സേലം സ്വദേശിനി ധനകോടിയുടെ മരണം കൊലപാതകം: മദ്യ ലഹരിയില്‍ അതിക്രൂരമായി കൊന്നതാണെന്ന് ഭര്‍ത്താവ്; അമ്പായിരത്തിന്റെ കുറ്റസമ്മത മൊഴി; വയോധികന്‍ ഭാര്യയെ കല്ലുകൊണ്ടിടിച്ച് ലിഫ്റ്റ് കുഴിയിലിട്ടു കൊന്നു
സേലം സ്വദേശി നിധന കോടിയുടെ മരണം കൊലപാതകം
കണ്ണൂര്‍: തലശേരി നഗരഹൃദയത്തില്‍ ജൂബിലി റോഡിലെ പണി തീരാത്ത കെട്ടിടത്തിന്റെ ലിഫ്റ്റ് കുഴിയില്‍ കണ്ടെത്തിയ അസ്ഥികൂടംതമിഴ്‌നാട് സേലം സ്വദേശിനി ധന കോടിയുടെ (73)താണെന്ന് സൂചന. സംഭവവുമായി ബന്ധപ്പെട്ട് പൊലിസ് കസ്റ്റഡിയിലെടുത്ത ഭര്‍ത്താവ് അമ്പായിരം (77) മദ്യ ലഹരിയില്‍ ഇവരെ കല്ലുകൊണ്ടു ഇടിച്ചിട്ടതിനു ശേഷം ലിഫ്റ്റ് കുഴിയിലേക്ക് തള്ളി കല്ലുകള്‍ ദേഹത്തിട്ട് കൊന്നതാണെന്നാണ് പൊലിസിന് നല്‍കിയ മൊഴി. മദ്യലഹരിയിലുണ്ടായ സാമ്പത്തിക തര്‍ക്കമാണ് കൊലപാതകത്തിന് കാരണമെന്നാണ് ഇയാള്‍ മൊഴി നല്‍കിയത്.
കൊല്ലപ്പെട്ടത് ധന കോടി തന്നെയാണെന്ന് മക്കളുടെ ഡി.എന്‍.എ ടെസ്റ്റില്‍ ഉറപ്പിച്ചതിനു ശേഷം പ്രതിയുടെ അറസ്റ്റു രേഖപ്പെടുത്തുമെന്ന് തലശേരി ടൗണ്‍ പൊലിസ് അറിയിച്ചു. വെള്ളിയാഴ്ച്ച വൈകിട്ടാണ് പഴയ കെട്ടിടത്തിന്റെ ലീഫ്റ്റില്‍ നിന്നും തലയോട്ടി കണ്ടെത്തിയത്. ശനിയാഴ്ച്ച ഉന്നത ഉദ്യോഗസ്ഥരും ഫോറന്‍സിക് വിദഗ്ദ്ധരും സ്ഥലത്തെത്തി നടത്തിയ പരിശോധനയില്‍ അസ്ഥികൂടത്തിന്റെ മുഴുവന്‍ ഭാഗങ്ങളും കണ്ടെത്തി. ആറു മാസത്തോളം പഴക്കമുള്ളതാണ് അസ്ഥികൂടമെന്നാണ് പ്രാഥമിക നിഗമനം.
വര്‍ഷങ്ങളായി ആക്രി പൊറുക്കി വില്‍പ്പന നടത്തി ജീവിക്കുന്നവരാണ് അമ്പായിരവും ഭാര്യ ധനകോടിയും. ഇവരുടെ മക്കള്‍ വിവാഹിതരായി വേറെ കഴിയുകയാണ്. കഴിഞ്ഞ ആറു മാസക്കാലമായി ധന കോടിയെ കാണാതായിട്ട്. അമ്മയെ കുറിച്ചു മക്കള്‍ അന്വേഷിക്കുമ്പോഴൊല്ലാം ഇവരെ സേലത്തേക്ക് ട്രെയിന്‍ കയറ്റി വിട്ടു നാട്ടില്‍ പോയി എന്നൊക്കെയാണ് പിതാവ് മറുപടി നല്‍കിയിരുന്നത്. വെള്ളിയാഴ്ച്ച മക്കള്‍ ചോദ്യം ചെയ്തപ്പോഴാണ് ധന കോടി തലശേരിയിലെ കെട്ടിടത്തിലുണ്ടെന്ന നിര്‍ണായക വിവരം ഇയാള്‍ വെളിപ്പെടുത്തിയത്.
ഉടന്‍ മക്കള്‍ അമ്പായിരത്തെയും കൂട്ടി സ്ഥലത്ത് എത്തുകയായിരുന്നു. തലയോട്ടിയും ഉടുത്ത സാരിയുടെ ഭാഗങ്ങളും ചെരുപ്പും കണ്ടയുടനെ അമ്മ മരിച്ചതായി മക്കള്‍ക്ക് മനസിലാവുകയായിരുന്നു. ഇതിനിടെ ഓടി രക്ഷപ്പെടാന്‍ ശ്രമിച്ച അമ്പായിരത്തെ മക്കള്‍ നാട്ടുകാരുടെ സഹായത്തോടെ തടഞ്ഞുവെച്ച് വിവരം തലശേരി ടൗണ്‍ പൊലിസ് സ്റ്റേഷനില്‍ അറിയിക്കുകയായിരുന്നു. തലശേരി എ.എസ്.പി ബികിരണ്‍, സി.ഐ ബിജു പ്രകാശ്, എസ്.ഐമാരായ പി.പി ഷമില്‍, കെ. അശ്വതി എന്നിവരുള്‍പ്പെട്ടെ പൊലിസ് സംഘമാണ് അന്വേഷണം നടത്തിയത്. ഡോഗ് സ്‌ക്വാഡും വിരലടയാള വിദഗ്ദ്ധരും പരിശോധന നടത്തി.
തമിഴ്‌നാട് സേലം സ്വദേശികളായ ദമ്പതികള്‍ കഴിഞ്ഞ കുറെ വര്‍ഷങ്ങളായി കണ്ണൂരില്‍ താമസിച്ചു വരികയാണ്. ഏറെക്കാലമായി പഴയങ്ങാടിയിലെ ആളൊഴിഞ്ഞ കെട്ടിടത്തിലാണ് ഈ നാടോടി ദമ്പതികള്‍ കഴിഞ്ഞു വന്നിരുന്നത്. പകല്‍ നേരങ്ങളില്‍ ആക്രി പൊറുക്കി വിറ്റു കിട്ടുന്ന പണം കൊണ്ടാണ് ജീവിച്ചിരുന്നത്. പഴയങ്ങാടിയില്‍ പൊലിസ് രാത്രികാല പരിശോധന ശക്തമാക്കിയപ്പോഴാണ് ഇവര്‍ തലശേരിയിലേക്ക് ചേക്കേറിയത്. റെയില്‍വെ സ്റ്റേഷന്‍ പരിസരത്താണ് ആദ്യം കഴിഞ്ഞിരുന്നത്. പിന്നീട് ജൂബിലി റോഡിലെ നിര്‍മാണം നടന്നുകൊണ്ടിരിക്കുന്ന കെട്ടിടത്തിലേക്ക് മാറുകയായിരുന്നു.