ഒറ്റ വീശലിൽ കിട്ടുന്നത് നല്ല മുന്തിയ ഇനം കായൽ മീനുകൾ; കരിമീന്‍, കിളിമീന്‍ ഉൾപ്പടെ വലയിൽ കുരുങ്ങും; വിറ്റ് പോകുന്നത് ശരവേഗത്തിൽ; പെട്ടെന്ന് അടുത്തവന്റെ വളർച്ചയിൽ 'അസൂയ'; ഇതൊന്നും ഇഷ്ടപ്പെടാതെ തൊഴിലാളിയോട് ചെയ്തത്; 45കാരനെ പൊക്കി പോലീസ്; നശിപ്പിച്ച ഉരുപ്പടിയുടെ വിലയിൽ ഞെട്ടൽ
തിരുവനന്തപുരം: സമൂഹത്തിൽ പല സ്വഭാവങ്ങളിലുള്ള ആളുകളെ നമുക്ക് കാണാൻ സാധിക്കും. ഒരു ആപത്ത് വന്നാൽ കൂടെ നിൽക്കുന്നവരും ചതിക്കുന്നവരും എല്ലാം ഇക്കൂട്ടത്തിൽ പെടും. ചിലരാകട്ടെ അന്യന്റെ വളർച്ചയിൽ അസൂയ പെടുന്നവരുമായിരിക്കും. അങ്ങനെയൊരു സംഭവമാണ് തിരുവനന്തപുരം വെള്ളായണിയിൽ സംഭവിച്ചിരിക്കുന്നത്.
മീൻ പിടിത്തക്കാരനായ തൊഴിലാളിയുടെ വല കത്തിച്ചതാണ് കേസ്. തൊഴിലാളിയുടെ വളർച്ച ഇഷ്ടപ്പെടാതെ വന്നപ്പോൾ ആണ് 45കാരൻ ക്രൂര പ്രവർത്തി ചെയ്തത്. സംഭവത്തെ കുറിച്ച് പോലീസ് പറയുന്നത് ഇങ്ങനെ..
വെള്ളായണിക്കായലിൽ മീൻപിടിക്കുന്ന തൊഴിലാളിയുടെ വല കത്തിച്ച കേസിലെ പ്രതി അറസ്റ്റിൽ. വെണ്ണിയൂർ സ്വദേശി സജിയെ(45)യാണ് വിഴിഞ്ഞം പോലീസ് പിടികൂടിയത്. കഴിഞ്ഞയാഴ്ചയാണ് സംഭവം നടന്നതെന്നാണ് പോലീസ് വിശദമാക്കുന്നത്.
കായൽത്തീരത്ത് സൂക്ഷിച്ചിരുന്ന വലയെടുത്ത് അക്കരെ കൊണ്ടുപോയാണ് ഇയാൾ കത്തിച്ചത്. വെണ്ണിയൂർ കല്ല് കുത്തിയ വിളവീട്ടിൽ ശ്യാം ജോണിന്റെ ഉടമസ്ഥതയിലുള്ള ഒരു ലക്ഷം രൂപ വിലവരുന്ന വലയാണ് രാത്രി ഇയാൾ കത്തിച്ചത്.
സ്ഥിരമായി വള്ളവും വലയും വച്ചിരിക്കുന്ന കായലിന്റെ വവ്വാമൂല തുടലിവിള ഭാഗത്തുനിന്നും വല മോഷ്ടിച്ച് കോളിയൂർ ഭാഗത്തെ തെങ്ങിൻ തോപ്പിലെത്തിച്ച് കത്തിക്കുകയായിരുന്നു. ഉടമ രാവിലെ മീൻ പിടിക്കാൻ എത്തിയപ്പോഴാണ് വല കാണാതായത് അറിയുന്നത്. വിഴിഞ്ഞം പോലീസ് കേസെടുത്ത് നടത്തിയ അന്വേഷണത്തിലാണ് പ്രതി പിടിയിലായത്. ശ്യാമിന് പ്രദേശത്തു നിന്നും കാര്യമായ രീതിയിൽ മീൻ ലഭിക്കുമായിരുന്നു. ഇത് ഇഷ്ടപ്പെടാതെയാണ് തീ വെച്ചതെന്നാണ് പോലീസ് വ്യക്തമാക്കുന്നത്.