിനിമാ താരങ്ങൾ തന്നെ ശബ്ദം നൽകാറുണ്ട്. നടി ഉണ്ണിമായ പ്രസാദാണ് 'ലൗലി'യിൽ ഈച്ചക്ക് ശബ്ദം നൽകുന്നത്. 'ടമാര്‍ പഠാര്‍' എന്ന ചിത്രത്തിന് ശേഷം ദിലീഷ് കരുണാകരൻ ഒരുക്കുന്ന സിനിമ കൂടിയാണിത്.
മനോജ് കെ ജയൻ, ഉണ്ണിമായ, കെ.പി.എ.സി ലീല തുടങ്ങിയവരാണ് ചിത്രത്തിൽ പ്രധാനവേഷത്തിലെത്തുന്നത്. ചിത്രത്തിന്റെ ഛായാഗ്രഹണം നിർവഹിക്കുന്നത് സംവിധായകൻ ആഷിഖ് അബുവാണ്. വിഷ്ണു വിജയ് സംഗീത സംവിധാനം നിർവഹിക്കുന്ന സിനിമയുടെ എഡിറ്റിംഗ് കിരൺ ദാസ് ആണ്.
പ്രൊഡക്ഷൻ ഡിസൈൻ ജ്യോതിഷ് ശങ്കർ, കോ പ്രൊഡ്യൂസർ പ്രമോജ് ജി ഗോപാൽ, ആർട്ട് കൃപേഷ് അയ്യപ്പൻകുട്ടി, പ്രൊഡക്ഷൻ കൺട്രോളർ കിഷോർ പുരക്കാട്ടിരി, സിജിഐ ആൻഡ് വിഎഫ്എക്സ് ലിറ്റിൽ ഹിപ്പോ സ്റ്റുഡിയോസ്, ക്യാരക്ടർ ഡിസൈൻ അഭിലാഷ്, കോസ്റ്റ്യൂം ദീപ്തി അനുരാഗ്, സൗണ്ട് ഡിസൈൻ നിക്സൺ ജോർജ്ജ്, ഗാനരചന സുഹൈൽ കോയ, ചീഫ് അസോസിയേറ്റ് ഡയറക്ടർ ഹരീഷ് തെക്കേപ്പാട്ട്, വെതർ സപ്പോർട്ട് അഭിലാഷ് ജോസഫ്, ആക്ഷൻ കോറിയോഗ്രഫി കലൈ കിങ്സൺ, ഡിഐ കളർ പ്ലാനറ്റ് സ്റ്റുഡിയോസ്, പിആർഒ എഎസ് ദിനേശ്, ആതിര ദിൽജിത്ത്, സ്റ്റിൽസ് ആർ റോഷൻ, പബ്ലിസിറ്റി ഡിസൈൻ യെല്ലോ ടൂത്ത്സ്, മീഡിയ ഡിസൈൻസ് ഡ്രിപ്‍വേവ് കളക്ടീവ്.