ആറാംക്ലാസുകാരിയുടെ സ്വകാര്യഭാഗങ്ങള്‍ ചിത്രീകരിച്ച് പണം തട്ടാന്‍ ശ്രമം; മലേഷ്യയിലുള്ള പ്രതി കുട്ടിയെ ബന്ധപ്പെട്ടത് വീഡിയോ കോളിലൂടെ: തിരുവനന്തപുരം സ്വദേശിയായ പ്രതിക്ക് 46 വര്‍ഷം തടവും പിഴയും

കോട്ടയം: കോട്ടയത്തുള്ള ആറാംക്ലാസ് വിദ്യാര്‍ഥിനിയെ മലേഷ്യയിലിരുന്ന് ഫോണില്‍ വിളിച്ച് സ്വകാര്യഭാഗങ്ങള്‍ ചിത്രീകരിച്ച് പണം തട്ടാന്‍ ശ്രമിച്ച പ്രതി പിടിയില്‍. മലേഷ്യയിലുള്ള പ്രതിയെ നാട്ടിലെത്തിച്ചാണ് അറസ്റ്റ് ചെയ്തത്. കുട്ടിയുടെ സ്വകാര്യ ചിത്രങ്ങള്‍ ഫോണില്‍ പകര്‍ത്തിയ പ്രതി വീട്ടുകാര്‍ക്ക് അയച്ചുകൊടുത്ത് പണം തട്ടാന്‍ ശ്രമിക്കുക ആയിരുന്നു. കേസില്‍ പ്രതിക്ക് 46 വര്‍ഷം തടവും 90,000 രൂപ പിഴയും വിധിച്ചു. തിരുവനന്തപുരം മേല്‍വെട്ടൂര്‍ കെട്ടിടത്തില്‍ വീട്ടില്‍ എസ്. ഷിജു (37) വിനെയാണ് കോട്ടയം ഫാസ്റ്റ് ട്രാക്ക് സ്‌പെഷ്യല്‍ കോടതി (പോക്‌സോ) ജഡ്ജി വി.സതീഷ് ശിക്ഷിച്ചത്.

കുട്ടിയുടെ മുത്തശ്ശി നല്‍കിയ പരാതിയിലാണ് പ്രതി മലേഷ്യയിലാണെന്ന് കണ്ടെത്തിയതും നാട്ടിലെത്തിച്ച് അറസ്റ്റ് ചെയ്തതു. 2021 ജനുവരിയിലാണ് കേസിനാസ്പദമായ സംഭവം. കുട്ടിയുടെ മുത്തശ്ശിയുടെ ഫോണിലേക്ക് വിദേശത്തുള്ള നമ്പറില്‍ നിന്ന് മിസ്ഡ് കോളെത്തിയതോടെയാണ് സംഭവത്തിന് തുടക്കം. വിദേശത്തുള്ള മക്കള്‍ വിളിച്ചതെന്ന് തെറ്റിദ്ധരിച്ച് മുത്തശ്ശി തിരിച്ചുവിളിച്ചു. സ്‌നേഹത്തോടെ സംസാരിച്ച പ്രതി മുത്തശ്ശിയുമായി സൗഹൃദം സ്ഥാപിക്കുകയും ഇതുവഴി പേരക്കുട്ടിയുമായും അടുപ്പം സ്ഥാപിക്കുകയും ആയിരുന്നു. ശേഷം മുത്തശ്ശിയുടെ ആവശ്യപ്രകാരം കുട്ടിയെ ഫോണിലൂടെ ബയോളജി പഠിപ്പിക്കാമെന്ന് ഏറ്റു.

മുറിയിലിരുത്തി ഫോണിലൂടെ പഠിപ്പിക്കുന്നതിനിടെ, പ്രതി കുട്ടിയോട് സ്വന്തം സ്വകാര്യഭാഗങ്ങളില്‍ പിടിക്കാന്‍ ആവശ്യപ്പെട്ടു. ഈ രംഗങ്ങള്‍ മൊബൈല്‍ ഫോണില്‍ ചിത്രീകരിക്കുകയും ചെയ്തു. പിന്നീട് ഈ ദൃശ്യങ്ങള്‍ കുട്ടിയുടെ മുത്തശ്ശിക്ക് അയച്ചുകൊടുക്കുകയും പണം ആവശ്യപ്പെട്ട് ഭീഷണിപ്പെടുത്തുകയും ആിരുന്നു. പണം തന്നില്ലെങ്കില്‍ ദൃശ്യങ്ങള്‍ പുറത്തുവിടുമെന്നും ഭീഷണിപ്പെടുത്തിയതോടെ മുത്തശ്ശി പോലീസില്‍ പരാതിപ്പെടുകയായിരുന്നു.

തുടര്‍ന്ന് പ്രതിയെ കണ്ടെത്താനായി പോലിസ് ബ്ലൂ കോര്‍ണര്‍ നോട്ടീസ് പുറപ്പെടുവിച്ചു. പ്രതി മലേഷ്യയിലുണ്ടെന്ന് കണ്ടെത്തിയ പോലീസ്, റെഡ് കോര്‍ണര്‍ നോട്ടീസ് പുറപ്പെടുവിച്ച് മലേഷ്യന്‍ പോലീസിന്റെ സഹായത്തോടെ ചെന്നൈയിലെത്തിച്ചാണ് അറസ്റ്റ് ചെയ്തത്.ഇരയും പ്രതിയും നേരില്‍ കണ്ടിട്ടില്ലെന്ന പ്രത്യേകതയും കേസിനുണ്ട്. അതിനാല്‍ ശാസ്ത്രീയ തെളിവുകളാണ് പ്രോസിക്യൂഷന്‍ ശേഖരിച്ചത്.

പ്രതിയുടെ ശബ്ദസാമ്പിള്‍, അഞ്ച് മൊബൈല്‍ ഫോണ്‍, മൂന്ന് ഫൊറന്‍സിക് സയന്‍സ് ലാബ് റിപ്പോര്‍ട്ട് എന്നിവ തെളിവായി കോടതിയില്‍ ഹാജരാക്കി. പാമ്പാടി പോലീസ് ഇന്‍സ്‌പെക്ടറായിരുന്ന യു. ശ്രീജിത്താണ് കുറ്റപത്രം സമര്‍പ്പിച്ചത്. പ്രോസിക്യൂഷനുവേണ്ടി അഡ്വ. പോള്‍ കെ. ഏബ്രഹാം കോടതിയില്‍ ഹാജരായി.