രാത്രിയിൽ നല്ല ഉറക്കം കിട്ടിയില്ലെങ്കിൽ പണി കിട്ടും; ഈ അസുഖങ്ങൾ നിങ്ങളെ അപകടത്തിലാക്കും; വിദഗ്ദ്ധർ പറയുന്നത്

അമിതമായ ജോലിഭാരവും സമ്മർദ്ദവും കാരണം ഉറക്കമില്ലായ്മ അനുഭവിക്കുന്നവർക്ക് ഹൃദ്രോഗം, പക്ഷാഘാതം, വിഷാദരോഗം, ഉത്കണ്ഠ തുടങ്ങിയ ഗുരുതരമായ ആരോഗ്യപ്രശ്നങ്ങൾ ഉണ്ടാകാനുള്ള സാധ്യത വർദ്ധിക്കുന്നതായി വിദഗ്ദ്ധർ മുന്നറിയിപ്പ് നൽകുന്നു. രാത്രിയിലെ നല്ല ഉറക്കം ശരീരത്തിനും തലച്ചോറിനും അത്യാവശ്യമാണെങ്കിലും, നിരന്തരമായ ഉറക്കക്കുറവ് ശരീരത്തെയും മനസ്സിനെയും ദോഷകരമായി ബാധിക്കുമെന്ന തിരിച്ചറിവ് പലർക്കും ഇല്ലെന്ന് അവർ ചൂണ്ടിക്കാട്ടുന്നു.

ദൈർഘ്യമേറിയ തൊഴിൽ സമയം, ശബ്ദ-വായു മലിനീകരണം, വർദ്ധിച്ചുവരുന്ന മാനസികാരോഗ്യ പ്രശ്നങ്ങൾ എന്നിവയെല്ലാം ഇന്ത്യയിലെ യുവജനങ്ങളിൽ ഉറക്കം നഷ്ടപ്പെടുന്നതിന് കാരണമാകുന്ന ഘടകങ്ങളാണെന്ന് ആരോഗ്യവിദഗ്ദ്ധർ വ്യക്തമാക്കുന്നു. യുകെ ബയോബാങ്ക് നടത്തിയ പഠനത്തിൽ, ക്രമം തെറ്റിയ ഉറക്ക ശീലങ്ങൾ ഹൃദയസംബന്ധമായ പ്രശ്നങ്ങളുടെ സാധ്യത 25 ശതമാനം വർദ്ധിപ്പിക്കുന്നു എന്ന് കണ്ടെത്തിയിട്ടുണ്ട്. ഇൻസോമ്നിയ, ഒബ്സ്ട്രക്റ്റീവ് സ്ലീപ് അപ്നിയ (ഉറക്കത്തിൽ ശ്വാസം തടസ്സപ്പെടുന്നത്) തുടങ്ങിയ പ്രശ്നങ്ങൾ ഇന്ത്യയിൽ സാധാരണമായിക്കൊണ്ടിരിക്കുന്നു.

വിട്ടുമാറാത്ത ഉറക്കക്കുറവ് വിഷാദത്തിനും ഉത്കണ്ഠയ്ക്കും കാരണമാകുമെന്നും, ഉറക്കം മെച്ചപ്പെടുത്തിയാൽ 90 ശതമാനം മാനസിക പ്രശ്നങ്ങൾക്കും പരിഹാരമാകുമെന്നും പഠനങ്ങൾ തെളിയിക്കുന്നു. അടുത്തിടെ ഡൽഹിയിൽ 12 മുതൽ 18 വയസ്സുള്ള 1,521 വിദ്യാർത്ഥികളിൽ നടത്തിയ പഠനത്തിൽ, 22 ശതമാനം പേർക്ക് ഉറക്കക്കുറവ് അനുഭവപ്പെട്ടതായും, അതിൽ 60 ശതമാനം പേർക്ക് വിഷാദരോഗത്തിന്റെ ലക്ഷണങ്ങൾ ഉണ്ടായിരുന്നതായും കണ്ടെത്തി. ഇവരിൽ പലർക്കും അടിയന്തര മാനസിക പിന്തുണ ആവശ്യമായി വരുന്നു.

ഗുണമേന്മയുള്ള ഉറക്കം ലഭിക്കാൻ ഡോക്ടർമാർ ചില നിർദ്ദേശങ്ങൾ നൽകുന്നു. എല്ലാ ദിവസവും ഒരേ സമയം ഉറങ്ങാനും ഉണരാനും ശ്രമിക്കുക. പ്രതിദിനം ഏഴ് മുതൽ ഒമ്പത് മണിക്കൂർ വരെ ഗുണമേന്മയുള്ള ഉറക്കം ഉറപ്പാക്കുക. ആറ് മണിക്കൂറിൽ കുറഞ്ഞുള്ള ഉറക്കം അപകടകരമാണെന്ന് അവർ മുന്നറിയിപ്പ് നൽകുന്നു.