ഉഡുപ്പി ശ്രീകൃഷ്ണ മഠത്തിന്റെ ഘോഷയാത്രയില് 'ഓം' ആലേഖനം ചെയ്ത കാവി പതാകയുമായി കലക്ടര്; രാഷ്ട്രീയ പരിപാടി അല്ലെന്നും ഔദ്യോഗിക കൃത്യനിര്വഹണത്തിന്റെ ഭാഗമെന്നും വിശദീകരണം; നടപടി വേണമെന്ന് കോണ്ഗ്രസ്
ബംഗളൂരു: ഉഡുപ്പി ശ്രീകൃഷ്ണമഠം പര്യായോത്സവ ഘോഷയാത്രയില് ജില്ലാ കളക്ടര് ടി.കെ.സ്വരൂപ 'ഓം' ആലേഖനം ചെയ്ത കാവി പതാകയേന്തിയത് വിവാദത്തില്. കളക്ടര് ഏന്തിയത് ആര്എസ്എസിന്റെ പതാകയാണെന്നും നടപടി വേണമെന്നും ആവശ്യപ്പെട്ട് ജില്ലാ കോണ്ഗ്രസ് ഘടകം മുഖ്യമന്ത്രി സിദ്ധരാമയ്യയ്ക്ക് കത്തയച്ചു. ഉഡുപ്പി ബിജെപി എംഎല്എ യശ്പാല് സുവര്ണ ആര്എസ്എസ് പതാകയാണ് കലക്ടര്ക്ക് കൈമാറിയതെന്ന് ഡിസിസി മനുഷ്യാവകാശ സെല് പ്രസിഡന്റ് ഹരീഷ് ഷെട്ടി ആരോപിച്ചു.
ഇക്കഴിഞ്ഞ 18ന് ഷിരൂര് മഠാധിപതി വേദവര്ദ്ധന തീര്ത്ഥസ്വാമിയുടെ നഗരപ്രവേശന ഘോഷയാത്ര ഉദ്ഘാടനം ചെയ്താണ് കളക്ടര് കാവിപ്പതാകയേന്തിയത്. ഉഡുപ്പിയിലെ ബിജെപി എംഎല്എ യശ്പാല് സുവര്ണ ആര്എസ്എസ് പതാകയാണ് കളക്ടര്ക്ക് കൈമാറിയതെന്നാണ് കോണ്ഗ്രസ് ആരോപിക്കുന്നത്. എന്നാല് ആരോപണം കളക്ടര് നിഷേധിച്ചു. 2026-28വരെ ഉഡുപ്പി ശ്രീകൃഷ്ണ ക്ഷേത്രത്തിന്റെ ഭരണച്ചുമതല ഷിരൂര് മഠത്തിന് കൈമാറുന്നതിന്റെ ഭാഗമായിരുന്നു ചടങ്ങ് സംഘടിപ്പിച്ചത്.
എട്ട് മഠങ്ങള് മാറിമാറിയാണ് ക്ഷേത്രത്തിന്റെ ഭരണച്ചുമതല നടത്തുന്നത്. ഭരണച്ചുമതല മാറുന്ന ചടങ്ങില് ഉന്നത ഉദ്യോഗസ്ഥര് അടക്കം പങ്കെടുക്കാറുണ്ട്. ചടങ്ങുകള്ക്ക് വന് ജനാവലിയും എത്താറുണ്ട്.നടന്നത് രാഷ്ട്രീയ പരിപാടി ആയിരുന്നില്ലെന്നും ഔദ്യോഗിക കൃത്യനിര്വഹണത്തിന്റെ ഭാഗമായാണ് പങ്കെടുത്തതെന്നുമാണ് കളക്ടറുടെ വിശദീകരണം.
എന്നാല് സംഭവത്തില് കളക്ടറോട് ഔദ്യോഗിക വിശദീകരണം ചോദിച്ചോ എന്നറിയില്ല. അതേസമയം കോണ്ഗ്രസ് നടപടിക്കെതിരെ ബിജെപി രംഗത്തെത്തി. 'ഇതൊരു പരമ്പരാഗത ഹിന്ദു ഉത്സവമാണ്. അവിടെ ഉപയോഗിക്കുന്ന പതാക വെറുമൊരു പതാകയാണ്. അത് പാകിസ്ഥാന്റെ പതാകയല്ല. അങ്ങനെയുള്ള പതാക കളക്ടര് ഏന്തിയതില് ഒരു തെറ്റും കാണുന്നില്ല'- ഒരു ബിജെപി നേതാവ് പറഞ്ഞു.