'ഞങ്ങളെ ഒതുക്കാനുള്ള പരിപാടി ആണല്ലേ'; ബേസിൽ ജോസഫ് പങ്കുവെച്ച ചിത്രത്തിന് നസ്ലെന്റെ കമ്മന്റ്; ഇവനെ ഇനിയും വളരാൻ അനുവദിച്ചുകൂടെന്ന് ടൊവിനോ; ചിരിപടർത്തി സന്ദീപ് പ്രദീപിന്റെ പ്രതികരണം

കൊച്ചി: നടനും സംവിധായകനുമായ ബേസിൽ ജോസഫിന്റെ പുതിയ ചിത്രമായ 'അതിരടി'യിലെ കഥാപാത്രത്തിന്റെ ലുക്ക് സമൂഹമാധ്യമങ്ങളിൽ തരംഗമായി മാറിയിരിക്കുകയാണ്. ബേസിൽ പങ്കുവെച്ച ചിത്രത്തിന്റെ പോസ്റ്ററിൽ നസ്ലെന്റെയും നടൻ ടൊവിനോ തോമസിന്റെയുമടക്കമുള്ള താരങ്ങളുടെ തമാശ നിറഞ്ഞ പ്രതികരണങ്ങൾ ആരാധകർക്കിടയിൽ ചിരി പടർത്തുകയാണ്.

അരുൺ അനിരുദ്ധ് സംവിധാനം ചെയ്യുന്ന 'അതിരടി'യിൽ 'സാം ബോയ്' എന്ന കഥാപാത്രത്തെയാണ് ബേസിൽ ജോസഫ് അവതരിപ്പിക്കുന്നത്. 'സാം കുട്ടി' എന്ന പേരിലും അറിയപ്പെടുന്ന ഈ കഥാപാത്രത്തിന്റെ ലുക്കിലുള്ള ചിത്രം കഴിഞ്ഞ ദിവസം ബേസിൽ സമൂഹമാധ്യമങ്ങളിൽ പങ്കുവെച്ചിരുന്നു. മുടി നീട്ടി വളർത്തി, "മീറ്റ് സാം ബോയ്, റോൾ നമ്പർ 31, ബിടെക് ഫസ്റ്റ് ഇയർ" എന്ന അടിക്കുറിപ്പോടെയാണ് താരം ചിത്രം പങ്കുവെച്ചത്. ബേസിലും അനന്തു എസും ചേർന്നാണ് ചിത്രത്തിന്റെ നിർമ്മാണം.

നിരവധി താരങ്ങൾ ബേസിലിന്റെ പുതിയ ലുക്കിന് താഴെ കമന്റുകളുമായി എത്തിയിരുന്നു. "എയ്ജ് ഇന്‍ റിവേഴ്‌സ് ഗിയര്‍" എന്നായിരുന്നു ചിത്രത്തിൽ ഒരു പ്രധാന വേഷത്തിലെത്തുന്ന ടൊവിനോ തോമസിന്റെ കമന്റ്. "ചെറുപ്പക്കാരൻ തന്നെ" എന്ന് നിഖില വിമൽ കുറിച്ചപ്പോൾ, കല്യാണി പ്രിയദർശൻ, ആന്റണി വർഗീസ് പെപ്പെ, നൈല ഉഷ തുടങ്ങിയവരും കമന്റുകളുമായി രംഗത്തെത്തി.

എന്നാൽ, യുവനടൻ നസ്ലെന്റെ കമന്റാണ് സമൂഹമാധ്യമങ്ങളിൽ ഏറ്റവും കൂടുതൽ ശ്രദ്ധ നേടിയത്. "ഞങ്ങളെ ഒതുക്കാനുള്ള പരിപാടി ആണല്ലേ. ചതി ആയിപ്പോയി" എന്നായിരുന്നു നസ്ലെന്റെ പ്രതികരണം. ഇതിന് മറുപടിയായി ടൊവിനോ, "നീയാണ് അവന്റെ പ്രധാന ലക്ഷ്യം. ഇവനെ ഇനിയും വളരാൻ അനുവദിച്ചുകൂട" എന്ന് നസ്ലെനോട് പറഞ്ഞു. തുടർന്ന് ബേസിലും മറുപടിയുമായി എത്തി: "നിന്റേയും ആ സന്ദീപിന്റേയും അഹങ്കാരം കുറച്ച് കൂടുന്നുണ്ട്. ശരിയാക്കിത്തരാം."

ഒപ്പം ടൊവിനോയോട് "നമ്മൾ ഒരു ടീമല്ലേ. ലാസ്റ്റ് ഞാൻ മാത്രമേ കാണൂ. ഓർത്തോ" എന്നും ബേസിൽ തമാശയായി പറഞ്ഞു. ഇതിനിടെ, "സിനിമ സംവിധാനം ചെയ്യാൻ പൊയ്ക്കൂടെ" എന്ന് സന്ദീപ് പ്രദീപ് ബേസിലിനോട് ചോദിച്ചു. ഇതിനെല്ലാം മറുപടിയായി "മൊട്ട വെക്കേണ്ട ആളുകളുടെ എണ്ണം രണ്ടായി. ബേസിൽ, സന്ദീപ്" എന്ന് നസ്ലെൻ കുറിച്ചതോടെ താരങ്ങൾക്കിടയിലെ സംഭാഷണം കൂടുതൽ രസകരമായി.