മന്ത്രവാദിനിയെന്ന് മുദ്രകുത്തി ക്രൂരത; അമ്മയെയും കുഞ്ഞിനെയും മണ്ണെണ്ണയൊഴിച്ച് തീകൊളുത്തി; ഒരു വയസ്സുകാരനോട് പോലും ദയ കാട്ടാതെ ഗ്രാമവാസികൾ; ഓടി രക്ഷപ്പെട്ട് ഭർത്താവ്; നാടിനെ വിറപ്പിച്ച ഇരട്ട കൊലപാതകത്തിൽ നാലുപേർ പിടിയിൽ

ചായ്ബാസ: ജാർഖണ്ഡിലെ വെസ്റ്റ് സിംഗ്ഭും ജില്ലയിൽ അന്ധവിശ്വാസത്തിന്റെ പേരിൽ മുപ്പത്തിരണ്ടുകാരിയെയും ഒരു വയസ്സുള്ള കുഞ്ഞിനെയും തീക്കൊളുത്തി കൊലപ്പെടുത്തിയ സംഭവത്തിൽ പുറത്ത് വരുന്നത് ഞെട്ടിക്കുന്ന വിവരങ്ങൾ. യുവതി മന്ത്രവാദം നടത്തുന്നു എന്ന് ആരോപിച്ചായിരുന്നു ഗ്രാമവാസികളുടെ ക്രൂരത. സംഭവത്തിൽ നാലുപേരെ പോലീസ് അറസ്റ്റ് ചെയ്തു.

ചൊവ്വാഴ്ച രാത്രി കുമാർദുങ്കി പോലീസ് സ്റ്റേഷൻ പരിധിയിലെ ഗ്രാമത്തിലാണ് നാടിനെ നടുക്കിയ സംഭവം നടന്നത്. ആക്രമണത്തിൽ പരിക്കേറ്റ യുവതിയുടെ ഭർത്താവ് ഓടി രക്ഷപ്പെട്ടതിനാലാണ് ജീവൻ തിരിച്ചുകിട്ടിയത്. രാത്രി ബന്ധുവീട്ടിൽ അഭയം തേടിയ ഇയാൾ ബുധനാഴ്ച രാവിലെ പോലീസ് സ്റ്റേഷനിലെത്തി പരാതി നൽകുകയായിരുന്നു.

ക്രൂരത നടന്നത് ഇങ്ങനെ:

ഗ്രാമത്തിലെ ഒരു ബന്ധു ദീർഘകാലമായി രോഗബാധിതനായി ചികിത്സയിലായിരുന്നു. ഇയാൾ ചൊവ്വാഴ്ച മരിച്ചതോടെ ഇതിന് കാരണം യുവതിയുടെ മന്ത്രവാദമാണെന്ന് ഗ്രാമവാസികൾ ആരോപിച്ചു. തുടർന്ന് പന്ത്രണ്ടോളം വരുന്ന സംഘം വീടിന് മുന്നിലെത്തുകയും ബഹളം വെക്കുകയും ചെയ്തു. പ്രകോപിതരായ സംഘം യുവതിയുടെ മേൽ മണ്ണെണ്ണയൊഴിച്ചു. ഈ സമയം ഒരു വയസ്സുള്ള കുഞ്ഞ് യുവതിയുടെ കൈകളിലുണ്ടായിരുന്നു. ഇരുവരെയും ജീവനോടെ തീക്കൊളുത്തുകയായിരുന്നു എന്ന് ഭർത്താവ് നൽകിയ പരാതിയിൽ പറയുന്നു. ഇരുവരും സംഭവസ്ഥലത്ത് തന്നെ മരിച്ചു.

അന്വേഷണം ഊർജ്ജിതം:

ഭർത്താവിന്റെ പരാതിയുടെ അടിസ്ഥാനത്തിൽ കുമാർദുങ്കി സർക്കാർ ആശുപത്രിയിൽ അദ്ദേഹത്തെ പ്രവേശിപ്പിച്ചു. പരാതിയിൽ പേരുള്ള നാല് പുരുഷന്മാരെ പോലീസ് ഇതിനോടകം അറസ്റ്റ് ചെയ്തിട്ടുണ്ട്. "അന്ധവിശ്വാസത്തിന്റെ പേരിൽ നടന്ന ഈ ക്രൂരകൃത്യത്തിൽ പങ്കെടുത്ത സ്ത്രീകളെ തിരിച്ചറിയാനുള്ള ശ്രമത്തിലാണ് പോലീസ്," ജഗന്നാഥ്പൂർ എസ്.ഡി.പി.ഒ റാഫേൽ മുർമു അറിയിച്ചു. സംഭവത്തിൽ കേസ് രജിസ്റ്റർ ചെയ്ത് വിശദമായ അന്വേഷണം ആരംഭിച്ചിട്ടുണ്ട്.