ആളുകൾ ഈ ചെറുപ്പക്കാരനെ തേടിയെത്തുന്നത് ഒരൊറ്റ ആവശ്യത്തിന്; കൈയ്യിൽ 'ഗുളിക'യുടെ സ്റ്റോക്ക് ഉണ്ടെങ്കിൽ പിന്നെ ഭയങ്കര കച്ചവടം; ഏജൻ്റുമാർ ഇത് വിപണിയിലെത്തിക്കുന്നത് മറ്റൊരു രൂപത്തിൽ; പരിശോധനയിൽ എക്സൈസിന്റെ അടക്കം കിളി പോയി; നിഷാദ് ഇനി അകത്ത്
കൊല്ലം: മാരക ലഹരിമരുന്നുകളായ എംഡിഎംഎ ഗുളികകളും പൗഡറും കഞ്ചാവുമായി 25 വയസ്സുകാരൻ എക്സൈസിന്റെ പിടിയിൽ. കൊല്ലം കരുനാഗപ്പള്ളിയിലെ ക്ലാപ്പനയിൽ നടത്തിയ പരിശോധനയിലാണ് ക്ലാപ്പന കോട്ടയ്ക്കപ്പുറം ഷഹനാസ് മൻസിലിൽ നിഷാദ് അറസ്റ്റിലായത്. ഒരു എംഡിഎംഎ ഗുളികയ്ക്ക് 4000 രൂപ വരെ ഈടാക്കി വിൽപന നടത്തിയിരുന്ന ഇയാളുടെ കൈവശം നിന്ന് വലിയ അളവിൽ ലഹരിവസ്തുക്കൾ പിടിച്ചെടുത്തു.
നിഷാദിൽ നിന്ന് അഞ്ച് എംഡിഎംഎ ടാബ്ലെറ്റുകൾ, 3.11 ഗ്രാം എംഡിഎംഎ പൗഡർ, 204 ഗ്രാം കഞ്ചാവ് എന്നിവയാണ് എൻഫോഴ്സ്മെന്റ് ആൻഡ് ആന്റി നാർക്കോട്ടിക് സ്പെഷ്യൽ സ്ക്വാഡ് പിടിച്ചെടുത്തത്. സാധാരണ പൗഡർ രൂപത്തിൽ വിപണിയിലെത്തുന്ന എംഡിഎംഎയെ അപേക്ഷിച്ച് ടാബ്ലെറ്റ് രൂപത്തിലുള്ള എംഡിഎംഎക്ക് വീര്യം കൂടുതലാണെന്ന് എക്സൈസ് ഉദ്യോഗസ്ഥർ അറിയിച്ചു.
എൻഫോഴ്സ്മെന്റ് ആൻഡ് ആന്റി നാർക്കോട്ടിക് സ്പെഷ്യൽ സ്ക്വാഡ് എക്സൈസ് ഇൻസ്പെക്ടർ ദിലീപ് സിപിയുടെ നേതൃത്വത്തിലായിരുന്നു പരിശോധന. അസിസ്റ്റന്റ് എക്സൈസ് ഇൻസ്പെക്ടർ(ഗ്രേഡ്) നിർമലൻ തമ്പി, പ്രിവന്റീവ് ഓഫീസർ പ്രസാദ് കുമാർ, സിവിൽ എക്സൈസ് ഓഫീസർമാരായ അനീഷ് എംആർ, അജിത്ത് ബി എസ്, സൂരജ് പി എസ്, ബാലു എസ് സുന്ദർ, അഭിരാം എച്ച്, വനിത സിവിൽ എക്സൈസ് ഓഫീസർ വർഷ വിവേക് എന്നിവരും പ്രതിയെ പിടികൂടിയ സംഘത്തിൽ ഉണ്ടായിരുന്നു.
ലഹരിമരുന്ന് കടത്തിനെതിരെ കർശന നടപടികൾ തുടരുന്നതിനിടെയാണ് ഈ നിർണായക അറസ്റ്റ്. കോടതിയിൽ ഹാജരാക്കിയ നിഷാദിനെ റിമാൻഡ് ചെയ്തു.
പിടികൂടിയ നിഷാദിനെതിരെ മയക്കുമരുന്ന് വിരുദ്ധ നിയമപ്രകാരം കേസെടുക്കുകയും കോടതിയിൽ ഹാജരാക്കുകയും ചെയ്തു. കേസിന്റെ ഗൗരവം കണക്കിലെടുത്ത് കോടതി പ്രതിയെ റിമാൻഡ് ചെയ്തു. ലഹരി വിപണനത്തിന് പിന്നിലുള്ള ഉറവിടങ്ങളെ കണ്ടെത്താനും കൂടുതൽ അറസ്റ്റുകൾ ഉണ്ടാകാനും സാധ്യതയുണ്ടെന്ന് എക്സൈസ് വൃത്തങ്ങൾ അറിയിച്ചു.
മയക്കുമരുന്ന് മുക്തമായ കേരളം എന്ന ലക്ഷ്യത്തോടെ എക്സൈസ് വകുപ്പ് പരിശോധനകൾ കൂടുതൽ കർശനമാക്കുകയാണ്. വരും ദിവസങ്ങളിൽ ജില്ലയുടെ വിവിധ ഭാഗങ്ങളിൽ സമാനമായ പരിശോധനകൾ തുടരുമെന്ന് അധികൃതർ വ്യക്തമാക്കി.