യുദ്ധഭൂമിയിലേക്ക് ഇവന്മാർ രണ്ടുംകല്പിച്ച് ഇരച്ചെത്തുന്നത് കണ്ടാൽ ഒന്ന് പേടിക്കണം; മറ്റ് രാജ്യങ്ങളിൽ വളരെ ശാന്തമായി പെരുമാറുന്നവൻ ഇങ്ങ് മിഡിൽ ഈസ്റ്റിൽ എത്തിയാൽ കാണിക്കുന്നത് മറ്റൊരു സ്വഭാവം; മിസൈൽ ലോഞ്ചറായി പണിയെടുക്കുന്നത് പ്രധാന പരിപാടി; ഈ പിക്കപ്പ് ട്രക്ക് വെറുമൊരു വണ്ടിയല്ല; ജപ്പാന്റെ കരുത്തായ ടൊയോട്ട 'ഹൈലക്സ്' ആള് പുലിയാണ്

യുദ്ധഭൂമിയിൽ ടാങ്കുകളെയും കവചിത വാഹനങ്ങളെയും പോലെ തന്നെ ഇന്ന് ഭയം വിതയ്ക്കുന്ന ഒന്നായി ജപ്പാന്റെ കരുത്തായ ടൊയോട്ട ഹൈലക്സ് (Toyota Hilux) മാറിയിരിക്കുന്നു. ലോകത്തിന്റെ മറ്റ് ഭാഗങ്ങളിൽ വളരെ ശാന്തനായും മാന്യനായും കുടുംബവാഹനമായും പെരുമാറുന്ന ഈ പിക്കപ്പ് ട്രക്ക്, മിഡിൽ ഈസ്റ്റിലെയും ആഫ്രിക്കയിലെയും യുദ്ധമേഖലകളിൽ എത്തിയാൽ ഭാവം മാറും. അവിടെ ഇവൻ വെറുമൊരു വാഹനമല്ല, മാരകമായ ഒരു മിസൈൽ ലോഞ്ചറാണ്.

പിൻഭാഗത്ത് വിമാനങ്ങളെ വെടിവെച്ചിടാൻ ശേഷിയുള്ള ആന്റി-എയർക്രാഫ്റ്റ് ഗണ്ണുകളോ മിസൈൽ ലോഞ്ചറുകളോ ഘടിപ്പിച്ചു കഴിഞ്ഞാൽ ഹൈലക്സ് ഒരു മിനി യുദ്ധക്കപ്പലായി മാറും. 1980-കളിൽ ലിബിയയും ചാഡും തമ്മിൽ നടന്ന യുദ്ധം 'ടൊയോട്ട യുദ്ധം' എന്ന് പോലും അറിയപ്പെട്ടിരുന്നു. അത്രത്തോളം നിർണ്ണായകമായിരുന്നു ഈ വാഹനത്തിന്റെ സാന്നിധ്യം.

അതുപോലെ, ആധുനിക യുദ്ധതന്ത്രങ്ങളിൽ നിർണായക സ്വാധീനം ചെലുത്തുന്ന ചാവേർ ഡ്രോണുകളുടെ തദ്ദേശീയ നിർമാണത്തിൽ ഇന്ത്യ സ്വയംപര്യാപ്തതയിലേക്ക്. ബെംഗളൂരു ആസ്ഥാനമായി പ്രവർത്തിക്കുന്ന പ്രതിരോധ സ്റ്റാർട്ടപ്പായ ന്യൂസ്‌പേസ് റിസർച്ച് ടെക്‌നോളജീസ് (എൻആർടി) വികസിപ്പിച്ചെടുത്ത 'ശേഷ്‌നാഗ്-150' എന്ന അത്യാധുനിക ചാവേർ ഡ്രോണുകളാണ് ഈ രംഗത്തെ ഇന്ത്യയുടെ പുതിയ മുന്നേറ്റം. ചെലവ് കുറഞ്ഞതും, മാരകമായ ദീർഘദൂര ആക്രമണ ശേഷിയുള്ളതുമായ ഈ ഡ്രോണുകൾക്ക് മൊബൈൽ ലോഞ്ച് പാഡായി ഉപയോഗിക്കുന്നത് ജാപ്പനീസ് വാഹന ഭീമനായ ടൊയോട്ടയുടെ കരുത്തുറ്റ ഹൈലക്സ് പിക്കപ്പ് ട്രക്കാണെന്നതാണ് ഈ റിപ്പോർട്ടുകളിലെ പ്രധാന ആകർഷണം. കഴിഞ്ഞദിവസമാണ് 'ശേഷ്‌നാഗ്-150' യുടെ സാങ്കേതിക മികവുകൾ വെളിപ്പെടുത്തുന്ന റിപ്പോർട്ടുകളും ചിത്രങ്ങളും പുറത്തുവന്നത്.

