എന്ത് ചെയ്താലും...സ്ത്രീകൾക്ക് എപ്പോഴും ക്ഷീണം; ഇത് ഒരു ജീവിതശൈലി പ്രശ്നമോ?; പ്രധാനപ്പെട്ട കാരണങ്ങൾ ഇതൊക്കെ

ജോലികഴിഞ്ഞെത്തുമ്പോഴോ വീട്ടിലെ തിരക്കുകൾക്കിടയിലോ അല്പം ക്ഷീണം തോന്നുന്നത് സ്വാഭാവികമാണ്. എന്നാൽ മതിയായ വിശ്രമത്തിന് ശേഷവും വിട്ടുമാറാത്ത ക്ഷീണം നിങ്ങളെ അലട്ടുന്നുണ്ടെങ്കിൽ അത് 'നോർമൽ' ആയി കാണരുത്. പലപ്പോഴും ഗൗരവകരമായ ആരോഗ്യ പ്രശ്നങ്ങളുടെ ആദ്യ ലക്ഷണമാകാം ഈ തളർച്ച.

സ്ത്രീകളിൽ വിട്ടുമാറാത്ത ക്ഷീണത്തിന് കാരണമാകുന്ന പ്രധാന ഘടകങ്ങൾ ഇവയാണ്:

1. അനീമിയ (രക്തക്കുറവ്)

സ്ത്രീകളിൽ ക്ഷീണമുണ്ടാക്കുന്ന ഏറ്റവും സാധാരണമായ കാരണമാണിത്. ശരീരത്തിൽ ഇരുമ്പിന്റെ (Iron) അളവ് കുറയുന്നത് വഴി കോശങ്ങളിലേക്ക് ആവശ്യമായ ഓക്സിജൻ എത്താതിരിക്കുകയും ഇത് കഠിനമായ തളർച്ചയ്ക്ക് കാരണമാവുകയും ചെയ്യുന്നു.

2. തൈറോയ്ഡ് പ്രശ്നങ്ങൾ

തൈറോയ്ഡ് ഗ്രന്ഥിയുടെ പ്രവർത്തനത്തിലുണ്ടാകുന്ന വ്യതിയാനങ്ങൾ മെറ്റബോളിസത്തെ ബാധിക്കും. ഹൈപ്പോതൈറോയ്ഡിസം ഉള്ളവർക്ക് അമിതമായ ക്ഷീണവും ശരീരഭാരം കൂടുന്നതും അനുഭവപ്പെടാറുണ്ട്.

3. വിറ്റാമിൻ കുറവ്

വിറ്റാമിൻ ഡി, വിറ്റാമിൻ ബി12 എന്നിവയുടെ കുറവ് പേശികളുടെ ബലക്കുറവിനും ശരീരവേദനയ്ക്കും ഇടയാക്കും. സൂര്യപ്രകാശം ഏൽക്കാത്തതും ഭക്ഷണക്രമത്തിലെ പാകപ്പിഴകളും ഇതിന് കാരണമാകുന്നു.

4. ഉറക്കമില്ലായ്മ (Sleep Apnea)

മതിയായ സമയം ഉറങ്ങുന്നുണ്ടെങ്കിലും ഉറക്കത്തിന്റെ ഗുണനിലവാരം കുറയുന്നത് പകൽ മുഴുവൻ ക്ഷീണം അനുഭവപ്പെടാൻ കാരണമാകും. ഉറക്കത്തിനിടയിലെ ശ്വസന തടസ്സങ്ങൾ പലരും തിരിച്ചറിയാറില്ല.

5. മാനസിക സമ്മർദ്ദം

അമിതമായ ഉത്കണ്ഠ, മാനസിക സമ്മർദ്ദം, വിഷാദം എന്നിവ ശാരീരികമായ തളർച്ചയായി പ്രകടമാകാറുണ്ട്. ഇത് ഉറക്കത്തെയും ഭക്ഷണത്തോടുള്ള താൽപ്പര്യത്തെയും ബാധിക്കും.

6. ഹൃദയസംബന്ധമായ പ്രശ്നങ്ങൾ

സ്ത്രീകളിൽ ഹൃദ്രോഗത്തിന്റെ ലക്ഷണങ്ങൾ പുരുഷന്മാരുടേതിൽ നിന്നും വ്യത്യസ്തമാകാം. യാതൊരു കാരണവുമില്ലാതെ തോന്നുന്ന കഠിനമായ തളർച്ച ചിലപ്പോൾ ഹൃദയത്തിന്റെ പ്രവർത്തനക്ഷമത കുറയുന്നതിന്റെ സൂചനയാകാം.