'പല സൂപ്പർ താരങ്ങളും ചെയ്യാൻ മടിച്ച വേഷം, സൽമാൻ ഖാൻ അഭിനയിച്ചത് വെറും ഒരു രൂപയ്ക്ക്'; ഒടുവിൽ സിനിമയുടെ സാമൂഹിക സന്ദേശം വലിയ ചർച്ചയായി; വെളിപ്പെടുത്തലുമായി നിർമ്മാതാവ്

മുംബൈ: ബോളിവുഡ് സൂപ്പർ താരം സൽമാൻ ഖാൻ 2004-ൽ പുറത്തിറങ്ങിയ 'ഫിർ മിലേംഗെ' എന്ന ചിത്രത്തിൽ എച്ച്‌ഐവി ബാധിതനായ കഥാപാത്രത്തെ അവതരിപ്പിച്ചത് ഒരു രൂപ മാത്രം പ്രതിഫലം വാങ്ങിയാണെന്ന് വെളിപ്പെടുത്തി നിർമ്മാതാവ് ശൈലേന്ദ്ര സിംഗ്. എച്ച്‌ഐവി ബാധിതനായി മരണപ്പെടുന്ന ഒരു യുവ നായകന്റെ കഥാപാത്രത്തെ അവതരിപ്പിക്കാൻ ബോളിവുഡിലെ പ്രമുഖ താരങ്ങൾ മടികാണിച്ചപ്പോഴാണ് സൽമാൻ ഖാൻ ഈ വെല്ലുവിളി ഏറ്റെടുത്തത്.

യുവതലമുറയുടെ പ്രതീകവും 'ഇന്ത്യയുടെ റാംബോയും ടെർമിനേറ്ററും സൂപ്പർമാനും' എന്നെല്ലാം അറിയപ്പെട്ടിരുന്ന സൽമാൻ ഖാനെ എച്ച്‌ഐവി ബാധിതനായും തുടർന്ന് മരണപ്പെടുന്നതായും ചിത്രീകരിക്കാൻ പ്രേരിപ്പിക്കുക എന്നത് വലിയ വെല്ലുവിളിയായിരുന്നുവെന്ന് ശൈലേന്ദ്ര സിംഗ് പറയുന്നു. ബോളിവുഡിലെ പല പ്രമുഖരും ഈ വേഷം നിരസിച്ചതിന് ശേഷമാണ് താൻ സൽമാൻ ഖാനെ സമീപിച്ചതെന്നും അദ്ദേഹം കൂട്ടിച്ചേർത്തു.

സൗജന്യമായി അഭിനയിക്കാൻ സൽമാൻ ഖാൻ തയ്യാറായിരുന്നുവെങ്കിലും, താൻ നിർബന്ധിച്ചതിനാലാണ് അദ്ദേഹം ഒരു രൂപ പ്രതിഫലമായി വാങ്ങിയതെന്ന് നിർമ്മാതാവ് ഓർമ്മിക്കുന്നു. ചിത്രത്തിന്റെ ക്ലൈമാക്സിൽ സൽമാന്റെ കഥാപാത്രം മരണപ്പെടുന്നത് ആരാധകർക്ക് അത്ര ഇഷ്ടപ്പെട്ടില്ലെങ്കിലും, അദ്ദേഹത്തിന്റെ സാന്നിധ്യം കാരണം സിനിമയുടെ സാമൂഹിക സന്ദേശം വലിയ ചർച്ചാവിഷയമായി മാറിയെന്ന് സിംഗ് വ്യക്തമാക്കി. ശിൽപ ഷെട്ടി, അഭിഷേക് ബച്ചൻ എന്നിവരും ചിത്രത്തിൽ പ്രധാന വേഷങ്ങളിൽ എത്തിയിരുന്നു.

സമീപകാലത്ത് താൽപര്യമില്ലാതെ അഭിനയിക്കുന്നു എന്ന വിമർശനങ്ങൾ സൽമാൻ ഖാന് നേരെ ഉയർന്നിട്ടുണ്ടെങ്കിലും, കരിയറിൽ മറ്റാരും ചെയ്യാൻ മടിച്ച പല കഥാപാത്രങ്ങളെയും അവതരിപ്പിക്കാൻ അദ്ദേഹം ധൈര്യം കാണിച്ചിട്ടുണ്ട്. കഴിഞ്ഞ ഡിസംബർ 27-ന് 60 വയസ്സ് തികഞ്ഞ സൽമാൻ ഖാന്റെ കരിയറും ജീവിതവും എന്നും മാധ്യമങ്ങളിൽ നിറഞ്ഞുനിൽക്കുന്ന വിഷയങ്ങളാണ്.