സമീപകാലത്തെ ആഗോള സംഘർഷങ്ങൾ, പ്രത്യേകിച്ച് റഷ്യ-യുക്രൈൻ യുദ്ധം, ചാവേർ ഡ്രോണുകളുടെ യുദ്ധക്കളത്തിലെ പ്രാധാന്യം അടിവരയിടുന്നു. യുക്രൈൻ യുദ്ധകാലത്തായിരുന്നു ഡ്രോണുകൾ യുദ്ധഭൂമിയിലെ നിർണായക ആയുധമായി മാറിയത്. ഇറാനിൽ നിന്ന് സ്വന്തമാക്കിയ ഷഹീദ് ഡ്രോണുകളുടെ സാങ്കേതിക വിദ്യ ഉപയോഗിച്ച് റഷ്യ ഇത്തരം ഡ്രോണുകൾ വ്യാപകമായി നിർമിക്കുകയും യുക്രൈനെതിരെ പ്രയോഗിക്കുകയും ചെയ്യുന്നുണ്ട്. നിരവധി പരിഷ്‌കാരങ്ങളും റഷ്യ ഇതിൽ വരുത്തിയിട്ടുണ്ട്.

സമാനമായി, അമേരിക്കയും 'ലൂകാസ്' (ലോ കോസ്റ്റ് അൺക്രൂവ്ഡ് കോംബാറ്റ് സിസ്റ്റം) എന്ന പേരിൽ ചെലവ് കുറഞ്ഞ ഡ്രോൺ സംവിധാനങ്ങൾ വികസിപ്പിക്കുകയും ഇറാന് നേരെ നടന്ന ആക്രമണങ്ങളിൽ ആദ്യമായി പ്രയോഗിക്കുകയും ചെയ്തു. ഇറാനും അമേരിക്കയും തമ്മിലുള്ള സംഘർഷങ്ങൾ തുടരുന്ന സാഹചര്യത്തിലും, 'ഓപ്പറേഷൻ സിന്ദൂർ' പോലുള്ള മുൻകാല സൈനിക നടപടികളിലും ഡ്രോണുകൾ വ്യാപകമായി ഉപയോഗിക്കപ്പെട്ടിട്ടുണ്ട്. ഈ ആഗോള പ്രവണതകൾക്കിടയിലാണ് ഇന്ത്യയുടെ ഈ തദ്ദേശീയ ഡ്രോൺ വികസനം കൂടുതൽ പ്രസക്തമാകുന്നത്.

'ശേഷ്‌നാഗ്-150' യുടെ സാങ്കേതിക വിശദാംശങ്ങൾക്കൊപ്പം വാഹന പ്രേമികളുടെയും പ്രതിരോധ നിരീക്ഷകരുടെയും ശ്രദ്ധ പിടിച്ചുപറ്റിയത് ഡ്രോണിന്റെ മൊബൈൽ ലോഞ്ച് പാഡായി ഉപയോഗിക്കുന്ന ടൊയോട്ട ഹൈലക്സ് പിക്കപ്പ് ട്രക്കാണ്. ക്യാബിൻ ഏരിയയിൽ ഡ്രോൺ വഹിച്ചുകൊണ്ടുള്ള ഹൈലക്സിന്റെ ചിത്രങ്ങൾ സാമൂഹിക മാധ്യമങ്ങളിൽ വ്യാപകമായി പ്രചരിച്ചു. ജാപ്പനീസ് കമ്പനിയായ ടൊയോട്ടയുടെ ഈ ട്രക്ക്, അതിന്റെ ഈടും ദുർഘടമായ ഭൂപ്രദേശങ്ങളെ നേരിടാനുള്ള കഴിവും കൊണ്ട് ഏറെ പ്രസിദ്ധമാണ്. ഈ പ്രത്യേകതകൾ കണക്കിലെടുത്താണ് ഹൈലക്സ് തിരഞ്ഞെടുത്തതെന്നാണ് അനുമാനം. സൈനിക ആവശ്യങ്ങൾക്ക് ഏറ്റവും പ്രയോജനകരമായ രീതിയിൽ എൻആർടി എഞ്ചിനീയർമാർ വാഹനത്തിൽ 'ശേഷ്‌നാഗ്-150' യെ കൃത്യമായി സജ്ജീകരിച്ചിട്ടുണ്ട്. ഇത് ഏത് തരം ഭൂപ്രകൃതിയിലും അതിവേഗം ഡ്രോൺ വിന്യസിക്കാൻ സൈന്യത്തെ സഹായിക്കും.

