മുംബൈയില്‍ ടാങ്ക് വൃത്തിയാക്കാനിറങ്ങിയ നാലു തൊഴിലാളികള്‍ ശ്വാസംമുട്ടി മരിച്ചു; ഒരാള്‍ ചികിത്സയില്‍

മുംബൈ: മുംബൈയില്‍ നിര്‍മാണത്തിലിരിക്കുന്ന ഒരുകെട്ടിടത്തിലെ ടാങ്ക് വൃത്തിയാക്കുന്നതിനിടെ നാലുതൊഴിലാളികള്‍ ശ്വാസംമുട്ടി മരിച്ചു. ഹസിപാല്‍ ഷെയ്ഖ് (19), രാജ ഷെയ്ഖ് (20), ജിയുള്ള ഷെയ്ഖ് (36), ഇമാണ്ടു ഷെയ്ഖ് (38) എന്നിവരാണ് മരിച്ചത്. ഞായറാഴ്ച ഉച്ചയ്ക്ക് 12.30-ന് നാഗ്പാഡയിലെ ബിസ്മില്ല സ്‌പേസ് കെട്ടിടത്തിലാണ് സംഭവം.

ടാങ്കിനുള്ളില്‍ കയറിയ അഞ്ചുപേര്‍ ബോധരഹിതരാകുകയായിരുന്നു. തുടര്‍ന്ന്, അഗ്‌നിരക്ഷാസേനാംഗങ്ങള്‍ സ്ഥലത്തെത്തി ഇവരെ പുറത്തെടുത്ത് സമീപത്തെ ആശുപത്രിയിലെത്തിച്ചെങ്കിലും നാലുപേരെ രക്ഷിക്കാനായില്ല. പുര്‍ഹാന്‍ ഷെയ്ഖ് എന്ന തൊഴിലാളി സുഖംപ്രാപിച്ച് വരികയാണെന്നാണ് റിപ്പോര്‍ട്ട്.

സംഭവത്തില്‍, പോലീസ് കേസെടുത്ത് അന്വേഷണം ആരംഭിച്ചു. തൊഴിലാളികളെ ജോലിക്കെടുത്തവരുടെ ഭാഗത്ത് എന്തെങ്കിലും വീഴ്ചയുണ്ടായോ എന്ന് അന്വേഷിക്കും. ഇവര്‍ സുരക്ഷാമാനദണ്ഡം പാലിച്ചിരുന്നോയെന്ന് അന്വേഷിക്കുമെന്നും പോലീസ് അറിയിച്ചു.