നാലു മിനിറ്റില്‍ 52 തവണ മാപ്പ് അപേക്ഷിച്ചിട്ടും മനസ് അലിഞ്ഞില്ല; കരിയര്‍ അവസാനിപ്പിക്കുമെന്നും സ്‌കേറ്റിങിന് ലഭിച്ച മെഡലുകള്‍ തിരിച്ചെടുക്കുമെന്ന് ഭീഷണിപ്പെടുത്തി: സ്‌കൂളിന്റെ മൂന്നാം നിലയില്‍നിന്നു ചാടി ആത്മഹത്യക്ക് ശ്രമിച്ച് ദേശീയ സ്‌കേറ്റിങ് താരം
മൂന്നാം നിലയില്‍നിന്നു ചാടി ആത്മഹത്യക്ക് ശ്രമിച്ച് ദേശീയ സ്‌കേറ്റിങ് താരം
ഭോപ്പാല്‍: ദേശീയ സ്‌കേറ്റിങ് താരമായ എട്ടാം ക്ലാസ് വിദ്യാര്‍ത്ഥി സ്‌കൂളിന്റെ മൂന്നാം നിലയില്‍ നിന്നും ചാടി ആത്മഹത്യയ്ക്ക് ശ്രമിച്ചു. മധ്യപ്രദേശിലെ രത്ലാമിലാണ് സംഭവം. ഗുരുതരമായി പരുക്കേറ്റ കുട്ടിയെ ഉടന്‍തന്നെ അടുത്തുള്ള സ്വകാര്യ ആശുപത്രിയില്‍ പ്രവേശിപ്പിച്ചു. കുട്ടി അപകടനില തരണം ചെയ്തതായാണ് വിവരം. സ്‌കൂള്‍ അധികൃതരില്‍ നിന്നും നേരിട്ട കടുത്ത മാനസിക സമ്മര്‍ദ്ധത്ത തുടര്‍ന്നാണ് കുട്ടി കെട്ടിടത്തിന് മുകളില്‍ നിന്നും ചാടി ആത്മഹത്യയ്ക്ക് ശ്രമിച്ചത്.
ഡോംഗ്രെ നഗറിലുള്ള സ്വകാര്യ സ്‌കൂളിന്റെ മൂന്നാം നിലയില്‍ നിന്നാണ് എട്ടാം ക്ലാസ് വിദ്യാര്‍ഥിയായ സ്‌കേറ്റിങ് ചാംപ്യന്‍ ആത്മഹത്യക്ക് ശ്രമിച്ചത്. വ്യാഴാഴ്ച വിദ്യാര്‍ത്ഥി തന്റെ മൊബൈല്‍ ഫോണ്‍ സ്‌കൂളില്‍ കൊണ്ടുവരികയും ക്ലാസ് മുറിയില്‍ വച്ച് വിഡിയോ റെക്കോര്‍ഡ് ചെയ്ത് സമൂഹമാധ്യമത്തില്‍ അപ്ലോഡ് ചെയ്യുകയും ചെയ്തിരുന്നു. വിഡിയോ കണ്ടെത്തിയ സ്‌കൂള്‍ അധികൃതര്‍ മാതാപിതാക്കളെ വിളിച്ചുവരുത്തുകയും മുന്നറിയിപ്പ് നല്‍കുകയും ചെയ്തു.
എന്നാല്‍ കഴിഞ്ഞ ദിവസം പ്രിന്‍സിപ്പലിന്റെ ഓഫിസിലേക്കു കുട്ടിയെ വിളിപ്പിച്ചതോടെയാണ് കുട്ടിക്ക് സമ്മര്‍ദ്ദം താങ്ങാനാവാതയത്. താന്‍ ചെയ്ത തെറ്റിന് കുട്ടി പ്രിന്‍സിപ്പലിന്റെ ഓഫിസില്‍ വെച്ച് 52 തവണ ക്ഷമാപണം നടത്തി. ഇതിനുപിന്നാലെ കുട്ടിയെ സസ്‌പെന്‍ഡ് ചെയ്യുകയും സ്‌കേറ്റിങിനു ലഭിച്ച മെഡലുകള്‍ തിരിച്ചെടുക്കുകയും ചെയ്യുമെന്ന് പ്രിന്‍സിപ്പല്‍ ഭീഷണിപ്പെടുത്തുകയായിരുന്നു. ഇതോടെ കുട്ടി മാനസികമായി തകര്‍ന്നു പോകുകയും കെട്ടിടത്തിന് മുകളില്‍ നിന്നും ചാടി ആത്മഹത്യാ ശ്രമം നടത്തുകയും ആയിരുന്നു.