സേലത്ത് വാഹനാപകടത്തില്‍ ഷൈന്‍ ടോം ചാക്കോയുടെ പിതാവ് ചാക്കോ മരിച്ചു; ഷൈന്‍ ടോമിനും അമ്മയ്ക്കും പരിക്ക്; നടന്റെ രണ്ട് കൈകള്‍ക്കും സാരമായ പരിക്ക്; അപകടം എറണാകുളത്ത് നിന്നും ബെംഗളൂരുവിലേക്കുള്ള യാത്രയ്ക്കിടെ; മുന്‍പേ പോയ ലോറിയില്‍ കാര്‍ ഇടിച്ചു കയറിയെന്ന് ദൃക്‌സാക്ഷികള്‍
സേലത്ത് വാഹനാപകടത്തില്‍ ഷൈന്‍ ടോം ചാക്കോയുടെ പിതാവ് ചാക്കോ മരിച്ചു
സേലം: സേലത്ത് വാഹനാപകടത്തില്‍ നടന്‍ ഷൈന്‍ ടോം ചാക്കോയുടെ പിതാവ് സി പി ചാക്കോ മരിച്ചു. അപകടത്തില്‍ ഷൈന്‍ ടോമിന് പരുക്കേറ്റിട്ടുണ്ട്. ഷൈനിന്റെ കൈയ്ക്ക് പരുക്കേറ്റെന്നാണ് പുറത്തുവരുന്ന വാര്‍ത്തകള്‍. എറണാകുളത്ത് നിന്നും ബെംഗളൂരുവിലേക്കുള്ള യാത്രയ്ക്കിടെയാണ് അപകടം. ഇവര്‍ക്കൊപ്പം വാഹനത്തില്‍ ഉണ്ടായിരുന്ന അമ്മയ്ക്കും പരുക്കുണ്ട്.
ഷൈനും പിതാവും അമ്മയും സഹോദരനും ഡ്രൈവറുമാണ് വാഹനത്തിലുണ്ടായിരുന്നത്. മുന്‍പില്‍പോയ ലോറിയില്‍ കാര്‍ ഇടിക്കുകയായിരുന്നെന്ന് ദൃക്‌സാക്ഷികള്‍ പറഞ്ഞു. രാവിലെ ഏഴു മണിയോടെ തമിഴ്‌നാട്ടിലെ ധര്‍മപുരിയ്ക്ക് അടുത്ത് പാല്‍കോട്ട് എന്ന സ്ഥലത്തായിരുന്നു അപകടം. ഷൈനിന്റെ രണ്ട് കൈകളും ഒടിഞ്ഞതായി അപകടം കണ്ടവര്‍ പ്രതികരിച്ചു.
ബെംഗളൂരുവിലേക്ക് ഷൈനിന്റെ ചികിത്സാര്‍ത്ഥമായിരുന്നു കുടുംബത്തിന്റെ യാത്രയെന്നാണ് പുറത്തുവരുന്ന വിവരങ്ങള്‍. അപകടം നടന്നയുടന്‍ പരിക്കേറ്റവരെ തൊട്ടടുത്തുള്ള ആശുപത്രിയില്‍ എത്തിച്ചെങ്കിലും ചാക്കോയുടെ ജീവന്‍ രക്ഷിക്കാനായില്ല. കാറിന്റെ മധ്യഭാഗത്തെ സീറ്റിലാണ് ചാക്കോയും ഭാര്യയും ഇരുന്നത്. ഷൈന്‍ ഏറ്റവും പിന്‍സീറ്റില്‍ കിടന്നുറങ്ങുകയായിരുന്നു. മുന്‍സീറ്റിലായിരുന്നു സഹോദരന്‍.
അപകടം ഉണ്ടായ ഉടനെ അഞ്ചുപേരെയും ആശുപത്രിയിലെത്തിച്ചെങ്കിലും ഷെനിന്റെ പിതാവ് മരിച്ചു. പരുക്കേറ്റവര്‍ പാല്‍ക്കോട്ട് സര്‍ക്കാര്‍ ആശുപത്രിയില്‍ ചികിത്സയിലാണ്. ഇന്നലെ രാത്രി 10 മണിയോടെയാണ് കുടുംബം കൊച്ചിയില്‍ നിന്നും യാത്ര തിരിച്ചത്. തൊടുപുഴയിലെ ചികിത്സ പൂര്‍ത്തിയാക്കിയ ശേഷം ചികിത്സ ബെംഗളൂരുവിലേക്ക് മാറ്റിയിരുന്നു.
ഷൈന്‍ ടോം ചാക്കോയുമായി ബന്ധപ്പെട്ട കേസുകള്‍ ഉണ്ടായപ്പോള്‍ എല്ലാം വിശദീകരണവുമായി രംഗത്തുവന്നത് പിതാവ് സി പി ചാക്കോ ആയിരുന്നു. ഷൈന്‍ ടോമിന് എന്നും താങ്ങായി നിന്ന പിതാവിനെയാണ് അപകടത്തില്‍ നഷ്ടമാകുന്നത്.