അമിതവേഗത്തില്‍ ചീറിപാഞ്ഞ പോര്‍ഷെ കാര്‍ രണ്ട് സ്‌കൂട്ടറുകളില്‍ ഇടിച്ചു ഒരാള്‍ മരിച്ചു; രണ്ട് സ്ത്രീകള്‍ക്ക് പരിക്കേറ്റു
പോര്‍ഷെ കാര്‍ രണ്ട് സ്‌കൂട്ടറുകളില്‍ ഇടിച്ചു ഒരാള്‍ മരിച്ചു; രണ്ട് സ്ത്രീകള്‍ക്ക് പരിക്കേറ്റു
ഛണ്ഡിഗഢ്: അമിതവേഗത്തില്‍ ചീറിപാഞ്ഞ ആഡംബര കാര്‍ പോര്‍ഷെ ഇടിച്ചു ഒരാള്‍ മരിച്ചു. പോര്‍ഷെ കെയെന്‍ കാര്‍ രണ്ട് സ്‌കൂട്ടറുകളില്‍ ഇടിച്ചുകയറുകയായിരുന്നു. അപകടത്തില്‍ രണ്ടു സ്ത്രീകള്‍ക്ക് പരിക്കേറ്റതായും റിപ്പോര്‍ട്ടുണ്ട്. തിങ്കളാഴ്ച രാത്രി സെക്ടര്‍ നാല് പെട്രോള്‍ പമ്പിന് സമീപമാണ് സംഭവം.
തെറ്റായ ദിശയില്‍ നിന്ന് അമിത വേഗതത്തില്‍ കാര്‍ വരികയായിരുന്നുവെന്ന് പൊലീസ് ഉദ്യോഗസ്ഥരെ ഉദ്ധരിച്ച് എന്‍.ഡി.ടി.വി റിപ്പോര്‍ട്ട് ചെയ്തു. നയാഗോണില്‍ നിന്നുള്ള അങ്കിത് എന്നയാളാണ് മരിച്ചതെന്ന് തിരിച്ചറിഞ്ഞിട്ടുണ്ട്. സംഭവസ്ഥലത്ത് വെച്ച് തന്നെ ഇയാള്‍ മരിച്ചതായാണ് റിപ്പോര്‍ട്ട്.
കാര്‍ ആദ്യം ഒരു ആക്ടിവ സ്‌കൂട്ടറില്‍ ഇടിച്ചതായും ശേഷം അങ്കിതിന്റെ ആക്ടിവ സ്‌കൂട്ടറില്‍ ഇടിച്ചതായും മാധ്യമങ്ങള്‍ റിപ്പോര്‍ട്ട് ചെയ്തു. രണ്ട് സ്ത്രീകള്‍ക്ക് ഗുരുതരമായി പരിക്കേറ്റു. പരിക്കേറ്റ സ്ത്രീകള്‍ നിലവില്‍ പി.ജി.ഐ ആശുപത്രിയില്‍ ചികിത്സയിലാണ്. ഛണ്ഡിഗഢിലെ സെക്ടര്‍ 21ല്‍ താമസിക്കുന്ന പോര്‍ഷെ കാര്‍ ഡ്രൈവറെ പൊലീസ് അറസ്റ്റ് ചെയ്തിട്ടുണ്ട്. ഡ്രൈവര്‍ക്കെതിരെ ബന്ധപ്പെട്ട വകുപ്പുകള്‍ പ്രകാരം കേസെടുത്തിട്ടുണ്ട്.