അധ്യാപകനുമായി പ്രണയമെന്ന് വ്യാജപ്രചാരണം; സഹപാഠികളുടെ പരിഹാസത്തില് മനംനൊന്ത് മെഡിക്കല് വിദ്യാര്ത്ഥിനി ആത്മഹത്യ ചെയ്തു
ബംഗളൂരു: സഹപാഠികളുടെ നിരന്തരമായ പരിഹാസവും അപവാദ പ്രചാരണവും മൂലം കര്ണാടകയില് മെഡിക്കല് വിദ്യാര്ത്ഥിനി ജീവനൊടുക്കി. മല്ലാദിഹള്ളിയിലെ രാഘവേന്ദ്ര ആയുര്വേദിക് കോളേജ് അവസാന വര്ഷ ബി.എ.എം.എസ് വിദ്യാര്ത്ഥിനിയായ നിഖിതയെയാണ് (22) വീടിനുള്ളില് മരിച്ച നിലയില് കണ്ടെത്തിയത്. അധ്യാപകനുമായി പ്രണയത്തിലാണെന്ന് സഹപാഠികള് തെറ്റായ വാര്ത്തകള് പ്രചരിപ്പിച്ചതിനെത്തുടര്ന്നുള്ള മാനസിക വിഷമമാണ് ആത്മഹത്യയ്ക്ക് പിന്നിലെന്നാണ് പ്രാഥമിക വിവരം.
കോളേജിലെ ലക്ചററായ ഡോ. രാജുവുമായി നിഖിതയ്ക്ക് നല്ല സൗഹൃദമുണ്ടായിരുന്നു. എന്നാല് ഇരുവരും പ്രണയത്തിലാണെന്ന തരത്തില് ചില സഹപാഠികള് കോളേജില് മോശമായ രീതിയില് പ്രചാരണം നടത്തുകയായിരുന്നുവെന്ന് നിഖിതയുടെ പിതാവ് ഉമാശങ്കര് പോലീസില് നല്കിയ പരാതിയില് പറയുന്നു. സഹപാഠികളുടെ പരിഹാസം അതിരുവിട്ടതോടെ നിഖിത വലിയ രീതിയിലുള്ള അപമാനവും വൈകാരിക പ്രയാസവും അനുഭവിച്ചിരുന്നു.
മകള്ക്ക് മാതാപിതാക്കള് ആത്മവിശ്വാസം നല്കാന് ശ്രമിച്ചിരുന്നുവെങ്കിലും കോളേജിലെ പീഡനം തുടര്ന്നുകൊണ്ടേയിരുന്നു. ഇത്തരം വാക്കുകള് അവഗണിച്ച് പഠനത്തില് ശ്രദ്ധ കേന്ദ്രീകരിക്കാന് ഉപദേശിച്ചെങ്കിലും സഹപാഠികളുടെ ക്രൂരമായ പെരുമാറ്റം നിഖിതയെ മാനസികമായി തകര്ത്തു. ഒടുവില് സഹിക്കാനാവാത്ത മാനസികസമ്മര്ദ്ദത്തെത്തുടര്ന്നാണ് പെണ്കുട്ടി ജീവനൊടുക്കാന് തീരുമാനിച്ചത്.
സംഭവസ്ഥലത്തുനിന്നും പോലീസ് ആത്മഹത്യക്കുറിപ്പ് കണ്ടെടുത്തിട്ടുണ്ട്. തന്റെ മകളുടെ മരണത്തിന് ഉത്തരവാദികളായ സഹപാഠികളുടെ പേരുവിവരങ്ങള് ഉമാശങ്കര് പോലീസിന് കൈമാറിയിട്ടുണ്ട്. കുറ്റക്കാര്ക്കെതിരെ കടുത്ത നിയമനടപടി സ്വീകരിക്കണമെന്ന് കുടുംബം ആവശ്യപ്പെട്ടു. സംഭവത്തില് പോലീസ് കേസെടുത്ത് വിശദമായ അന്വേഷണം ആരംഭിച്ചു. ഒരു മെഡിക്കല് വിദ്യാര്ത്ഥിനിയുടെ ദാരുണാന്ത്യം കോളേജ് വൃത്തങ്ങളെയും നാടിനെയും ഒരുപോലെ ഞെട്ടിച്ചിരിക്കുകയാണ്.