വീട്ടിലെ കുഞ്ഞനെ ഒന്ന് തലോടിയാൽ പിന്നെ കേൾക്കുന്നത് ഫ്ർർർ ശബ്ദം; 'പൂച്ച' സാറിന്റെ മൂളലിനെക്കുറിച്ചുള്ള സങ്കീർണ്ണമായ സത്യമെന്ത്?; പഠനങ്ങൾ പറയുന്നത്

പൂച്ചകൾ തലോടുമ്പോഴും കളിയാക്കുമ്പോഴും പുറപ്പെടുവിക്കുന്ന 'മുരൾച്ച' (purr) കേവലം സന്തോഷത്തിന്റെ മാത്രം സൂചനയല്ലെന്നും, അതിനപ്പുറം സങ്കീർണ്ണമായ ആശയവിനിമയ രീതി കൂടിയാണെന്നും പുതിയ കണ്ടെത്തലുകൾ സൂചിപ്പിക്കുന്നു. ഉടമകളുടെ മടിയിലിരുന്ന് സന്തോഷത്തോടെ പുറപ്പെടുവിക്കുന്ന ഈ ശബ്ദം, പൂച്ചകളുടെ ആശയവിനിമയത്തിന്റെ സമഗ്രമായ ചിത്രം നൽകുന്നില്ലെന്ന് വിദഗ്ധർ പറയുന്നു.

പൂച്ചകളുടെ മുരൾച്ചയുടെ പിന്നിലെ കാരണം ദീർഘകാലം ചർച്ചാവിഷയമായിരുന്നു. രക്തയോട്ടവുമായി ബന്ധപ്പെട്ടാണോ ഈ ശബ്ദം വരുന്നതെന്നായിരുന്നു ആദ്യകാലത്തെ നിഗമനങ്ങൾ. എന്നാൽ, സമീപകാല ഗവേഷണങ്ങൾ സൂചിപ്പിക്കുന്നത്, പൂച്ചകളുടെ സ്വനപേടകത്തിലെ (larynx) പേശികളാണ് ഇതിന് പിന്നിലെന്ന്. ഈ പേശികൾ വികസിക്കുകയും ചുരുങ്ങുകയും ചെയ്യുമ്പോൾ, ശ്വാസമെടുക്കുന്നതിനും പുറത്തുവിടുന്നതിനും അനുസരിച്ച് വായു കമ്പനം ചെയ്യുകയും മുരൾച്ച രൂപപ്പെടുകയുമാണ് ചെയ്യുന്നത്.

എങ്കിലും, ഈ പ്രതികരണത്തെ എന്താണ് യഥാർത്ഥത്തിൽ ഉത്തേജിപ്പിക്കുന്നതെന്ന കാര്യത്തിൽ വ്യക്തതയില്ല. പൂച്ചയുടെ തലച്ചോറിലുള്ള ഒരു പ്രത്യേക ന്യൂറൽ ഓസിലേറ്ററാണ് ഇതിന് പിന്നിലെന്നാണ് ശാസ്ത്രജ്ഞർ കരുതുന്നത്. എന്നാൽ, ഈ ഓസിലേറ്റർ പ്രവർത്തനക്ഷമമാകുന്നത് സന്തോഷമുള്ളപ്പോൾ മാത്രമാണോ എന്നത് സംശയമാണ്.

ലണ്ടനിലെ ഒരു പൂച്ച സംരക്ഷണ കേന്ദ്രത്തിലെ ഫോട്ടോഗ്രാഫറും ഫെലൈൻ സൈക്കോളജിയിൽ ബിരുദം നേടുന്നയാളുമായ മർജാൻ ഡെബെവേർ പറയുന്നതനുസരിച്ച്, ആളുകൾ ശ്രദ്ധിക്കുന്നത് പൂച്ചകൾ ഇഷ്ടമുള്ളിടത്ത് തലോടുമ്പോൾ മുരളുന്നതുമാത്രമാണ്. എന്നാൽ, ഉടമകൾ സമീപത്തില്ലാത്തപ്പോഴും പൂച്ചകൾ മുരളാറുണ്ട്. വ്യക്തി വ്യത്യാസപ്പെട്ടിരിക്കും മുരളുന്നതിന്റെ അളവ്. ചില പൂച്ചകൾ ഒരിക്കലും മുരളാറില്ല, മറ്റു ചിലർ നിരന്തരം മുരളും.

പൂച്ചകളുടെ മുരൾച്ച സന്തോഷം, സമാധാനം, സുഖം എന്നിവയെ സൂചിപ്പിക്കാമെങ്കിലും, വേദന, ഭയം, പരിഭ്രാന്തി തുടങ്ങിയ സാഹചര്യങ്ങളിലും അവ മുരളാറുണ്ട്. ഇത് അവയ്ക്ക് സ്വയം ആശ്വസിപ്പിക്കാനും സ്വാസ്ഥ്യം വീണ്ടെടുക്കാനും സഹായിക്കുന്ന ഒരു മാർഗ്ഗമായി കണക്കാക്കപ്പെടുന്നു.