വിവാഹ വാഗ്ദാനം നല്‍കി കബളിപ്പിച്ചു; മറ്റൊരു യുവതിയെ വിവാഹം കഴിച്ചു; യുവാവിനെ വിവാഹവേദിയിലെത്തി മര്‍ദ്ദിച്ച് യുവതി; പരാതിയില്‍ കേസെടുത്ത് പൊലീസ്
വിവാഹ വാഗ്ദാനം നല്‍കി കബളിപ്പിച്ച യുവാവിനെ മര്‍ദ്ദിച്ച് യുവതി
ഭുവനേശ്വര്‍: വിവാഹ വാഗ്ദാനം നല്‍കി കബളിപ്പിച്ച യുവാവിനെ വിവാഹവേദിയിലെത്തി മര്‍ദ്ദിച്ച് യുവതി. തന്നെ ചതിച്ചയാളെ വിവാഹവേദിയില്‍ കയറി തല്ലുന്നതിന്റെ വീഡിയോയാണ് ഇപ്പോള്‍ സമൂഹമാദ്ധ്യമങ്ങളില്‍ വൈറലായിക്കൊണ്ടിരിക്കുന്നത്. ഒഡീഷയിലാണ് സംഭവം. വിവാഹവേദിയിലേക്ക് ഒരു സ്ത്രീ പൊലീസുമായി എത്തുന്നതാണ് വീഡിയോയില്‍ കാണുന്നത്. വിവാഹ വാഗ്ദാനം നല്‍കി വരനായ യുവാവ് വഞ്ചിച്ചുവെന്ന് ഇവര്‍ പറയുന്നുണ്ട്.
ഞായറാഴ്ച രാത്രി ഭുവനേശ്വറിലെ ധൗളി പൊലീസ് സ്റ്റേഷന്‍ പരിധിയിലുള്ള കല്യാണ മണ്ഡപത്തിലാണ് സംഘര്‍ഷമുണ്ടായത്.വരനുമായി പരാതി നല്‍കിയ യുവതിയുടെ വിവാഹനിശ്ചയം കഴിഞ്ഞതായിരുന്നു. എന്നാല്‍, ഇവരുടെ അറിവില്ലാതെ ഇയാള്‍ മറ്റൊരു വിവാഹം കഴിച്ചു. ഇതിന് പിന്നാലെയാണ് പൊലീസില്‍ പരാതി നല്‍കിയ ശേഷം ഇവര്‍ ഉദ്യോഗസ്ഥരുമായി വിവാഹവേദിയിലെത്തിയത്.
വരന്‍ തന്നെ മാനസികമായി ചൂഷണം ചെയ്തുവെന്നും വഞ്ചിച്ചുവെന്നും യുവതി ഉറക്കെ വിളിച്ചുപറഞ്ഞു. അയാള്‍ അഞ്ച് ലക്ഷം രൂപ കൈപ്പറ്റിയെന്നും അവര്‍ ആരോപിച്ചു. വരനെ വിവാഹവേദിയില്‍ നിന്ന് കസ്റ്റഡിയിലെടുത്ത പൊലീസ് സ്റ്റേഷനിലേക്ക് കൊണ്ടുപോയി. ആളുകള്‍ തടയാന്‍ ശ്രമിക്കുന്നതിനിടെ യുവതി വരനെ അടിക്കുന്നതും വീഡിയോയില്‍ കാണാം.
വിഷയത്തില്‍ പൊലീസ് വിശദമായി അന്വേഷണം നടത്തുന്നുണ്ട്. വിശ്വാസ ലംഘനം, വഞ്ചന തുടങ്ങിയ വകുപ്പുകള്‍ ചുമത്തിയാണ് പ്രതിക്കെതിരെ കേസെടുത്തതെന്നും പൊലീസ് അറിയിച്ചു.