1968-ൽ അരങ്ങേറ്റം കുറിച്ച ടൊയോട്ട ഹൈലക്സ് പിക്കപ്പ് ട്രക്ക്, പതിറ്റാണ്ടുകളായി ലോകമെമ്പാടുമുള്ള ഉപയോക്താക്കളുടെ വിശ്വാസം പിടിച്ചുപറ്റിയിട്ടുണ്ട്. അതിന്റെ കരുത്തിനും വിശ്വാസ്യതയ്ക്കും പേരുകേട്ട ഈ വാഹനം, സാധാരണയായി 'നാശമില്ലാത്തത്' എന്നാണ് വിശേഷിപ്പിക്കപ്പെടുന്നത്. യുദ്ധമേഖലകളിലും ദുരന്തനിവാരണ പ്രവർത്തനങ്ങളിലും ഹൈലക്സിന്റെ പ്രാധാന്യം തെളിയിക്കപ്പെട്ടിട്ടുള്ളതാണ്. 2022-ൽ ഇന്ത്യൻ വിപണിയിലെത്തിയ ഹൈലക്സിന്റെ എട്ടാം തലമുറയാണ് ഇപ്പോൾ വിൽപ്പനയിലുള്ളത്. ഹൈലക്സിന്റെ കരുത്ത് പരീക്ഷിക്കുന്ന നിരവധി വീഡിയോകൾ സോഷ്യൽ മീഡിയയിൽ പ്രചാരത്തിലുണ്ട്. 'ശേഷ്‌നാഗ്-150' പോലുള്ള ഒരു ആധുനിക ഡ്രോണിന്റെ മൊബൈൽ ലോഞ്ച് പാഡായി ഈ ട്രക്ക് തിരഞ്ഞെടുക്കപ്പെട്ടത്, അതിന്റെ പ്രായോഗികതയും പ്രതിരോധ മേഖലയിലെ സാധ്യതകളും വർധിപ്പിക്കുന്നു. ഇന്ത്യൻ പ്രതിരോധനത്തിന് ജാപ്പനീസ് കരുത്ത് എന്ന വിശേഷണം ഇതിലൂടെ യാഥാർത്ഥ്യമാവുകയാണ്.

ചാവേർ ഡ്രോണുകൾ ആധുനിക യുദ്ധങ്ങളിൽ ചെലുത്തുന്ന സ്വാധീനം വർധിച്ചുവരുന്ന ഈ സാഹചര്യത്തിൽ, 'ശേഷ്‌നാഗ്-150' പോലുള്ള തദ്ദേശീയമായി വികസിപ്പിച്ചെടുത്ത സംവിധാനങ്ങൾ ഇന്ത്യൻ പ്രതിരോധത്തിന്റെ ശേഷി ഗണ്യമായി ഉയർത്തും. ഇത് രാജ്യത്തിന്റെ സൈനിക സ്വയംപര്യാപ്തതാ ലക്ഷ്യങ്ങൾക്ക് വലിയ ഊർജ്ജം പകരുകയും, ഭാവിയിലെ പ്രതിരോധ വെല്ലുവിളികളെ നേരിടാൻ ഇന്ത്യയെ കൂടുതൽ സജ്ജമാക്കുകയും ചെയ്യും.