നടി മാല പാര്‍വതിയുടെ മോര്‍ഫ് ചെയ്ത ചിത്രങ്ങള്‍ പ്രചരിപ്പിച്ചു; ഫേസ്ബുക്കില്‍ 15,000ത്തോളം അംഗങ്ങളുടെ ഗ്രൂപ്പും; മാലാ പാര്‍വതിയുടെ പരാതിയില്‍ കേസെടുത്ത് പോലീസ്; വികൃതമാക്കപ്പെട്ട ചില ശരീരങ്ങളും തന്റെ മുഖവും ചേര്‍ത്താണ് ചിത്രങ്ങള്‍; പ്രതികളെ പിടികൂടുന്നത് വരെ പിന്നോട്ടു പോകില്ലെന്ന് നടി
നടി മാല പാര്‍വതിയുടെ മോര്‍ഫ് ചെയ്ത ചിത്രങ്ങള്‍ പ്രചരിപ്പിച്ചു
കൊച്ചി: സോഷ്യല്‍ മീഡിയയില്‍ നടിമാരുടെ ചിത്രങ്ങള്‍ മോശമായ വിധത്തില്‍ ഉപയോഗിക്കുന്നത് സംബന്ധിച്ച വാര്‍ത്തകള്‍ പലതവണ പുറത്തുവന്നിട്ടുണ്ട്. ഡീപ് ഫേക്ക് വീഡിയോകള്‍ക്കെതിരെ നിയമ നടപടിയുമായി പോയ നടിമാരുമുണ്ട്. ഇതിനിടെ നടി മാലാ പാര്‍വതി സൈബറിടത്തില്‍ തന്നെ പേരു ചിത്രവും ഉപയോഗിച്ചു നടത്തുന്ന മോശം പ്രചരണങ്ങള്‍ക്കെതിരെ രംഗത്തെത്തി. മാല പാര്‍വതിയുടെ മോര്‍ഫ് ചെയ്ത ചിത്രങ്ങള്‍ പ്രചരിപ്പിച്ച സംഭവത്തില്‍ അവര്‍ പോലീസില്‍ പരാതി നല്‍കി.
തന്റെ ചിത്രങ്ങള്‍ മോര്‍ഫ് ചെയ്തെന്ന മാല പാര്‍വതിയുടെ പരാതിയില്‍ സൈബര്‍ പൊലീസ് കേസെടുത്തിട്ടുണ്ട്. മനേഷ് എന്ന ഫേസ്ബുക്ക് ഐഡിയാണ് ചിത്രങ്ങള്‍ മോര്‍ഫ് ചെയ്ത് പ്രചരിപ്പിച്ചത്. ഇന്നലെയാണ് മാല പാര്‍വതി പരാതി നല്‍കിയത്. മാല പാര്‍വതിയുടെ പേരില്‍ പതിനായിരത്തിലധികം അംഗങ്ങളുള്ള ഫേസ്ബുക്ക് പേജിലാണ് മോര്‍ഫ് ചെയ്ത ചിത്രങ്ങള്‍ പ്രചരിപ്പിച്ചത്. മാനേജറാണ് ഇക്കാര്യം ശ്രദ്ധയില്‍പ്പെടുത്തിയതെന്ന് മാല പാര്‍വതി പറയുന്നു.
മാല പാര്‍വതിയുടെ പേരില്‍ പതിനായിരത്തിലധികം അംഗങ്ങളുള്ള ഫെയ്‌സ്ബുക്ക് പേജിലാണ് മോര്‍ഫ് ചെയ്ത ചിത്രങ്ങള്‍ പ്രചരിപ്പിച്ചത്. . മാല പാര്‍വതി സോഷ്യല്‍ മീഡിയയിലൂടെ പങ്കുവയ്ക്കുന്ന ചിത്രങ്ങളെടുത്ത് മോര്‍ഫ് ചെയ്ത് അശ്ലീല ചിത്രങ്ങളാക്കി പ്രചരിപ്പിക്കുന്നു എന്നതാണ് കേസ്.
സംഭവത്തില്‍ പൊലീസ് അന്വേഷണം തുടങ്ങി. ആരാണ് പേജിന്റെ അഡ്മിന്‍ എന്ന കാര്യത്തിലൊന്നും ഇതുവരെ വ്യക്തത വന്നിട്ടില്ല. സ്ത്രീത്വത്തെ അപമാനിച്ചതിന്റെ പേരിലും ഐടി ആക്ട് പ്രകാരവുമാണ് പൊലീസ് കേസെടുത്തിരിക്കുന്നത്. പ്രതിക്കായുള്ള തിരച്ചിലിലാണ് പൊലീസ്. കൊച്ചി സൈബര്‍ പൊലീസാണ് ഈ അക്കൗണ്ടിന്റെ ഉടമയ്ക്കെതിരെ കേസെടുത്തിരിക്കുന്നത്. ഭാരതീയ ന്യായസംഹിത 78 (2) 79 ഐടി ആക്ട് 66, 66C, 67 എന്നീ വകുപ്പുകള്‍ ചുമത്തിയാണ് കേസെടുത്തിരിക്കുന്നത്.
സ്ത്രീത്വത്തെ അപമാനിക്കണം എന്ന ഉദ്ദേശത്തോടെയാണ് ഇത്തരമൊരു പ്രചാരണം നടന്നതെന്നും പരാതിയില്‍ ചൂണ്ടിക്കാട്ടിയിരുന്നു. തന്റെ പേര് ഉള്‍പ്പെടുത്തി ദുരുദ്ദേശത്തോടെ ഒരു ഗ്രൂപ്പുണ്ടാക്കി അതിലെ അംഗങ്ങളുമായി മോര്‍ഫ് ചെയ്ത ചിത്രങ്ങള്‍ പങ്കുവച്ചുവെന്നാണ് മാലാ പാര്‍വതിയുടെ പരാതി. വികൃതമാക്കപ്പെട്ട ചില ശരീരങ്ങളും തന്റെ മുഖവും ചേര്‍ത്താണ് ചിത്രങ്ങള്‍ നിര്‍മിച്ചതെന്നും വിശദമായ മൊഴി പൊലീസിന് നല്‍കിയിട്ടുണ്ടെന്നും മാലാ പാര്‍വതി പ്രതികരിച്ചു. തന്റെ ചിത്രങ്ങള്‍ പ്രചരിപ്പിച്ച ഗ്രൂപ്പില്‍ പതിനയ്യായിരം അംഗങ്ങളുണ്ട്. കൊച്ചി സൈബര്‍ പൊലീസ് വിഷയത്തെ ഗൗരവപൂര്‍വം കണ്ടെന്നും താന്‍ കേസുമായി മുന്നോട്ടുപോകുമെന്നും മാലാ പാര്‍വതി കൂട്ടിച്ചേര്‍ത്തു.